— Ева, үтүө күнүнэн! Бастатан туран бэйэҥ тускунан ааҕааччыларбытыгар билиһиннэриэххэ.
— Бэйэм үҥкүүнү туруорааччы быһыытынан үлэлиибин. Олох кыра сааспыттан үҥкүү кэрэ абылаҥар ылларбытым, этэргэ дылы ийэбин батыһа сылдьан сыана оҕото буолбутум. Ийэм Любовь Алексеевна Никитина, РФ уонна СӨ култууратын үтүөлээх үлэһитэ. Аҕыйах ахсааннаах норуоттар «Гулун» ансаамбылын төрүттээччитэ, салайааччыта, олоҕун баһыйар өттүн бүүс-бүтүннүү култуура сайдыытыгар биэрэн турар. Аҕам Михаил Иванович Кузьменко, олоҕун тухары ыраах айаҥҥа суоппардаабыта, билигин бочуоттаах сынньалаҥҥа олорор. Оскуола кэнниттэн төһө да тэхиньичэскэй үөрэҕи баһылаабытым иһин, ордук култуура эйгэтигэр убанан, өйүм-санаам сытар дьыалатыгар сыстан үлэлии-хамсыы сылдьарбынан үөрэбин эрэ.
— Анаан-минээн Сунтаарбыт улууһугар кэлэн, «Уол Дуолан бухатыыр» олоҥхо испэктээкилигэр тутаах туруорааччынан үлэлэһэ сылдьаҕын. Бу туһунан кэпсии түһүөҥ дуо?
— Бу иннигэр аҕыйах ахсааннаах норуоттар үҥкүүлэригэр ылсан, аҥардас онно эрэ үлэлиир эбит буоллахпына, аҕыйах сылтан бэттэх саха төрүт култууратыгар сыстан эрэбин. Ол курдук, элбэх ыһыахтарга үҥкүү туруорааччынан үлэлэһэбин.
Олоҥхоҕо аан маҥнайгыбын холонон эрэбин. «Уол Дуолан бухатыыр» олоҥхо туруорааччы режиссера – Үүнэр көлүөнэ тыйаатырын режиссера Антон Валерьевич Ботаков буолар. Кини миигин ыҥыран, бииргэ үлэлэһиэххэ диэн хамаандатыгар киллэрбитэ. Улаханнык толлубакка, уһуну-киэҥи толкуйдуу барбакка сөбүлэспиппин бэйэм да өйдөөбөккө хаалбытым. Ол да буоллар, олус үөрэбин уонна махталбын тириэрдэбин. Маннык улахан туруорууга кинилиин бастакы үлэм буолар. Сунтаар улууһугар бэйэм эмиэ маҥнайгытын кэллим. Онон, туох эрэ өссө атын сыаллаах-соруктаах кэлбит курдук сананабын. Тоҕо диэтэр, олоҥхо эрэ туруора буолбакка, бэйэбэр саҥаны билэ-көрө, үөрэтэ, олохпор туох эрэ уларыйыыны киллэрээрибин кэлбит курдукпун. Ити мээнэҕэ буолбатах.
— Олоҥхо эйгэтигэр сыстан үлэлэһэ сылдьарыҥ олус кэрэхсэбиллээх. Ол да буоллар, хайа баҕарар эйгэҕэ ыарахаттар бааллар. Тус бэйэҥ уустуктары көрүстүҥ дуо? Оруолларга кимнээх баалларый?
— Норуот тыйаатыра буолан, хара сарсыардаттан хара киэһэҕэ дылы элбэх киһини кытары алтыһаҕын. Итини тэҥэ, дьону түмэ тардарга туспа бириэмэни эрэйэр. Ол гынан баран, артыыстарбыт бары олоҥхо силигин ситэригэр олус кыһаллан, баҕаран туран үлэлэһэр буолан түмүк баар. Онон, улахан уустуктары көрсүбэтим диэххэ сөп. Оруолларга атын улуустартан эмиэ артыыстар бааллар. Ол курдук, бастакы састааптан уларыйыы бөҕө буолла. Сорох артыыстарбыт төһө да кыттыахтарын баҕарбыттарын иһин, үлэлэринэн табыллыбатылар. Ол да буоллар, билигин састаап толору хомуллан олоҥхобут премьератын дьоҥҥо-сэргэҕэ көрдөрөөрү сылдьабыт. Олус эппиэтинэстээхтик сыһыаннаһан, сыраларын ууран үлэлии сылдьалларын көрөн киһи үөрэр эрэ. Биир бэйэм Сунтаар дьоно-сэргэтэ ураты, ханна да хатыламмат тойуктаахтарын ордук сөҕө-махтайа көрдүм.
— Ева, үлэҕиттэн быыс-арыт булан сэһэргэспиккэр махтанабыт, айа-тута сылдьар үлэҕит ситиһиилэннин, көрөөччү биһирэбилин ыллын диэн баҕа санаабытын этэбит.
***
Елизавета ТИТОВА
Оставить комментарий