Былырыын дьиикимдэлэр улуус баһылыгын грантовай бырайыактары өйүүр куонкуруска кыайан, 595 тыһ. солк. ылбыттара. Былырыын уонна быйыл нэһилиэк олохтоохторо бу дьыалаҕа ис сүрэхтэриттэн кыһамньылаахтык ылсан үлэлээн, улууспутугар бэртээхэй эбийиэги тутан үлэҕэ киллэрдилэр.
Бырайыак ааптарынан нэһилиэк баһылыга Прокопий Осипов буолар, бырайыагы олохтоох дьаһалта үлэһиттэрэ ырытан оҥорсубуттар. Дьиикимдэтээҕи «Сайдыы» уопсастыбаннай түмсүү бэрэссэдээтэлэ Альбина Осипова, прорабтар Борис Корякин, Андрей Антонов, Михаил Федотов, таҥар-иһэрдэр үлэтигэр Семен Степанов, Айхал Ушканов, Станислав Саввинов уонна нэһилиэк олохтоохторо, ыраах-чугас олорор биир дойдулаахтарын көмөлөрө улахан.
Дьиикимдэ нэһилиэгин баһылыга Прокопий Осипов 2019 с. үлэлии кэлиэҕиттэн Нюрбинка кытылын сөбүлүү көрөн, маннык кэрэ миэстэҕэ ыаллары түмэр, дьону холбуур эбийиэги оҥорор санааҕа киирбитин, ону олоххо киллэрээри өрөспүүбүлүкэ үбүттэн улуус баһылыгын грантовай куонкуруһугар бу бырайыагы ырытан оҥорбуттарын иһитиннэрдэ. Былырыын уонна быйыл барыта 50 күн нэһилиэк олохтоохторо босхо үлэлээбиттэрин, биир дойдулаахтара улаханнык көмөлөспүттэрин истиҥ-иһирэх махтал тылларынан аҕынна. Өрөспүүбүлүкэ уонна улуус салалтатыгар көмөлөрүн-өйөбүллэрин иһин махталын тиэртэ.
Улуус баһылыга Алексей Иннокентьев эҕэрдэ тылыгар Дьиикимдэҕэ улууска суох бырайыак олоххо киирбитин бэлиэтээтэ, итинэн сибээстээн Прокопий Осипов кэргэнигэр истиҥ махталын тиэртэ. Чахчыта, таптыыр кэргэн истиҥ сыһыана уонна күүстээх таптала Прокопий Николаевичка маннык эбийиэги тутан киллэрэригэр сабыдыаллаабыта саарбаҕа суох. Алексей Михайлович кэрэхсэбиллээх бырайыак суолтатын бэлиэтээн туран, манна кыттыгастаах бары дьоҥҥо махталын анаата, эбийиэк тутуутугар үлэлэспит дьоҥҥо уонна Прокопий Осиповка Эҕэрдэ суруктарын туттарда.
Салгыы Ньурба куорат баһылыга Геннадий Игнатьев уонна улуус МТ баһылыктарын Сэбиэтин бэрэссэдээтэлэ, Сүлэ нэһилиэгин баһылыга Дмитрий Иванов истиҥник эҕэрдэлээтилэр, бэлэхтэрин туттардылар.
Бырааһынньык чэрчитинэн 50 сыл устата иллээхтик-эйэлээхтик, дьоллоохтук олорон кэлбит кэргэнниилэри — Таркаайы нэһилиэгин олохтоохторун Василий Петрович уонна Клавдия Григорьевна Васильевтары чиэстээтилэр. Юбилярдарга улуустааҕы ЗАГС отделын салайааччыта Альбина Алексеева, улуус баһылыга Алексей Иннокентьев Эҕэрдэ суруктары уонна сэмэй бэлэхтэри туттардылар.
Сахалыы сиэри-туому биллиилээх норуот эмчитэ, алгысчыт Алиса Иннокентьева ситэрдэ, аалай лиэнтэни Алексей Иннокентьев уонна Прокопий Осипов быһа кырыйдылар. Ону кытта муоста икки кытыытынан фонтан уута өрө тыкта, үҥкүүһүт оҕолор сэргэхтик үҥкүүлээн дайдылар.
Улуус култууратын үлэһиттэрэ, нэһилиэк талааннаахтара, оҕолор барахсаттар бэлиэ түгэн тэрээһинин олус тупсардылар. Бу күн улууспут көмүс куоластаах ырыаһыттарыттан биирдэстэрэ Алена Руфова Нюрбинка үрэх туһунан саҥа ырыаны сүрэхтээн дьоҥҥо-сэргэҕэ бэлэх уунна. «Таптал муостатын» аһыллыытын ортотуттан илгэлээх ардах түстэ, кэрэ түгэнтэн санаата көтөҕүллүбүт, көнньүөрбүт дьон син-биир үөрдэ-көттө.
***
Геннадий АНТОНОВ
Оставить комментарий