“ДЭГИТТЭР СУРУНАЛЫЫС” республикатааҕы куонкурус түмүктэннэ

Күндү кэллиэгэбит, дьүөгэбит, биир идэлээхпит СӨ бэчээтин туйгуна, СӨ суруналыыстарын сойууһун чилиэнэ Ольга Шепелева аатынан ыытыллыбыт “ДЭГИТТЭР СУРУНАЛЫЫС” республикатааҕы куонкурус түмүктэннэ.

Уус Алдан улууһун “Мүрү саһарҕата” хаһыатын үлэһиттэрэ көҕүлээн “Сахабэчээт” СӨ ГАТ, СӨ суруналыыстарын Сойууһун тэрийиилэринэн суруналыыс Ольга Шепелева аатынан ыытыллыбыт “ДЭГИТТЭР СУРУНАЛЫЫС” куонкуруска балаһыанньа быһыытынан хаһыакка, телевидениеҕа, радиоҕа, интернет таһаарыыларга үлэлии сылдьар 40-гар диэри саастаах суруналыыстар кытыннылар. Барыта 19 кыттааччыттан 21 үлэ киирдэ. Манна Чурапчы, Уус Алдан, Усуйаана, Сунтаар редакцияларыттан, “Киин куорат” хаһыаттан, Хаҥалас, Нерюнгри, Уус Алдан улууһун Саха НКИХ филиалларыттан, “Якутия-24” каналтан уонна СИА, “Улус медиа” сетевой таһаарыылартан, Саха радиотыттан, Саха тыйаатырын пресс-сулууспатыттан күн бүгүн үлэлии-хамсыы сылдьар суруналыыстар кытыннылар. 

Үгүс интэриэһинэй, билигин уопсастыбаҕа, олоххо тыҥаан турар кыһалҕалары, төрүт култуурабытын, сиэр-майгы боппуруостарын таарыйар үлэлэртэн талыллан үс анал аат уонна Ольга Шепелева дьиэ кэргэнэ, аймахтара, СГУ (ХИФУ) суруналыыстыка факультетыгар бииргэ үөрэммит доҕотторо олохтообут биһирэбил бириистэрэ ананнылар:

– “Бастыҥ репортаж” анал ааты Чурапчы улууһун “Саҥа олох” хаһыатын старшай кэрэспэдьиэнэ, эдэр кэскиллээх үлэһит Марфа Петрова ылла;

–  “Бастыҥ видеоочерк” анал аат Саха НКИХ Хаҥалас улууһунааҕы филиалын кэрэспэдьиэнэ Виолетта Засимоваҕа ананна; 

– “Дэгиттэр суруналыыс” анал аат Усуйаана улууһун “Заря Яны” хаһыатын кылаабынай редактора Алексей Вербицкайга тигистэ. 

Анал ааттар кыайыылаахтарыгар хас биирдиилэригэр 30 тыһыынча солкуобай суумалаах бириэмийэлэр туттарылыннылар.

Ольга Шепелева дьиэ кэргэнин аатыттан 20 тыһ. солк. анал бириэмийэни “Улуус медиа” сетевой таһаарыы кэрэспэдьиэнэ Лина Моякунова, аймахтарын ааттарыттан 18 тыһ. 500 солк. анал бириэмийэни Уус Алдан улууһун “Мүрү саһарҕата” хаһыат анал кэрэспэдьиэнэ Мария Аргунова, бииргэ үөрэммит доҕотторун аатыттан 15 тыһ. солк. анал бириэмийэни “Якутия-24” (“Саха” НКИХ) телеканал кэрэспэдьиэнэ Надежда Саханская туттулар.

Кыайыылаахтары өссө төгүл эҕэрдэлээн туран, куонкуруска кыттыбыт биир идэлээхтэрбитигэр дэгиттэр талааннаах суруналыыс, күндү киһибит Ольга Шепелева аата, оҥорон хаалларбыт үлэтэ-хамнаһа үйэтитиллэригэр кылааккытын киллэрсибиккитигэр улахан махталбытын тиэрдэбит.

***
Уус Алдан улууһун “Мүрү саһарҕата” хаһыатыттан