«ДАРХАН УУС» 2025 сыл

Олунньу 22 күнүгэр Туймаада хочото Олоҥхо дойдутун Улуу Суорунтан оҥоһуулаах, Кудай Бахсыттан сыдьааннаах 80 тахса тимир ууһун түмэ тарта. Бу 14-с төгүлүн ыытыллар «ДАРХАН УУС» Саха сирин тимир уустарын сүрүн түһүлгэтэ чахчы сүрүн буоларын мэктиэлиир. Бу иннинэ биир түһүлгэҕэ 80 тахса тимир ууһа өссө түмсэ илигэ. Холобура, 2012 сыллаахха 30, 2015 сыллаахха 46, 2018 2020 сыллаахха муҥутаан 77 киһи эбит. Быйылгы тэрээһин 13 улуус уонна Дьокуускай куораттар маастардарын хапта.

14-с төгүлүн ыытыллар «ДАРХАН УУС» Саха сирин тимир уустарын сүрүн түһүлгэтэ норуот маастара, Саха Өрөспүүбүлүкэтин тимир уустарын сойууһун бочуоттаах бэрэссэдээтэлэ, Духуобунас академиятын академига, СӨ культуратын үтүөлээх үлэһитэ, П.А. Ойуунускай аатынан судаарыстыбаннай бириэмийэ лауреата, Саха Өрөспүүбүлүкэтин, Таатта улууһун уонна Баайаҕа нэһилиэгин ытык киһилэрэ Борис Федорович Неустроев-Мандар Уус 80 cааһыгар ананна.

Дьүүллүүр сүбэҕэ аан дойдутааҕы таһымнаах быһах быыстапкаларын хас да төгүллээх кыайыылаахтара, СӨ Ил Дарханын «Үлэ киһитэ» бириэмийэтин лауреата Сарыал Билюкин, Саха Өрөспүүбүлүкэтин тимир уустарын сойууһун бэрэссэдээтэлэ Роман Готовцев-Мындыр Уус, саха тимир уһаарар ньыматын сөргүтээччи уонна тарҕатааччы Александр Данилов-Хаҥыл Уус, Россия ойуулуур-дьүһүннүүр академиятын чилиэн-кэриспэндьиэнэ, СӨ Духуобунаска академиятын академига Дьулустаан Бойтунов уонна саха төрүт аһын сөргүппүт И.И. Тарбахов уһуйуллааччыта, «Тыгын Дархан» ресторан шеф повара Константин Матаннанов үлэлээтилэр. «Дэгиттэр быһах» хайысхаҕа тургутугу саҥа ньыманан Мэҥэ-Хаҥалас уустара Леонид Говоров уонна Елисей Баишев оҥордулар.

14-с төгүлүн ыытыллар Борис Федорович Неустроев-Мандар Уус 80 сааһыгар анаммыт «ДАРХАН УУС» Саха сирин тимир уустарын сүрүн түһүлгэтигэр Таатта улууһун Баайаҕа нэһилиэгиттэн Николай Егоров-Байаҕыын дириэктэрдээх «Мандар Уус» саха олоҕун кэлим музейауонна Прасковья Бурнашева салайааччылаах «Мандар Уус»Айылгы уонна айымньы киинэ ыалдьыттаатылар. Онон тэрээһин ыалдьыттара «Мандар Уус» музейыгар хараллан сытар аан дойдуга баар саамай улахан саха быһаҕын тутан-хабан көрөр, хаартыскаҕа түһэр кыахтаннылар. Ону тэҥэ Мандар Уус эт илиитинэн тутан-хабан оҥорбут боотур дуулаҕа куйаҕын, дархан батыйатын уо.д.а. биилээхтэрин кэрэхсээтилэр. Айылгы уонна айымньы киинэ оҥорбут быыстапкатын ол иһигэр саха саарына ойуулаабыт уруһуйдарын туруорда.

Ол да иһин, сылтан сыл «ДАРХАН УУС» Саха сирин тимир уустарын сүрүн түһүлгэтин көрө Туймаада хочотун эр бэртэрин сэргэ, чугастааҕы улуустартан тиийэ булчут, балыксыт, сылгыһыт, тутааччы идэлэлээх дьиҥнээх эр дьоно түмсэллэр.

***

Гаврил АНДРОСОВ,

«ДАРХАН УУС» Саха сирин тимир уустарын сүрүн быыстапкатын тэрийсээччи