Дьааҥы куоратын Хоптолоох сиригэр-уотугар сылгыһыт күнүгэр аналлаах улахан тэрээһин буолла

Муус устар 6 күнүгэр Дьааҥыбыт куоратын Хоптолоох сиригэр-уотугар сылгыһыт күнүгэр аналлаах улахан тэрээһин буолан ааста. Улууспут араас нэһилиэктэриттэн ыраахтан-чугастан 10 хамаанда выставкаҕа, атыыга уонна күрэхтэһиигэ уопсайа 50-ча сылгыны массыыналарга тиэйэн аҕалбыттар.

Улуус аҕа баһылыга Гаврил Ильич Чириков, Дьокуускай куораттан т/х министерствотын уонна улуустааҕы т/х управлениетын үлэһиттэрэ кэлэн көрдүлэр-иһиттилэр, хаһан даҕаны маннык элбэх сылгылаах тэрээһин Республика үрдүнэн буола илигин бэлиэтээтилэр.

Ол курдук убаһаларга, тыйдарга уонна бастыҥ киэргэтиилээх аттарга диэн выставка буолла, комиссия кэрийэ сылдьан тутан-хабан, кээмэйдээн көрдүлэр. Ол кэннэ, саамай сүрүн күрэхпит саҕаланна 10 хамаанда иккилии параннан бириэмэҕэ күрэхтэстилэр, хамаандаҕа 3 киһи уонна биир ат. Күрэх этаптара: ыҥыырдаах сүүрэн кэлэн аты ыҥыырдааһын, атынан сүүрдэн тиийэн турар мастарынан туора-маары хаамтарыы, эрэбэдэйи акка быраҕыы, эрэбэдэйи аттан быраҕыы, сиргэ сытар куулу ылан финишка илдьэн бочкаҕа угуу, этаптарга сылгыһыттар солбуйсан истилэр. Ыһыылаах-хаһыылаах күрэх түмүгүнэн Арыылаах хамаандата бастыҥ көрдөрүүлэннэ, иккис миэстэ Боронуктар, үһүс Табалаахтар.

Выставкалар уонна хамаанданнан эстафета түмүктэринэн кыайыылаахтарга харчыннан призтар, кубоктар, мэтээллэр уонна грамоталар туттарыннылар. Ону таһынан сылгыһыттар хаан-уларытар сыаллаах-соруктаах сылгыларын атастастылар уонна атыыластылар, Дьааҥыбыт сылгылара өссө күүһүрэн, кэҥээн-уһаан иһэллэригэр олус суолталаах эргиэн буолла.
Бу күн чэрчитинэн культура дьиэтигэр төгүрүк остуол буолла, Дьааҥы улууһун аҕа баһылыга Гаврил Ильич Чириков тэрээһин ситиһиилээхтик түмүктэнэн эрэринэн эҕэрдэлээтэ, бастыҥ сылгыһыттар араас наҕараадалары уонна махтал суруктары туттулар. Т/х министерствотын үлэһитэ доклад аахта, сылгыһыттарга туох көмө баар буолуон сөбүн уонна Саха Сирин үрдүнэн сылгы төбөтүн хаамыытын билиһиннэрдэ, Дьааҥылар эбэн иһэллэрин бэлиэтээн эттэ, эһиил манна республиканскай күрэҕи тэрийиэххэ диэн этии киллэрдэ.

Ол курдук Дьааҥыбыт улууһугар бастакы сылгыһыт күнүгэр аналлаах күрэх, сылгыһыттар уонна көрөөччүлэр биһирэбиллэрин ылла, тэрийээччилэр аныгыс сырыыга өссө үчүгэйдик оҥоруохпут диэн эрэннэрдилэр.
Сылгыһыттар аны сайын Дьааҥы куоратын улахан ыһыаҕар күөн көрсө, бар дьоҥҥо үрдүк үөрүүнү бэлэхтии мустуох буолан тарҕастылар, видеоматериал сотору кэминэн ютуб каналбар тахсыаҕа.

***

Эркин Эверстов, Дьааҥы к., 06.04.2021