Быйылгы Олоҥхо ыһыаҕар 75 волонтер үлэлиэҕэ

        Үөһээ Бүлүү улууһугар XV- өрөспүүбүлүкэтээҕи Олоҥхо ыһыаҕын тэрээһинин сүрүн үлэһиттэрэ, көмөлөһөөччүлэрэ ВОЛОНТЕРДАР буолаллар.

Кэнники кэмҥэ волонтер үлэтин хайысхата олус кэҥээтэ. Урукку кэмҥэ волонтердары бөх-сыыс хомуйааччылар диэн көрөр эбит буоллахтарына, ол билигин отой атын, үрдүк таһымҥа таҕыста. 

Билиҥҥи олох ирдэбилинэн оҕолор үксүлэрэ волонтер, баһаатай буоларга көхтөөхтөр.

          Ыытыллаары турар Олоҥхо ыһыаҕын тэрээһинин волонтердарыгар сыл устата  үөрэтэр семинардар, араас тэрээһиннэр, интэриэһинэй  көрсүһүүлэр тиһигин быспакка ыытылыннылар. Ол чэрчитинэн,  бу өрөбүллэргэ, бэс ыйын 11-12 күннэригэр, “Тускул” оҕо киинигэр волонтердары  үөрэтии улахан семинара ыытылынна.

Манна Саха республикатын добровольчество-ресурснай киинин салайааччыта, элбэх  улахан тэрээһиннэргэ уопуттаах үлэһит  –Айыллаан Васильевич Винокуров кэлэн, волонтердарга үөрэх ыытта.

Ону таһынан, Бүлүү куоратыттан ыччат уонна дьиэ кэргэн психологическай  киинин психологтара, Үөһээ Бүлүү улууһун үөрэҕириитин профилактическай киинин психологтара Чыбыкова Валентина Петровна, Антонова Айталина Капитоновна бэйэ-бэйэлэрин билсиһиигэ, хамаандаҕа үлэлээһиҥҥэ психологическай үөрэхтэри олус интэриэһинэйдик  ыыттылар.

Үөһээ Бүлүү улууһун киин балыыһатын медицинскай профилактика сиэстэрэтэ Тумусова Ольга Ивановна волонтердарга ыксаллаах быһыыга-майгыга бастакы көмөнү хайдах оҥорору кэпсээтэ. 

Улахан тэрээһиҥҥэ араас омуктар кэлэллэр ,онно кыратык да буоллар, омук тылын билэр наадатыгар омук тылын учуутала, “Тускул” оҕо киинин “Лингвомир” куруһуогун салайааччыта Волкова Мария  Егоровна уонна үөрэх салалтатын профориентация  отделын специалиһа,  монголия, омук тылын хайысхатын специалиһа Волков Гаврил Иосифович олус интэриэһинэйдик  ыыттылар.  

Онтон да атын оонньуулар, тэрээһиннэр  ыытылыннылар. 

Быйылгы Олоҥхо ыһыаҕар барыта 75 волонтер үлэлиэҕэ.          Волонтердары сүрүннээн салайыахтара- Саха республикатын добровольчество-ресурснай киинин салайааччыта  –Айыллаан Васильевич Винокуров, Үөһээ Бүлүүтээҕи ыччат киинин специалиһа, Саха Өрөспүүбүлүкэтин ыччат политикатын туйгуна Тимофеева Прасковья Анатольевна, СР уопсастыбаннай бириэмийэ “Суолдьут сулус” анал бэлиэлээх Николаева Алена Геннадиевна, Саха Өрөспүүбүлүкэтин ыччат политикатын туйгуна Ильина Саргылана Лукична уонна Павлов Дьулусхан Михайлович,  Саха республикатын добровольчество-ресурснай киин специалиһа.

Үлэҕэ оҕолор босхо, бэйэлэрин ис санааларыттан күүс-көмө буоларга кыһаллыахтара. Хас биирдии оҕо улахан тэрээһин  этэҥҥэ ааһарыгар сэмэй кылаатын киллэрсэр соруктаах.

Ол курдук, бүгүн, бэс  ыйын 13 күнүттэн,  уопсай тэрээһиннэргэ  репетицияҕа, печатнай продукцияҕа, анал территориялары ыраастааһыҥҥа, онтон да атын  үлэҕэ көмөҕө үлэлээтилэр. Хас күн аайы саҥаттан саҥа графигынан волонтердар көмөҕө тахсыахтара, күүс-көмө буолуохтара.

***
Саргылана ИЛЬИНА