БУ СЫЛГА ЭРЭЛБИТ УЛАХАН

2023 сыл түмүктэнэн саҥа 2024 үктэнэн номнуо иккис ый ортолоото. Бу кэмҥэ тэрилтэлэр, хаһаайыстыбалар ааспыт сыллааҕы үлэлэрин түмүгүн мунньан, чуолкайдаан  үүммүт сылга былааннарын оҥостон үлэлээн эрэллэр. «Туймаада Агрохолдинг» АУо тэрилтэлэрэ сылларын түмүгэ куһаҕана суох. Ол курдук  сыл түмүгүнэн хаһаайыстыбаларга барыта 3708 ынах сүөһү баар. Онтон ыанара 1770 төбө. Бу сылга былаан быһыытынан уопсай ынах сүөһү ахсаанын 3824 төбөҕө тириэрдиэхтээхтэр. Онтон ыанар ынаҕын 1874 төбөҕө диэри. Ааспыт сыллаахха ыанар ынах ахсаана 1770 эбит. Онон агрохолдинг сүрүн сыала үүт бородууксуйатын улаатыннарыыга туһаайыыта сыыйа-баайы олоххо киирэр кэскиллээх. Агрохолдинг үрдүнэн биир ынахтан үүтү ыаһын сылын аайы үрдээн иһэрэ бэлиэтэнэр. Холобур, 2018 сыллаахха биир ынахтан ортотунан 2510 киилэ үүт ыаммыт буоллаҕына сылын аайы үрдээн ааспыт сыллааҕы түмүгүнэн 3418 киилэ үүт ыаммыт. Онтон бу сылга ити көрдөрүүнү 3424 киилэҕэ тиэрдэр сорук турар.

Куурусса иитиитинэн агрохолдинг икки тэрилтэтэ дьарыктанар. Ол курдук «Нерюнгритааҕы көтөрү иитэр фабрика»  уонна «Новай сопхуос» АУо. Бу икки тэрилтэҕэ уопсайа 380866 куурусса баара биллэр. Ол иһигэр 179701 сымыыттыыр куурусса уонна эт хайысхалаах 161659  бройлер бааллар. Ааспыт сыл түмүгүнэн барыта 54 мөл 328 т сымыыт ылыллыбыт. Ити ааспыт сыллары кытта тэҥниир буоллахха сылын аайы улаатыы баара  бэлиэтэнэр. Онтон эти ылыы кыратык түспүт. 2023 сылга барыта 2368 т куурусса этэ оҥоһуллубут. Быйылгы сылга ити көрдөрүүнү улаатыннаран  2478 т тириэрдиэхтээхтэр.

Хатастааҕы сибиинньэ итэр комплекска билиҥҥи туругунан 4067 сибиинньэ турар. Онтон ийэ сибиинньэтэ 453. Ааспыт сыллаахха барыта 598 т сибиинньэ этэ оҥоһуллубут.

Агрохолдинг хаһаайыстыбалара сиргэ, бааһыналары кэҥэтии, тупсарыы үлэлэригэр болҕомтотун күүскэ уураллар. Ол курдук ааспыт сыл көрдөрүүтүнэн бары хаһаайыстыбаларга бааһына иэнэ 3112  гектарга тиийбит. Урукку сыллары ылан көрдөххө, холобур 2018 сыллаахха уопсайа 1955 га сир баар буоллаҕына сылын аайы бааһыналар сөргүтүллэн, кэҥэтиллэн ити сыыппараҕа тиийбиттэр. Бу сылга былаан быһыытынан ыһыы ыытыллар сирин иэнин 3262 гектарга тириэрдиэхтээхтэр. Былырыын кыстыкка 8120 т сиилэстээх, 2497 т сенажтаах, 8482 т оттоох киирбиттэр. Быйылгы былаан өссө үрдүк. 2024 сылга  9292 т сиилэс, 3639 т сенаж,7239 т от бэлэмнэнэрэ сабаҕаланар.

Биллэн турар ыарахаттар, туолбатах былааннар суох буолбатахтар бааллар. Ол да буоллар сүрүн производственнай көрдөрүүлэр сыл аайы тупсан иһэллэрэ көстөр. Онно агрохолдинг салалтата, исписэлиистэр, хаһаайыстыбалар хас биирдии үлэһиттэрэ биир санааҕа кэлэн үлэлээн ити туруоруллубут соруктары олоххо толору киллэрэр кыахтаахтар.

***

Прокопий Хабаров