БИҺИГИ КИЭН ТУТТУУБУТ

Хаҥалас улууһугар баар 2-с Малдьаҕар нэһилиэк төрүккүттэн үлэни кыайа-хото тутар дьонноҕунан биллэр. Ол да иһин буолуо, билигин бу нэһилиэккэ кииннэнэн олорор “Бөртө” сылгы собуота үлэтин хабаана киэҥинэн, сылын аайы ситиһэр көрдөрүүлэринэн саха сиригэр киэҥник биллэр.

Онно бу хаһаайыстыбаҕа үлэлии сылдьар ыанньыксыттар, сүөһү үлэһиттэрэ, сылгыһыттар, отчуттар-масчыттар бары үлэҕэ бэриниилээхтэрэ, кыайыгастара сүрүн оруолу ылара буолуо.

Биир оннук киһинэн, олох оҕо эрдэҕиттэн ынах сүөһүнү көрүү-истии курдук ыарахан үлэҕэ эриллэн-мускуллан билигин да ол үлэттэн илиитин араарбакка үлэлии сылдьар Валентина Ильична Трофимова буолара буолуо диэтэхпинэ хаһаайыстыба үлэһиттэрэ бары сөпсөһөллөрө буолуо.  

Валентина Ильична 1959 сыл сэтинньи 28 күнүгэр элбэх оҕолоох ыанньыксыт дьиэ кэргэнигэр бастакы кыыс оҕонон төрөөбүтэ. Ийэтэ Вера Дмитриевна, аҕата Илья Спиридонович колкуос, сопхуос төһүү үлэһит дьоно иккиэн ыанньыксыттыыр буоланнар, Валентина кыра эрдэҕиттэн хотонунан, сайылыгынан сылдьан сүөһү үлэтигэр сыстан улаатан, оскуоланы бүтэрээт тута сопхуоска ийэтин-аҕатын туйахтарын хатаран ыанньыксытынан киирбитэ.

Оччолортон “Куоһаҕас” фермата үлэтэ таһаарыылаах буолан үлэҕэ ураты сыһыан олохтоноро. Эдэр киһи онтон саллыбатаҕа. Илиитин ньыппарынан ыарахан үлэттэн толлубакка түһүнэн кэбиспитэ. Манна кини оҕо сылдьан дьонугар илии-атах буолбута төһүү буолбута. Үлэһит эдэр кыыс кыайыгас-хотугас буолан үлэтэ да түмүктэри биэрэн барбыта. Оччолорго Валентина биир ынахтан ортотунан 3000 киилэ үүтү ыан “Молодой гвардеец” диэн мэтээлинэн наҕараадаланан үрдүк кирбиилэри ылыыга кынаттанан үлэни өссө тэтимирдэр сыаллаах ылсан барбыта. Ити быыһыгар Валентина Ильична нэһилиэк уопсастыбаннай олоҕор актыыбынайдык кыттан барбыта.

Ол курдук коммунистическай партия чилиэниэн талыллан дэриэбинэ табаарыстыы суутун чилиэнинэн, нэһилиэк сэбиэтин хас да төгүллээх дьокутаатынан талыллан дьонун туһугар элбэхтэ сүүрбүт-көппүт киһи. Валентина оччолортон эдэр дьону иитиигэ, үлэҕэ такайыыга быһаччы кыттыһан билигин да онно үлэлэһэр.

Билигин да “Куоһаҕас” ферматыгар старшайынан үлэлии сылдьар. Бэйэтин үлэтинэн эдэрдэргэ холобур буолар. Ол курдук 2018, 2019 сылларга киниэхэтуттарыллыбыт хас биирдии ынаҕыттан 3000 киилэ үүтү ыан үрдүк кирбиини ситистэ.

Валентина Ильична өр сыллаах үлэҕэ ситиһиилэрэ сыаналанан тыа хаһаайыстыбатын туйгуна бэлиэнэн, тыа хаһаайыстыбатын бочуоттаах үлэһитэ аат иҥэриллэн,тыа хаһаайыстыбатын, улуус, нэһилиэк, хаһаайыстыба грамоталарынан, хайҕал суруктарынан наҕараадаланна. Валентина олоххо актыыбынай көрүүлээх буолан нэһилиэккэ буолар тэрээһиннэргэ барытыгар кыттар, бииргэ үлэлиир дьонун угуйар.