Биэнсийэ сөпкө ааҕыллыбытын хайдах бэрэбиэркэлиибит?

Биэнсийэни аныырга сыыһалары хайдах булуохха сөбүн туһунан «РИА Новости» ааҕыныстыбаҕа Бэрэсидьиэн академиятын урбаан, үлэ уонна корпоративнай быраабын кафедратын доцена Мария Кутарова кэпсээтэ.

Кини этэринэн, Социальнай пуонда (СФР) тус кабинетыгар эбэтэр «Госуслуги» порталга дааннайдары: үлэ ыстааһын, төлөммүт страховой кылааттар суумаларын уонна да атын көрдөрүүлэри мэлдьи бэрэбиэркэлиир наадалаах. Ону таһынан, ыстаас туһунан электроннай дааннайдары үлэ киниискэтигэр, дуогабардарга, дохуот туһунан ыспыраапкаларга, байыаннай билиэккэ уонна да атын докумуоннарга баар суруйуулары кытта тэҥнээн көрөр туһалаах.

Өскөтүн биэнсийэлээх харчыта сөпкө ааҕыллыбытыгар саарбаҕалыыр буоллаҕына, Социальнай пуондаттан биэнсийэ анаммытын туһунан быһаарыы куоппуйатын толору ааҕыытын кытта, ону тэҥэ тус сирэй счеттан  выписканы көрдүүрүгэр эспиэр Кутарова сүбэлиир. Ол кэннэ манна баар дааннайдары бэйэтин докумуоннарын кытта тэҥнээн көрүөхтээх.

Сыыһалар көһүннэхтэринэ, пуондаҕа бэрэбиэркэни ыытарга уонна хат ааҕыыны  оҥорорго көрдөһүүлээх сайабылыанньаны суругунан биэрэргэ  сүбэлииллэр. Өскөтүн аккаастаатахтарына — борокуратуураҕа эбэтэр суукка үҥсүөххэ сөп.

Санаттахха, муус устар 1 күнүгэр социальнай биэнсийэ 6,8 %-нан үрдээбитэ.