БИҺИГИ КИЭН ТУТТУУБУТ Лукина Лариса Дмитриевна

Тыа хаһаайыстыбатын салаатыгар сопхуос саҕаттан илиилэрин ыһыктыбакка биир сиргэ үлэлии сылдьар удьуор үлэһит дьон тыа сиригэр аҕыйаҕа суохтар. Кырдьык саас да ыраатан билигин сорохторо төһө да уурайдаллар хонтуоранан, хотонунан сылдьан сүбэ-ама биэрэ сылдьаллар. Оннук дьон урукку тутулларын соччо ыспакка хаалбыт хаһаайыстыбаларга, холобур «Туймаада» Агрохолдинг хаһаайыстыбаларыгар билигин да элбэхтэр.

Лариса Дмитриевна Лукина олох эдэр сылдьан 40 сыллааҕыта оччотооҕу ыччат суолунан «Булгунньахтаах» сопхуоһугар, билиҥҥитэ «Бөртө сылгы собуота» хааччахтаммыт эппиэтинэстээх тэрилтэҕэ ыанньыксытынан киирэн баран билигин да үлэлии сылдьар. Ол тухары үлэлиир тэтимин ыһыктыбакка, өссө күүһүрдэн, көрдөрүүлэрин тупсаран баччаҕа кэллэ. Манна бэлиэтээн ааһыахха наада, билигин да бу хаһаайыстыбаҕа Лариса Дмитриевна курдук ыанньыксыт, ыччат сүөһүнү көрөөччү дьон бааллар. Баҕар ол да иһин буолуо, уопсайынан бу дойдуга бары кэриэтэ удьуор үлэһит дьон уутуйан олохсуйбут сирдэрэ, хаһаайыстыба көрдөрүүлэрэ тэтимин ыһыктыбакка биир кэм туруоруллубут соруктарын толорон тупсан иһэр.

Холобур, хаһаайыстыба биэс сыллаах үлэтин ылан көрүөххэ:

Сылгы ахсаана 2023 сыллааҕы көрдөрүүнэн 1057, биэтэ 561 төбөҕө тиийбит., онтон ынаҕын ахсаана 1160-ҥҥа тиийбит. Биир фуражнай ынахтан 3150 киилэ, племенной ынахтан 3682 киилэ үүт ыаммыт. Ити аҕыйах көрдөрүүнү ылан суруйдубут. Дьэ манна Лариса Дмитриевна үлэтин кыһата кырата суох.Кини курдук киһинэн хаһаайыстыба, нэһилиэк, улуус киэн туттуон туттар.

Лариса Дмитриевна “Мондурах” ферматын старшайа. Бу ферма ыанньыксыттара 120 ынаҕы көрөн тураллар. Ааспыт сыллааҕы чахчыларынан бу фермаҕа турар хас биирдии ынаҕыттан ортотунан 3200 киилэ үүтү ыабыттар. Билиҥҥи кэмҥэ үрдүк көрдөрүү. Итини ситиһии элбэх сыраттан, биллэн турар уопуттан тахсара өйдөнөр. Дьэ ити көрдөрүүнү ситиһии ылыллыытыгар  Лариса Дмитриевна курдук уопуттаах ыанньыксыттар сүбэлэрэ-амалара, көмөлөрө кырата суох.

“Туймаада” Агрохолдинг АУо хаһан тэриллиэҕиттэн сүрүн болҕомтону сүөһүнү хаачыстыбалаах, иҥэмтиэлээх аһылыгынан хааччыйыыга ууран, бу сылларга хаһаайыстыбалар бааһынаны кэҥэтиигэ, быраҕыллыбыт сирдэри чөлүгэр түһэриигэ, ходуһаны тупсарыыга күүскэ үлэлэстилэр. Ол түмүгэр 2019 сылтан агрохолдинг хаһаайыстыбаларыгар 1753 гектар бааһына чөлүгэр түһэриллибит, 644 га ходуһа тупсарыллыбыт. Онон хаһаайыстыбалар сүөһүттэн ылар бородууксуйаларын сылын аайы үрдэтэ тураллар. Ол түмүгүнэн Лариса Дмитриевна курдук уопуттаах ыанньыксыттар 3000-лаах кирбиини куоһаран өссө үрдүк кирбиини ыларга үлэлии сылдьаллар.