Бэйэм кэмим кэрэхсэнэр суруйааччыта

Бу күннэргэ Ньурба улууһугар ыытыллар «Айар күннэрин» биир сэргэх тэрээһининэн биллэр суруналыыс, суруйааччы Борис Павлов-Кэм Ньурба ааҕааччыларыгар ыалдьыттыыр уонна саҥа тахсыбыт «Өйбөр туппут куоратым»* кинигэтин  биһирэбилэ буолуохтаах. Саха ааҕааччытыгар Борис Павлов аата ордук кэнники сылларга иһиллэр буолла.

Кини суруйуулара ааспыт кэми, бэйэтин кэмин көлүөнэтин кырдьыгын аһаҕастык суруйарынан кэрэхсэтэр суруйааччы.Ааттыын да «Кэм» дэммит, ыччат дьоҥҥо анаан таһаарар сурунаала эмиэ «Кэм»диэн ааттаах.

2022 сыллаахха суруйбут «Кэмҥин түһэн биэримэ» сэһэнэ, «Не предать время свое» нууччалыы тылбаастанан, Бүтүн Арассыыйатааҕы  Василий Белов аатынан аныгы кэм бастыҥ сэһэнэ  ааттанан, литературнай  бириэмийэни ылбыта.
Суруйааччы бу кинигэтигэр бэйэтин көлүөнэтин олоҕун уус ураннык бу баардыы аһаҕастык кэпсээн ааҕааччы чугастык ылыммыт.

Борис Павлов өссө 1995 сыллаахха суруйбут бастакы кинигэтэ «Бэйэм кэммэр командировка»диэн ааттанан, тус бэйэм олус чугастык ылынан, ыскааппар быыллыйан турбакка, кэмиттэн кэмигэр ылан ааҕар кинигэм буолбута.Астыммытым, интервью быһыытынын киирбит саха норуотун биллэр дьоно:-Ойуунускай тыыннаах ситимэ Сардана Платоновна, Багдарыын Сүлбэ, биир дойдулааҕым К.Дм.Уткин уо.д.а атын эйгэҕэ биллибит дьон олоҕу анаарыыларын ,кэрэхсэтэр  кэпсэтиилэрэ аһаҕастык суруллан  ааҕааччыны сэргэхсэппитэ.

Ону сэргэ суруналыыс Борис Павлов оччотооҕу дьалхааннаах 80-с сыллар тустарынан, студеннар хамсааһыннарын аһаҕастык эдэркээн студентка Вера Макаровалыын интервьютугар суруллубута өйбөр хатанан  хаалбыта, олох сыаннастарын толкуйдатар, санаарҕатар түгэннэр бэрт судургу тылларынан, ол эрэн киһи сүрэҕин кылын таарыйардыы суруллан өйгө санааҕа баччааҥҥа дылы сырыттаҕа.

Быһатын эттэххэ,  ааҕааччыга суруналыыс быһыытынан олус туһалаах интэриэһинэй билигин да, төһө да кэм кэрдии ааспытын кэннэ, туһалаах толкуйдатар «командировка» этэ.
Хоһоонньут быһыытынан Борис Павловы ураты истииллээх, бэйэтин санаатын аһаҕастык ийэ тылынан истиҥник, итэҕэтиилээхтик суруйар поэт быһыытынан сыаналыыллар. «Билинии» хоһоонугар эппитинии

«Миэнэ тылларым барыта сүрэхтэн,

Сып-сырдык,ып-ыраас,
Сып -сылаас, «Ийэ сир» диэн
үрэхтэн…»- уонна биллэн турар турар кырдьыгы, көҥүл буолууну өрө тутар айымньылар.

Олох кырдьыгын хайдах баарынан, аһаҕастык ааҕааччыга тиэрдэр, кэм, бириэмэ суурайар түгэннэрин, ааспыт дьон дьылҕата долгутарын, хас биирдии история кэннигэр дьон олоҕо турарын сыаналаан, ааттарын үйэтиппит уонна үрдэппит  ураты талааннаах суруйааччы Борис Павлов дьон-сэргэ билиниитин ылбыт айар үлэҥ аартыга алгыстаах, ааҕааччы дууһатын долгутар, толкуйдатар суруйууларыҥ мэлдьи да кэрэхсэтэ, соһута турдуннар.

***

Мария Николаева, Ньурба хаһыат уопсастыбаннай кэрэспэндьиэнэ