Арассыыйа Дьоруойа Александр Находкины Уус Алдан улууһун дьоно-сэргэтэ өрө көтөҕүллэн туран көрүстэ

Александр Егорович Находкин силис тардыбыт, өбүгэтин сиригэр – Уус Алдан улууһун Бороҕон нэһилиэгэр биир дойдулаахтара Улуу Кыайыы болуоссатыгар оҕолуун-уруулуун мустан уруйдуу көрүстүлэр.

Кинини улуус баһылыга Василий Алексеев арыаллаан, төрүттэрэ олорон ааспыт ытык миэстэлэрин көрдөрдө, билиһиннэрдэ. “Түмсүү” норуот айымньытын киинигэр көрсөн, аал уоту оттон алгыстарын тиэртилэр, нэһилиэнньэ олохтоохторун, аймахтарын көрсөн олус долгуйда. Биир дойдулаахтара истиҥ эҕэрдэлэрин тиэртилэр, кининэн киэн тутталларын биллэрдилэр. Бу туһунан улуус дьаһалтатын пресс-сулууспата иһитиннэрэр.

Салгыы Тойон Мүрү туонатыгар биир дойдулаахтарбыт Аҕа дойду сэриитигэр аттаналларыгар тохтоон, дойдуларын кытта бырастыыласпыт ытык сирдэригэр – Хараҕа Төрдүгэр анал байыаннай дьайыы кыттыылаахтара көрүстүлэр. Нэһилиэк Далбар Хотуттара сахалыы сиэринэн кымыстаах алаадьынан айах туттулар, улуус бэтэрээннэрин Сэбиэтин бэрэссэдээтэлэ Иван Колодезников ытык сир туһунан билиһиннэрдэ.

Бороҕон бөһүөлэгэр киирэн баран, маҥнай анал байыаннай дьайыыга хорсуннук олоҕун толук уурбут биир дойдулаахпыт Василий Данилов искибиэригэр сылдьан тыыннаах сибэкки дьөрбөтүн уурда.

Салгыы “Швейнай патриот” волонтердар сыахтарыгар уонна анал байыаннай дьайыы киинигэр сылдьан үлэлэрин билистэ, сүбэлэри биэрдэ.

Ол кэннэ анал байыаннай дьайыы кыттыылаахтарын кытта көрсөн кэпсэттэ, олохторун-дьаһахтарын билистэ. “Ийэ дойдубут инникитин туһугар бэриниилээх дьон буоларгыт быһыытынан, дойдубут сайдарын туһугар төһүү күүс буолуоххут» — диэн эрэнэрин биллэрдэ.

Көрсүһүү сүрүн чааһа В.В.Никифоров — Күлүмнүүр аатынан култуура дыбарыаһыгар ыытылынна. Дыбарыас таһыгар Дьоруойу анал байыаннай дьайыы кыттыылаахтара арыаллаан кэлбиттэрин икки сүүстэн тахса киһи ытыс дохсун тыаһынан уруйдуу көрүстэ.

Дьоруойу чиэстиир чаас улуус баһылыга Василий Алексеев эҕэрдэ тылынан саҕаланна. Салгыы улуус дьокутааттарын муннаҕын Сэбиэтин бэрэссэдээтэлэ Иннокентий Аммосов, Бороҕон нэһилиэгин баһылыга Константин Копырин, улуустааҕы анал байыаннай дьайыы кыттыылаахтарын түмсүүтүн салайааччыта Андрей Карпов, Мүрү 1-кы нүөмэрдээх орто оскуолатын 10 кылааһын үөрэнээччитэ Евгений Бочкарев, Майаҕас орто оскуолатын 7 кылааһын үөрэнээччитэ Сандаара Ушницкая истиҥ эҕэрдэлэрин тиэртилэр. Оҕолор бэйэлэрин илиилэринэн чочуйан оҥорон таһаарбыт Олоҥхо бухатыырын бу үлэ эйигин өрүү араҥаччылаатын, харыстаатын диэн туттарбыттара Дьоруойу ордук долгутта.

Көрсүһүүгэ кыттыбыт дьон Дьоруой бойобуой суолун, хорсун быһыытын, тылын-өһүн долгуйан туран иһиттилэр, чугастык ылыннылар, ис сүрэхтэриттэн махтаннылар.

Александр Егорович бу Уус Алдаҥҥа сылдьыбыт сырыытын устатын тухары дьоҥҥо истиҥ сыһыанын, амарах санаалааҕын, боростуой, көнө майгытын бэлиэтии көрдүлэр итиэннэ дойду сайдарын туһугар туох баар өйүн-санаатын, кыаҕын барытын ууруо диэн эрэнэллэрин эттилэр.

Арассыыйа Дьоруойа Александр Егорович Находкин Сирияны, Ливияны, Орто Африканы уонна анал байыаннай дьайыыны ааспыт, сэрии алдьархайын этинэн-хаанынан билбит, модун санаалаах саха хамандыыра.

Александр Егорович буор куттаах, өбүгэ ситимнээх киһи. Кини аҕатын өртүнэн Бороҕон Сыҥааҕыттан, саха омук судаарыстыбаннаһын түстээбит, бөдөҥ уопсастыбаннай-бэлитиичэскэй диэйэтэл Сэһэн Ардьакыаптан сыдьааннаах. Ийэтин өртүнэн Аҕа дойду Улуу сэриитин Албан ааттаах буойуттара, хорсун-хоодуот Александр уонна Михаил Чусовскойдартан төрүттээх.

Донбаска нуучча норуотун дьылҕата быһаарыллар кэмигэр кини туора туран биэрбэтэҕэ. Норуотун көмүскүүр сыаллаах, бэйэтин баҕатынан сэриигэ барбыта. Мантан саҕаламмыта уһун унньуктаах, ыар бойобуой суола. Сирияҕа, Ливияҕа, Киин Африкаҕа тиийэ сылдьан, кини өлүү дьуоҕатыттан мүччү туттаран, хаста даҕаны иккис тыыннаммыта.

Бахмут иһин кырыктаах кыргыһыыга хамандыырдарын сүтэрбиттэригэр, Александр Егорович уолуйбакка, взводу, онтон 1300 кэриҥэ киһилээх ротаҕа тиийэ салайбыта. Кини сатабыла, модун санаата уонна байыастарын туһугар кыһамньыта кыайыыны аҕалбыта. Ол иһин кинини «Эр санаа» үһүс уордьанынан, «Хорсунун иһин» иккис мэтээлинэн бэлиэтээбиттэрэ. Бүгүн кини Арассыыйа Дьоруойа — норуот киэн туттуута.

***

Ааптар: Людмила Попова, Саха сирэ