Амма нэһилиэгин “БАТЫС” түмсүү ыччаттара соҕотох ийэ үлэтин чэпчэттилэр

Ийэ сылын бэлиэтээһин чэрчитинэн өрөспүүбүлүкэ үрдүнэн “Поможем маме” акция ыытыллар. Амма нэһилиэгин “БАТЫС” түмсүүтүн үлэҕэ көхтөөх ыччаттара биир бастакынан кыттыстылар.

Волонтерскай хамсааһын соҕотох, элбэх оҕолоох ийэлэргэ көмөлөһөр сыаллаах. Тыа сирин олохтоохторун сааскы түбүктэрэ баһаам буоллаҕа. Кырыыһаттан хаар түһэрии, ыраастааһын, булууска муус угуута, мас хайытан саһааннааһын – соҕотох дьахтар кыайбат үлэтэ элбэх. Онон маннык акция ыытылларын истэннэр биир бастакынан Амма нэһилиэгин ыччаттара Ульяна Петрова, Туяра Окоемова, Аина Неустроева, Иннокентий Слепцов, Иван Шамаев, Давид Федоров көмөлөһөр баҕаларын биллэрбиттэрэ. “БАТЫС” түмсүүлэр, уопсайынан хаһан баҕарар аһымал, көмө акциялары, хамсааһыннары өйүүллэр. Бу сырыыга элбэх оҕолоох соҕотох ийэ Күннэй Федороваҕа мас хайытан саһааннаан биэрэннэр улахан көмөнү оҥордулар. Кинилэртэн холобур ылан атын нэһилиэктэр, түмсүүлэр эмиэ үтүө дьыалаҕа кыттыһыахтара диэн эрэнэбин. Оттон көмөҕө наадыйар, сайаапка биэриэн баҕалаах ийэлэр 89241700419 нүөмэргэ билсиэхтэрин сөп,- диэн “Россия ийэлэрэ” общественнай хамсааһын Амма улууһугар салаатын биир актыыбынай кыттааччыта, акцияны сүрүннээн үлэлэһэ сылдьар Матрена Кононовна Карманова кэпсиир.

***

“Амма олоҕо” хаһыат.