ААСПЫТ СЫЛГА ҮЛЭ ТҮМҮГЭ ХАЙДАҔЫЙ?

2024 сыл түмүктэнэн саҥа 2025 үктэнэн номнуо иккис ый ортолоото. Бу кэмҥэ тэрилтэлэр, хаһаайыстыбалар ааспыт сыллааҕы үлэлэрин түмүгүн мунньан, чуолкайдаан  үүммүт сылга былааннарын оҥостон үлэлээн эрэллэр. «Туймаада Агрохолдинг» АУо тэрилтэлэрэ сылларын түмүгэ куһаҕана суох. Ол курдук  сыл түмүгүнэн хаһаайыстыбаларга барыта 3388 ынах сүөһү баар. Онтон ыанара 1735 төбө. Ааспыт сыллаахха ыанар ынах ахсаана 1730 эбит буоллаҕына аҕыйах төбөнөн элбээбит. Уопсайынан агрохолдинг үлэтин сүрүн сыала ыанар ынах ахсаанын элбэтэн үүт ыаһынын улаатыннарыыга сытар. Холобурун 2020 сыллаахха ыанар ынах ахсаана 1667 төбөҕө тэҥнэһэр буоллаҕына  ааспыт сыл түмүгүнэн 68 төбөнөн эбиллии бэлиэтэммит.  Агрохолдинг үрдүнэн биир ынахтан үүтү ыаһын сылын аайы үрдээн иһэрэ бэлиэтэнэр. Холобур, 2018 сыллаахха биир ынахтан ортотунан 2510 киилэ үүт ыаммыт буоллаҕына, сылын аайы үрдээн ааспыт сыллааҕы түмүгүнэн 3021 киилэ үүт ыаммыт.

2024 сылга төрүөҕү ылыы 85% тэҥнэстэ. Ол иннинээҕи сылга ити көрдөрүү 82% эбит. Онтон 2020 төрүөҕү ылыы 73% эбитин ылан көрдөххө төрүөх ылыыта үрдээн иһэр.

“Туймаада” Агрохолдинг АУо биир дьарыга сылгыны иитии. Бу хайысханан икки хаһаайыстыба дьарыктанар. Ол курдук “Бөртө сылгы собуота” ХЭТ уонна таатта улууһугар баар  “Победа” ХЭТ сылгы салаатыгар ылсан үлэлииллэр. Бу икки хаһаайыстыбаҕа барыта 1411 сылгы, ол иһиттэн биэтэ 779 төбө. Ааспыт сылга кулуну тыыннаахтыы иитии 63 %-ҥа тэҥнэспит.

Куурусса иитиитинэн агрохолдинг икки тэрилтэтэ дьарыктанар. Ол курдук «Нерюнгритааҕы көтөрү иитэр фабрика»  уонна «Новай сопхуос» АУо. Бу икки тэрилтэҕэ уопсайа 312255 куурусса баара биллэр. Ол иһигэр 180244 сымыыттыыр куурусса уонна эт хайысхалаах 132011  бройлер бааллар. Ааспыт сыл түмүгүнэн барыта 48 мөл 291 т. устуука сымыыт ылыллыбыт.

“Туймаада” Агрохолдинг АУо бородууксуйаны үрдэтии аһылыктан тутулуктааҕын быһыытынан сиргэ, бааһыналары кэҥэтии, тупсарыы үлэлэригэр болҕомтотун күүскэ уурар. Ол курдук 2019 сылтан бары хаһаайыстыбаларга 1753 гектар бааһына чөлүгэр түһэриллибит уонна 644 га ходуһа тупсарыллыбыт.. Ааспыт сайын уустуктардаах буолан сүөһү аһылыгын бэлэмнээһиҥҥэ төһө да мэһэй баарын үрдүнэн кыстыкка 5449 т сиилэстээх, 1207 т сенажтаах, 6943,2 т оттоох киирбиттэр. Билигин кыстык оройо, хаһаайыстыбалар биллэрэллэринэн кыстыгы туоруур аһылык баар.

Биллэн турар ыарахаттар, туолбатах былааннар суох буолбатахтар бааллар. Ол да буоллар сүрүн производственнай көрдөрүүлэр сыл аайы тупсан иһэллэрэ көстөр. Онно агрохолдинг салалтата, исписэлиистэр, хаһаайыстыбалар хас биирдии үлэһиттэрэ биир санааҕа кэлэн үлэлээн ити туруоруллубут соруктары олоххо толору киллэрэр кыахтаахтар.

***
«Туймаада» Агрохолдинг