Василий Павлович кэргэнинээн Фекла Васильевналыын 65 сыл дьоллоохтук олорон 8 оҕолоохтор, 33 сиэннээхтэр, 61 хос сиэннээхтэр. Бу күн өрөспүүбүлүкэбит бары муннугуттан оҕолоро, сиэннэрэ аҕаларын, эһээлэрин аатын үйэтитэн кинигэ таһаартарбыттарыттан олус үөрэн туран, бары тоҕуоруҺа муһуннулар.
Аҕа дойду сэриититтэн 1947 сыл сэтинньи ыйыгар Василий Павлович дойдутугар эргиллэн кэлэн, үлэ үөһүгэр умса түһэр. Кини биир үлэҕэ бэриниилээхтик 45 сыл бухгалтерынан харыс да халбарыйбакка биир сиргэ үлэлиир. Ол саҕанааҕы эдэр ыччакка үлэҕэ эрэллээх, эппиэтинэстээх буолуу холобурдарын көрдөрөн, колхуоһун, сопхуоһун сайдыытыгар, үлэһиттэр олохторо тупсарыгар улахан кылаатын киллэрбит киһинэн биллэр. Кини үлэтин тас өттүнэн ат айааһыыр, бултуур идэлээҕэ. Ону санаан оҕолоро, сиэннэрэ Аҕа Дойдуну көмүскээччилэр күннэринэн «Эдэр булчуттар күрэхтэрэ»- диэн сүрдээх интэриэһинэй тэрээһини үбүлээн ыыттылар. Ол курдук уолаттар оҕунан ыттылар, маамыкта быраҕан күрэхтэстилэр, булт суолун сонордостулар, булт тэрилин таайдылар, бириэмэҕэ булчут таҥаһын таҥыннылар, быыска автомат ыстылар. Дьэ, ол гынан 1 миэстэ Дархан Николаев-8-с кылаас үөрэнээччитэ, 2-с миэстэ Эрнест Яковлев 10 кылаас үөрэнээччитэ, 3-с миэстэ Гром Корнилов 10 кылаас үөрэнээччитэ буоллулар. Кыайыылаахтар харчы бирииһинэн, кубогынан, мэтээлинэн наҕараадаланнылар. Түгэнинэн туһанан Василий Павлович Меркурьев сыдьааннарыгар төрөөбүт дойдуларын олоҕор, ыччат иитиитигэр кыттыһа сылдьалларыттан махталбытын биллэрэбит.Үлэнэн улааппыт дьон биллэн турар талба талааннаах, туруу үлэһит ыччаттардаах. Маннык үтүө дьон баара кэлэр олох кэскилин, эрэлин саҕар.
Мария ЕФИМОВА
Оставить комментарий