Быыбар туһунан санаатын бу курдук үллэһиннэ:
— Быыбарга кыттыбат буолуохпун табыллыбат. 93 сааспар диэри биир даҕаны быыбары көтүтэ иликпин. Урут быыбар биир эрэ күн ыытыллара, ол үөрүйэҕинэн хайаан даҕаны маҥнайгы күн куоластыыбын.
Биһиги олохпут салайааччылартан эмиэ быһаччы тутулуктаах. Онон тугу даҕаны умнан туран дьон туһугар туруулаһар, кыһаллар, үлэлиир дьону талыахтаахпыт. Кыыллаахтар быыбарга өрүү көхтөөхтөр, ыччаппыт олоххо да, үөрэххэ даҕаны олус бэриниилээх, үлэттэн, уустуктан туора турбат.
Тус бэйэм хаһан баҕарар үлэни дьолунан ааҕабын. Аҕабыт сэрииттэн 1943 сыллаахха эргиллибитэ. Аҥаар атаҕа суох да буоллар тыыннаах эргиллэн кэлбитэ үөрүү, дьол этэ. Кэлээтин кытта сарсыҥҥы күнүттэн пиэрмэ үлэтигэр ыыттылар. Мин оччолорго оскуолаҕа саҥа киирэбин. Аҕабын кытта икки кыырыктаах тэлиэгэнэн звеноларга суорат, иэдьэгэй таһар этибит. Ити кэмтэн ыла үлэҕэ миккиллэн, үлэни дьолунан ааҕабын.
Кыыллаахтар оттоон-мастаан, сүөһү иитэн киһи буолбуппут. Биһиги нэһилиэк дьоно иитиилэринэн, өйдөрүнэн-санааларынан чопчу дьон. Дьоллоох олох – үлэ. Үлэни өрө туттахха эрэ киһи буолабыт. Онон быыбарга кыттыы дьиҥнээх олох инники соругун чаҕылхайдык туруорар, дьону түмэр. Быыбар хаһан баҕарар бырааһынньык кэриэтэ ааһар”, – диэн санаатын үллэстэр.
Бүтүн өрөспүүбүлүкэ, ону ааһан дойду киэн туттар киһитэ, үгүс көлүөнэни иитэн таһаарбыт ытыктабыллаах учуутал күн бүгүҥҥэ диэри ыччатыгар үтүө холобуру көрдөрө сылдьар. Валентина Спиридоновнаҕа чэгиэн туругу, кытаанах доруобуйаны баҕарабыт.
Оставить комментарий