Курс валют
$
92.26
0.33
99.71
0.56
Курс валют
Курс валют
$
92.26
0.33
99.71
0.56
Меню
Поиск по сайту

Үтүө холобур буолар дьиэ кэргэннэр

18.03.2022 09:55 0
Үтүө холобур буолар дьиэ кэргэннэр

Кулун тутар 17 күнүгэр Ньурбатааҕы ГТАС дьиэтигэр Владимир Иванович, Варвара Константиновна Саввиновтар бииргэ олорбуттара 55 сылларын – изумруднай, Валентин Николаевич, Валентина Михайловна Васильевтар кыһыл көмүс сыбаайбаларын үөрүүлээх бэлиэтээһинэ буолла.

Тэрээһин саҕаланыытыгар Марш Мендельсона музыкатынан пааралар хааман киирдилэр.
«Ньурба оройуона» МО баһылыгын социальнай боппуруостарга солбуйааччыта Анна Михайловна Уларова, «Ньурба куорат» СЭГХ салайааччыта Дьулустан Сергеевич Евсеев, «Күндээдэ нэһилиэгэ» МТ баһылыга Яков Евгеньевич Замятин үөрүүлээх тэрээһиҥҥэ кыттыыны ыллылар, эҕэрдэ тыл эттилэр. Судаарыстыбаннай турук аактатын суруйуу Ньурба оройуонунааҕы салаатын салайааччыта Альбина Ивановна Алексеева Владимир Иванович, Варвара Константиновна Саввиновтар изумруднай, Валентин Николаевич, Валентина Михайловна Васильевтар кыһыл көмүс сыбаайбаларынан, Кыһыл көмүс кинигэҕэ кэргэннии буолуу туоһу сурукка киирбиттэринэн эҕэрдэлээтэ.

Улуус баһылыгын социальнай боппуруоска солбуйааччыта Анна Уларова үбүлүөйдээх дьиэ кэргэттэргэ СӨ Ил Дархана А.С.Николаев илии баттааһыннаах эҕэрдэ суругун, улуус баһылыга Алексей Иннокентьев уонна Улуус сүбэтин бэрэссэдээтэлэ Сергей Евсеев ааттарыттан эҕэрдэ суруктары үөрүүлээх быһыыга-майгыга туттарда.

Владимирдаах Варвара бэйэ-бэйэлэрин сөбүлүү көрсөннөр, 1967 сыллаахха олунньу 15 күнүгэр олохторун холбоон, Хатаска саахсаланан, ыал буолаллар. Саҥа холбоспут эдэр дьон үөрэхтэрин бүтэрэн, Ньурбаҕа

«Күндээдэ» сопхуоска бэтэринээринэн, Владимир лесхозка ананан Ньурбаҕа кэлэн олохсуйаллар. Варвара Константиновна Ньурбаҕа кийиит буолан кэлиэҕиттэн Ньурбаны иккис дойду оҥостон олорор. Үс оҕону төрөтөн, атахтарыгар туруортаан, билигин дьоһун-мааны үлэһит, ыал буоланнар, төрөппүттэригэр сиэннэри, хос сиэннэри бэлэхтээтилэр.

Ыал аҕа баһылыга кыраайы үөрэтээччи, СӨ норуотун маастара, Дархан Уус Владимир Иванович эдэр эрдэҕиттэн күннээҕи түбүктээх үлэтин быыһыгар өбүгэлэрин үгэстэрин үйэтитиигэ, олохторун-дьаһахтарын үөрэтиигэ анаан дьарыктанар. Төрөөбүт дойдутун, дьонун-сэргэтин төрдүн-ууһун үөрэтэн, кырдьаҕастардыын кэпсэтэн үһүйээннэри-номохтору мунньарын түмүгэр тахсыбыт «Дойдум дьоно» диэн кинигэ ааптара буолар. Маны таһынан, Арассыыйатааҕы «Лесная новь» сурунаалга «Заслуженный лесовод, этнограф, народный умелец» Владимир Ивановичка аналлаах ыстатыйа, «Материальная и духовная культура народов Якутии в музеях мира» кинигэҕэ аата ааттанар, Саха сирин, олохтоох хаһыаттарга ыстатыйалара бэчээттэнэн тахсыбыттара.

Варвара Константиновна 1970 сыллаахха Дьокуускайдааҕы техникуму бүтэрэн Ньурбаҕа ананан кэлэр. 1976 с. Эдьигээҥҥэ ветбырааһынан, оройуоннааҕы Сэбиэккэ ГТАС сэбиэдиссэйинэн, архыыпка үлэлиир. Алексеевскай оройуон Ытык Күөлгэ ветвраЇынан, 1983-2006 сс. Ньурбаҕа маастарынан, халбаһы сыаҕар салайааччынан, механизированнай буойунаҕа, ликёро- водочнай сыахха салайааччынан, хонтуора коменданынан үлэлиир. 36 сыл үлэлээн баран, 1996 сынньалаҥҥа тахсан олорор. Саввиновтар кыргыттара Ньурбатааҕы поликлиникаҕа медсиэстрэнэн, Музыка үрдүкү оскуолатыгар иитээччинэн, уоллара Ил Түмэҥҥэ суоппарынан үлэлиир. Ини-бии сиэннэрэ Накыыҥҥа, атыттара экономист, юрист идэлэринэн үлэлииллэр.

Онтон Валентин, Валентина Васильевтар 1972 сыллаахха, оскуола кэнниттэн уоллаах кыыс холбоһон ыал буолаллар. Уон оҕону төрөтөннөр, Ньурбаҕа олохсуйаннар элбэх оҕолоох дьиэ кэргэн буолаллар.
Ыал аҕата Валентин Николаевич 1952, ыал ийэтэ Валентина Михайловна 1953 сыллааҕы төрүөхтэр. Иккиэннэрин төрөөбүт күнэ биир – сэтинньи 22 күнэ. Ыал аҕа баһылыга Валентин Николаевич 1971 сыллаахха ПосПоҕа оробуочайынан саҕалыыр, кэлин мас ууһунан, спорка методист-инструкторынан үлэлиир. Чөл олоҕу тутуһан, боксанан дьарыктанан, оройуон, өрөспүүбүлүкэ күрэхтэһиилэригэр оройуонун чиэһин чиэстээхтик көмүскүүр.

1978 сыллаахха Ленинскэй оройуон Сельхозтехника тэрилтэтигэр суоппарынан үлэҕэ киирэн үлэлиир. 1999 с. Ньурбатааҕы ОДьКХ тэрилтэтигэр күн бүгүнүгэр диэри уу баһааччы суоппарынан үлэлээн кэллэ. Үтүө суобастаах үлэтинэн «Гражданскай килбиэн» бэлиэ хаһаайына, ОДьКХ бэтэрээнэ, Ньурба оройуонун Бочуоттаах гражданина буолар.
Элбэх оҕолоох Герой-ийэ Валентина Михайловна 1988 сыллаахха «Ийэ килбиэнэ» I, II, III истиэпэннээх мэтээлинэн наҕараадаланар. Валентина Михайловна 1975 сыллаахха оройуоннааҕы Киин балыыһаҕа үлэҕэ киириэҕиттэн «Суһал көмөҕө» диспетчэринэн үлэлиир. Доруобуйа харыстабылыгар өр кэмҥэ үлэлээн, сыралаах үлэтэ сыаналанан СӨ Доруобуйа харыстабылын Бочуотунай грамотатынан бэлиэтэммитэ.
Валентина Николаевич, Валентина Михайловна оҕолоро үрдүк, орто анал, орто үөрэхтэнэн төрөөбүт дойдуларыгар, Дьокуускай куоракка үлэлииллэр. Ол курдук, Арассыыйатааҕы Ньурба оройуонунааҕы миграционнай пууҥҥа салайааччынан, Ньурбатааҕы 26 №-дээх ОГПС баһаарынай сулууспатыгар салайааччынан үлэлииллэр.Атыттар ИДьМ, баһаарынай чааска, сибээскэ, үп салаатыгар, поварынан, инженер-медтехнигинэн үлэлииллэр. Ыал аҕата Валентин Николаевич бүгүҥҥү тэрээһиҥҥэ: «Билигин биһигини оҕолорбут көрөн-истэн кыһалҕата суох олоробут. Сиэннэрбит үөрэхтэнэн, үлэһит буолалларыгар баҕа санаалаахпыт”, – диэн эттэ.Валентин Николаевич үлэтигэр бэриниилээх буолан, өссө да үлэлиир санаалаах.
Өр сыл олох олорон кэлбит дьоһун мааны дьиэ кэргэннэр орто саастаах, эдэр дьиэ кэргэннэргэ үтүө холобур буолаллар.

***

Источник: Ulus Media

Оставить комментарий    

Шиномонтаж Левша

СахаСтройПлит
Cтоматология 32
«Стоматология Все 32»