Сэргэ – соргулаах үйэ илдьитэ

Сэргэ орто дойду хайдахтаах да аргыардаах дьалхаанын туораан, тыл илбиһин иҥэринэн кэлбит ытык бэлиэ. Ыал соргута тосхойор кэмигэр сэргэ анньан айхаллыыр, Айыыларга сүгүрүйэн, кинилэртэн көрдөһөн алгыс түһэрэр.

Бүгүн Культура уонна искусство Арктикатааҕы институтугар «Үс сэргэ тойуга» диэн Саха сирин үс үрдүк үөрэҕин кыһатын улахан тэрээһинэ буолла. Саха государственнай тыа хаһаайыстыбатын академията, Чурапчытааҕы физическэй культура института, Культура уонна искусство Арктикатааҕы института былырыын саҕалаабыт «Үөрэҕирии уонна культура» диэн холбоһуктаах бырайыактарын салгыахтара.

Идэни таба талыыга оҕолору көҕүлүүр бастакы тэрээһин үксүн студеннар тэрийдилэр. Араас маастар кылаастары ыыттылар, сүбэлиир консультациялары биэрдилэр. Киин куорат оҕолоро ордук тыа хаһаайыстыбатын академиятын студеннара ас аналиһын оҥорор ньымаларын сэргээтилэр. Билиҥҥи кэмҥэ кыргыттар астыыр кэмпиэттэрин, пирожнайдарын хайдах оҥоруохха сөбүн быйыл академияҕа саҥа аһыллыбыт технология уонна салайыы колледжын преподавателлэрэ уонна студеннара көрдөрдүлэр. Кэрэ эйгэтигэр уруһуй ньымаларын АГИКИ студеннара бэрт судургутук быһаардылар. Чурапчыттан кэлбит студеннар эти-хааны чэбдигирдэр өбүгэ оонньууларын албастарыгар маастар кылаастары ыыттылар.

Тэрээһиҥҥэ Ил Түмэн сис кэмитиэтин бэрэсэдээтэлэ Феодосия Габышева кытынна.

Саха сирэ Арктика саамай улахан өлүүтүн ылар республика буоларынан, ыччат санаатын, ис туруктаах буолуутун иитиигэ бу сомоҕолуу хамсааһын улаханнык сабыдыаллыаҕа. Үрдүк культуралаах, үөрэхтээх, Арктиканы чахчы араҥаччылыыр эдэр дьон үүнэригэр үрдүк үөрэх кыһалара элбэх чинчийиини, бырайыактары ыытыахтара уонна олоххо киллэриэхтэрэ.

Бүгүҥҥү тэрээһин быйылгы үөрэх дьылын бастакы хардыыта, мантан инньэ холбоһуктаах бөлөхтөр улуус оскуолаларыгар тиийиэхтэрэ.

***

СГТХА общественноһы кытта үлэҕэ салаата