Курс валют
$
87.96
2.54
94.26
2.81
Курс валют
Курс валют
$
87.96
2.54
94.26
2.81
Меню
Поиск по сайту

Саха театрыгар “Ийэ сирэ” турда

11.05.2023 09:25 4
Саха театрыгар “Ийэ сирэ” турда

Улуу Кыайыы күнүн көрсө П.А. Ойуунускай аатынан  Саха академическай театрыгар Чингиз Айтматов “Ийэ сирэ” айымньытынан испэктээк Саха Өрөспүүбүлүкэтин  үтүөлээх артыыската Елизавета Потапова үбүлүөйүгэр ананна.

Бу испэктээги Саха театрын сценатыгар режиссер, РСФСР уонна Саха АССР үтүөлээх артыыһа Федот Потапов 1965 с. туруорбута. Федот Федотович сэрии кэмин оҕото, сэрии тулаайаҕа, ол ыарахан кэмнэри этинэн-хаанынан билбитэ. Аҕата сэриигэ барбыта, оттон ийэтэ хоргуйан өлбүтэ. “Ийэ сирэ” айымньыга курдук, Амма бурдугун барытын фроҥҥа ыыталлара. Ол сыллар туһунан Федот Федотович “Очурдаах оҕо сааһым” диэн кинигэни суруйбута уон сылы быһа бобуллан баран, 1994 с. тахсыбыта. Дьэ онтон ыла ити тиэмэ аһаҕастык кэпсэнэр буолбута.

“Ийэ сир” айымньыны Федот Потапов  Улуу Кыайыы 20 сылын көрсө сэрии ыарын санныларынан сүкпүт көлүөнэҕэ, төрөппүттэрин сырдык кэриэстэригэр, оонньооботох оҕо сааһын өйдөбүлүгэр анаан туруорбута. Кэлин бу испэктээги режиссер Василий Фомин эмиэ туруорбута. 2004 сылтан ыла  Толгонай оруолун Федот Потапов аччыгый кыыһа Елизавета Потапова оонньуур. Билигин Аҕа дойду Улуу сэриитигэр Улуу Кыайыы 78 сылын көрсө,  дойдуга анал байыаннай дьайыы кэмигэр «Ийэ сирэ» айымньы сценаҕа туруута бэлиэ, долгутуулаах буолла.

Саха Өрөспүүбүлүкэтин Ил Түмэнин Бэрэссэдээтэлин бастакы солбуйааччы А.Н. Жирков Елизавета Потаповаҕа  анаан эҕэрдэ тылларын эттэ. Кини Елизавета Потапова театрга биографията Саха театрын сэрии кэннинээҕи историятын бүтүннүүтүн кытта ситимнээх диэн бэлиэтээтэ. Ол курдук, аҕата Ф.Ф. Потапов 1945 с. Дьокуускайдаҕы драма студиятын, кэлин М. Щепкин аатынан училищены бүтэрбитэ. Саха театрыгар артыыһынан, оттон 1961-1983 сс.  театр кылаабынай режиссерунан үлэлээбитэ. Саха драматургиятын классиктара Платон Ойуунускай, Николай Неустроев, Суорун Омоллоон, Иван Гоголев-Кындыл, Софрон Данилов, Степан Ефремов уо.д.а. айымньыларыгар тирэнэн Саха театрын академическай таһымҥа таһаарбыта, салгыы классическай театр быһыытынан сайдар олугун уурбута.

Федот Федотович кэргэнэ Дария Алексеевна Ларионова М.Мусоргскай аатынан консерваторияны бүтэрбитэ, талааннаах опернай ырыаһыт, драматическай артист этэ. Кини олохтон эрдэ туораабытын кэннэ Потаповтар ийэлэрин Зоя Петровна Багынанова солбуйбута. Зоя Петровна Федот Федотович олоҕор көрсүбүт уустук кэмнэрин тэҥҥэ үллэстибитэ, киниэхэ эрэллээх өйөбүл, түөрэҥнээбэт тирэх буолбута. Саха театрыттан  туоратыллар кэмнэригэр Нерюнгрига тиийэн куукула театрын тэрийбиттэрэ.

Федот Потапов кэнниттэн Зоя Петровна кини  оҕолорун атахтарыгар туруортаабыта, оҕолорго ийэлэрэ, тапталлаах эбээлэрэ, хос эбээлэрэ буолла. Хас да дьоһуннаах ахтыы кинигэлэрин  суруйан, Федот Федотович аатын үйэтитиигэ улаханнык көмөлөстө. Генннадий Багынанов – саха киинэтин бастакы режиссердарыттан биирдэстэрэ этэ. Елизавета – Саха Өрөспүүбүлүкэтин үтүөлээх артыыһа. Эдьиийэ Надежда – Үүнэр көлүөнэ театрын литературнай-драматическай чааһын салайааччыта. Елизавета. Ньурба театрыгар “Сайсарыга”  Ньургуу оруолун аан бастаан толоруоҕуттан ийэ сүрүн оруолун толорууга тиийэ үүннэ.

Итилэри сиһилии бэлиэтээн туран, Ил Түмэн бастакы вице-спикерэ А.Н. Жирков  Елизавета Федотовнаҕа Саха Өрөспүүбүлүкэтин Ил Түмэнин махтал суругун, сибэкки дьөрбөтүн уонна өйдөбүнньүк бэлэҕи туттарда.

Елизавета Федотовнаҕа Саха Өрөспүүбүлүкэтин культуратын уонна духуобунай сайдыытын министрин солбуйааччы Марина Силина Саха Өрөспүүбүлүкэтин Ил Дарханын махтал суругун, Амма улууһун дьаһалтатын баһылыгын солбуйааччы Ньургуйана Илларионова “Амма улууһун бочуоттаах олохтооҕо”  бэлиэни туттардылар. Саха Өрөспүүбүлүкэтин судаарыстыбаннай сүбэһитэ Андрей Борисов, биир идэлээхтэрэ — артыыстар, доҕотторо эҕэрдэлээтилэр.

***

Ил Түмэн пресс-сулууспата                   

Обсуждение • 4

Добавить комментарий
  1. Билэр.

    “Ийэ сирэ” диэн сыыһа суруйбуттар диэм этэ да, аныгы киһи өйдүүрэ иччэ.

    СИР ИЙЭ, ИЙЭ СИР кини ким эрэ ийэтин сирэ диэн өйдүүр, ылынар төһө сөбө буолла?

    Ийэттэн төрүүбүт, Сир Ийэҕэ оҕолорбутун олордон хаалларабыт барарбытыгар. Букатын атын-атын өйдөбүл, уу-хаар буолбатах, Сир- Халлаан курдук.

    Ол иһин хас биирдии киһи СИР ИЙЭ туһугар кыһаллан, онно оттоон, сүөһү, сылгы ииттэн олоруохтаах, тулалыырын харайан. Омугуттан, ханна олороруттан тутулуга суох. Дьолу туойар көтөрдөрү, кыыллары эмсэхтэммэккэ. Биһиги курдук акаарытыйыыга араас албас толкуйдаан эбии алдьаммакка. Онтун тохтотон, бопсон.

  2. Билэр.

    Ийэ сирэ диэн өйдөбүл суох, Аҕа Дойду диэн баар.

    СИР ИЙЭ тустаах омуктар олорор сирдэринэн Аҕа Дойдуларыгар үллэһиллэр. Ол иһин тустаах омук бэйэтин Аҕаларын Дойдутун ТУРУГАР КЫҺАНЫ хаһан да, ханна да инники тутуохтаах.

  3. Билэр.

    Сир Ийэ, Ийэ Сир диэн аат тыл. Кини тыыннаах. Имя Планеты. Биһиги бэйэбит ааппытын улахантан эрэ суруйары сатыыбыт, билэбит.Арҕаа дойдуттан кэлбит үөрэх, наука ол иһин бүгүн тупикка аҕалла.

    Ону Ийэ сирэ диэн суруйуутута кытта сыыһа. Маннык баҕар сөп соҕус буолуо этэ: ийэ Сирэ.

  4. Билэр.

    Ким эрэ атын дьонтон ордо сатаан итинник. Саха культуратын министерствота тугу саҥаран кэлбитин, саҥарарыҥ, Сиргэ, омукка тугу ыһан үүннэрбитин анаарыах тустаах. Бэйэтигэр онто наада, миэхэ буолбатах.

Оставить комментарий    

Шиномонтаж Левша

СахаСтройПлит
Cтоматология 32
«Стоматология Все 32»