Оһуордаах Таатта

Кулун тутар 1 күнүгэр Ытык Таатта сиригэр Саха Өрөспүүбүлүкэтин уус-уран оҥоһуктарга маастара, художник-модельер, иистэнньэҥ “Таатта” улуустааҕы норуот айымньытын дириэктэрин солбуйааччыта, “Оһуордаах Таатта” дьиэ-кэргэн айар мастарыскыай бренд төрүттэччитэ, салайааччыта, Саха Өрөспүүбүлүкэтин култууратын туйгуна Марианна Степанова юбилейыгар аналлаах “Оһуордаах Таатта” үтүө түһүлгэ ыытылынна.

Дьоро киэһэҕэ Марианна Степанова араас сылларга айбыт сахалыы таҥастарын, аныгылыы стилизованнай көстүүмнэрин көрдөрүү үрдүк таһымнаахтык ыытылынна. Өрөспүүбүлүкэ, Россия, аан дойдутааҕы таһымнаах модельердар күрэхтэригэр, араас фестивалларга кыттыбыт, бириистээх миэстэлэри ылбыт коллекциялара бар дьон сэҥээриитин ыллылар.

Үөрүүлээх киэһэни Таатта ыллам ырыаһыттара тупсаран, киэргэтэн биэрдилэр… Марианна Вячеславовнаны үтүө-мааны түгэнинэн Таатта улууһун баһылыгын солбуйааччыта С.В.Сунхалыров, “Таатта нэһилэгэ МО баһылыга Павлов Е.И, “Таатта” улустааҕы норуот айымньытын дириэктэрэ Г.Г. Вырдылин, “Симэх” норуот ускуустубатын уонна уус-уран оҥоһуктарын ресурснай салаатын салайааччыта Д.К. Осипов, Таатта улууһун тэрилтэлэрин салайааччылара, бар дьоно эҕэрдэлээтилэр.

Марианна Степановаҕа “Таатта улууһун норуотун маастара” үрдүк аат иҥэрилиннэ, “Саха Өрөспүүбүлүкэтин норуот уус-уран оҥоһуктарын сайыннарыыга кылаатын иһин” култуурат уонна духуобунай сайдыы министерствотын анал бэлиэтинэн наҕараадаланна. Алыптаах кэрэ айымньыларыбар дьоҥҥо бэлэхтиир Марианна Вячеславовнаны “Симэх” национальнай киин истиҥник эҕэрдэлиир.

***
«Симэх» пресс-сулууспата