Ньурбаҕа – өрөспүүбүлүкэтээҕи Сылгыһыт күнүгэр анаммыт тэрээһиннэр

Бүгүн-сарсын Ньурбаҕа өрөспүүбүлүкэтээҕи Сылгыһыт күнүгэр анаммыт тэрээһиннэр киэҥ далааһыннаахтык ыытылла тураллар. Быйыл Саха АССР тэриллибитэ үбүлүөйдээх 100 сылыгар ананаллар.

Сарсыарда 10 чаастан Кыталыктаахха сылгы быыстапката-дьаарбаҥката үөрүүлээхтик аһылынна. Тэрээһиннэргэ өрөспүүбүлүкэ 15 араас улууһуттан барыта 200 кэриҥэ киһи кэлэн кытта сылдьар.

Бочуоттаах ыалдьыттарынан СӨ тыатын хаһаайыстыбатын миниистирэ Александр Атласов, Ил Түмэн сис кэмитиэттэрин бэрэссэдээтэллэрэ Владимир Прокопьев, Андрей Находкин, тыа хаһаайыстыбатын наукатын дуоктара, РФ Наукатын академиятын академига, К.А. Тимирязов аатынан Москватааҕы тыа хаһаайыстыбатын институтун зоотехнияҕа факультетын профессора Харон Амерханов, Бүтүн Арассыыйатааҕы сылгы иитиитин научнай-чинчийэр институтун дириэктэрэ Александр Зайцев, “Саха сүөһүтэ” ГКП салайааччыта Александр Артемьев, “Сахаагроплем” ГБУ салайааччыта Алексей Жирков уо.д.а. буоллулар.

11 ч. 30 м. Чаппандаҕа эрэгийиэн таһымнаах сылгыһыттары уонна норуот хаһаайыстыбатын атын даҕаны салааларын үлэһиттэрин үөрэтэргэ аналлаах Киин саҥа дьиэтэ үөрүүлээхтик үлэҕэ киирдэ.

Бу эбийиэги тутан үлэҕэ киллэриигэ Тыа хаһаайыстыбатын министиэристибэтиттэн 6 мөл. солк., улуус бүддьүөтүттэн 3 мөл. солк. көрүлүннэ.

***

Источник: Ulus.Media