Кэбээйигэ XIX-с Өрөспүүбүлүкэтээҕи Олоҥхо Ыһыаҕа саҕаланна

Олоҥхо Ыһыаҕын алгыс тыллара этилиннилэр— «Үс өрүс тардыылаах, уу чалгый куттаах Кэбээйигэ — Саха сирин тэбэр сүрэҕэр» Кэбээйи улууһун олохтоохторун ааттарыттан ыһыах кыттыылаахтарын уонна ыалдьыттарын улуус кырдьаҕаһа, бочуоттаах олохтооҕо Петр Николаевич Семенов эҕэрдэлээтэ.
Аһыллыы сиэрэ-туома Ытык Алгыстан саҕаланна, ыалдьыттарга кымыс амсаттылар уонна олоҥхо матыыбынан театрализованнай дьүһүйүүнү көрдөрдүлэр. Дьүһүйүү биир чаҕылхай түгэнинэн «Дыгын оонньууларын» кыайыылаахтара, Кэбээйи улууһун ааттаах боотурдара Алексей Уваровскай, Артем Дьяконов уонна Яков Дмитриев кыттыннылар.
Олоҥхо Ыһыаҕын ытык дуоҕатын Саха Өрөспүүбүлүкэтин Ил Дархана Айсен Николаев туруорда.

Ыһыах ыалдьыттарын уонна кыттааччыларын эҕэрдэлээн туран, Айсен Николаев улахан тэрээһини тэрийбиттэрин иһин Кэбээйи олохтоохторугар махтанна.

«Быйыл Олоҥхо Ыһыаҕа манна, Кэбээйи сиригэр, биһиги үс ытык өрүспүт – Өлүөнэ, Бүлүү, Алдан – силбэһэр сирдэригэр ыытылларыттан мин ис сүрэхпиттэн үөрэбин. Бу сиргэ дьикти хорсун, үлэни таптыыр дьон олорор. Бары саха дьонун аатыттан кэбээйилэргэ маннык кэрэ, үтүөкэн Олоҥхо Ыһыаҕын тэрийбиккит иһин махтаныахпын баҕарабын. Олоҥхо Ыһыаҕын алгыһа хас биирдиибитигэр тиийдин, эһиэхэ барыгытыгар дьолу, доруобуйаны, эйэни уонна кыайыыны аҕаллын!» — диэтэ Ил Дархан.
Ону таһынан, ыһыах кыттыылаахтарыгар эҕэрдэ тылларын Ил Түмэн Бэрэссэдээтэлин бастакы солбуйааччыта Александр Жирков уонна Кэбээйи улууһун баһылыга Иван Левин тиэртилэр.

Арассыыйа норуоттарын сомоҕолоһууларын уонна Саха сиригэр Култуура сылларыгар Олоҥхо Ыһыаҕа өрөспүүбүлүкэ олохтоохторун, Арассыыйа эрэгийиэннэрин уонна тас дойдулартан кэлбит ыалдьыттары сомоҕолоото. «Аан дойду норуоттарын эпостара» аан дойдутааҕы бэстибээлгэ Кэбээйи улууһугар Башкортостантан, Тываттан, Алтайтан, Хакасияттан, ону тэҥэ Кыргызтантан уонна Казахстантан бэрэстэбиитэллэр кэллилэр.

Икки күн устата 40-тан тахса тэрээһин ыытыллыаҕа. Тимир уустарын түһүлгэтигэр «Саха тимирэ: сөргүтүү – 2026» күрэхтэһии тэриллиэҕэ, онно маастардар былыргы ньыманан олохтоох урудааттан тимири уһаарыахтара. Ону сэргэ олоҥхоһуттар, оһуокай тылын этээччилэр, хомусчуттар уонна омук иһитин-хомуоһун оҥорор маастардар күрэхтэһиилэрэ буолуоҕа.

Олоҥхо Ыһыаҕар аан бастаан «Саха сирин улуустарын амтана» диэн түһүлгэ үлэлээтэ, онно өрөспүүбүлүкэ 11 улууһун үгэс буолбут астара-үөллэрэ туруорулунна. Хотугу аҕыйах ахсааннаах төрүт олохтоох норуоттар култуураларыгар анаммыт туспа бырагыраама көрүлүннэ.