Ньурба уонна Дьокуускай боксердара инники күөҥҥэ таҕыстылар

Саха аатырбыт боксера, ССРС спордун аан дойдутааҕы кылаастаах маастара Виктор Ефремов кэриэһигэр анаммыт күрэхтэһии Дьокуускайга түмүктэннэ.

Манна республикаттан барытыттан түмсэн 13-14 саастаах 200-тэн тахса эдэр спортсмен күөн көрүстэ. Дьокуускай уонна Ньурба улууһун хамаандалара түөртүү кыһыл көмүс мэтээллээх инники күөҥҥэ таҕыстылар.

Виктор Николаевич Ефремов биир дойдулаахтара туйгун көрдөрүүлэннилэр, Нерюнгри курдук күүстээх боксердардаах хамаанданы кэннилэригэр хааллардылар.

Ньурба эдэр боксердара Дамир Андреев (40 кг), Алексей Яковлев (50 кг), Валентин Николаев (57 кг), Корнил Ломпоров (63 кг) пьедестал үрдүкү үктэлигэр таҕыстылар. Маны сэргэ биир үрүҥ көмүс уонна үс боруонса мэтээл Ньурба улууһугар тигистэ. Бу ситиһии тренердэр Айаан Иванов, Михаил Хатылыков, Николай Григорьев, Иван Кузьмин, Руслан Васильев сыралаах үлэлэрин түмүгэр кэллэ уонна Ньурба боксата үтүө кэскиллээҕин көрдөрдө.

Атын улуустары көрдөххө, Нерюнгри – үс, Мэҥэ-Хаҥалас уонна Ленскэй – иккилии кыһыл көмүс мэтээллээхтэр.

Республика сүүмэрдэммит хамаандата кэлэр ыйга Благовещенскай куоракка Уһук Илиҥҥи федеральнай уокурук түһүлгэтигэр кыттыаҕа.

***

Гаврил СТРУЧКОВ

Ааптар хаартыскаҕа түһэриилэрэ