Ньурбачааннар субуотунньуктаан суолларын өрөмүөннээтилэр

Дойду үрдүнэн Көҥүл өттүнэн көмөлөһөөччү (волонтерство) сылыгар анаан, араас тэрээһиннэр ыытылла тураллар. Өрөспүүбүлүкэ күнүн көрсө, муус устар 26 күнүгэр Ньурбачаан нэһилиэгин олохтоохторо биир үтүөкэн уонна улахан туһалаах дьыаланы оҥордулар.

Ол курдук нэһилиэк баһылыга Мария Семенова иһитиннэрбитинэн, нэһилиэк тыраахтырдаах тэрилтэлэрэ уонна чааһынай дьоннор Ньурба-Ньурбачаан суолугар, Ньурбачаан күөлүн уҥуор 1 км кэриҥэ суол куһаҕан туруктаах учаастагын өрөмүөннээтилэр. 7 тыраахтыр, 2 КамАЗ массыына уонна лаппаахылаах дьоннор тахсан үлэлээтилэр. “ОДьКХ” ГУП филиалын учаастага уонна “ЖКХ-Альтернатива” ХЭТ шлак биэрбиттэрин суолу үрдэтэн, тэҥнээн куттулар. Тыраахтырдар 24-тэ уонна массыыналар 10 сырыыны оҥордулар. Катогу уонна килиини состорон куппут шлактарын тэҥнээтилэр. Инньэ гынан сырыыны эрэйдиир суол саамай куһаҕан учаастага тубуста. Ньурбачаан нэһилиэгин баһылыга нэһилиэк тэрилтэлэригэр уонна олохтоохторугар истиҥник махтанан туран, инникитин даҕаны маннык түмсүүлээхтик бииргэ үлэлиэхтэригэр эрэлин биллэрэр.

***

Ньурба улууһун дьаһалтатын пресс-сулууспата