Елена Голомарева: Өлөөн улууһун эрэ буолбакка, бүтүн Саха сирин Арктикатын кэскилин уһансыбыккыт

Хотугу аҕыйах ахсааннаах төрүт норуоттар боппуруостарыгар уонна Арктика дьыалаларыгар Саха Өрөспүүбүлэтин Ил Түмэнин сис кэмитиэтин бэрэссэдээтэлэ Елена Голомарева Өлөөн эбэҥки национальнай оройуонун педагогическай үлэ бэтэрээннэрин кытта көрүстэ.

Учуутал күнүгэр анаммыт көрсүһүүгэ үөрэх эйгэтин сайдыытыгар, эдэр көлүөнэни иитиигэ уонна төрүт үгэстэри харыстааһыҥҥа сүҥкэн кылааттарын киллэрбит дьон муһуннулар.

Елена Голомарева бэтэрээннэри идэлээх бырааһынньыктарынан ис сүрэхтэн эҕэрдэлээтэ уонна кинилэр сыралаах үлэлэрин үрдүктүк сыаналаата.

«Ис сүрэхпиттэн эһигини Учуутал күнүнэн эҕэрдэлиибин! Эһиги үөрэнээччилэргитигэр туох баар билиигитин, сыраҕытын биэрэн тураҕыт. Сыралаах үлэҕитинэн Өлөөн улууһун эрэ буолбакка, бүтүн Саха сирин Арктикатын интеллектуальнай уонна духуобунай кэскилин уһансыбыккыт. Үөрэппит оҕолоргут — быраастар, учуонайдар, салайааччылар, табаһыттар уонна булчуттар — өрөспүүбүлүкэбит араас муннугар ситиһиилээхтик үлэлии-хамсыы сылдьаллар. Кинилэр хас биирдии ситиһиилэрэ — эһиги оскуолатааҕы сылларга биэрбит үтүө өйдөбүлгүт, дьулуургут уонна тапталгыт туоһута. Эһиги биһиэхэ, билиҥҥи көлүөнэҕэ, төрөөбүт дойдуга бэриниилээх буолуу, эппиэтинэс уонна дьулуур холобура буолаҕыт. Өбүгэлэрбит үтүө үгэстэрин, төрүт тылбытын уонна култуурабытын харыстаан илдьэ сылдьаргыт, ону тэҥэ бу сыаннастары ыччакка тиэрдэргит иһин барҕа махталбын биллэрэбин. Чэгиэн доруобуйаны, уһун дьоллоох олоҕу уонна үөрэнээччилэргит мэлдьи махтана сылдьалларын баҕарабын!» — диэтэ парламентарий.

Көрсүһүү кэмигэр Елена Голомарева үөрэх эйгэтигэр уонна уопсастыбаннай олоххо үтүөлэрин иһин наҕараадалары туттарда:

– Саха Өрөспүүбүлүкэтин социальнай-экономическай сайдыытыгар киллэрбит кылаатын иһин Саха Өрөспүүбүлүкэтин Ил Түмэнин Бэрэссэдээтэлин махталын Иванова Любовь Иннокентьевна тутта.

– Саха Өрөспүүбүлүкэтин социальнай-экономическай сайдыытыгар ураты кылаатын иһин Хотугу аҕыйах ахсааннаах төрүт норуоттар боппуруостарыгар уонна Арктика дьыалаларыгар Саха Өрөспүүбүлүкэтин Ил Түмэнин сис кэмитиэтин бэрэссэдээтэлин махталын Мигалкин Гаврил Николаевич тутта.

Саха Өрөспүүбүлүкэтин үтүөлээх учуутала, РСФСР үөрэҕириитин туйгуна, Өлөөн эбэҥки национальнай оройуонун уонна үс нэһилиэгин бочуоттаах олохтооҕо Евдокия Ильинична Павлова бэйэтин педагогическай суолун туһунан иһирэхтик кэпсээтэ. Кини учуутал үлэтин ыарахаттарын, ол иһигэр оччотооҕу кэмҥэ расписание оҥоруута хайдах курдук уустугун, сэбиэскэй кэмнээҕи ирдэбиллэр тустарынан ахтан-санаан ааста.

Саха Өрөспүүбүлүкэтин айылҕа харыстабылын үтүөлээх үлэһитэ, государственнай сулууспа бэтэрээнэ, Өлөөн орто оскуолатыгар өр сылларга оленеводство учууталынан уонна дириэктэринэн үлэлээбит Гаврил Николаевич Мигалкин оскуола бүгүҥҥү күннээҕи үлэтин-хамнаһын сырдатта. Кини эппитинэн, үөрэх сыла аһыллыытыгар анаан хаһыат тахсар буолла. Элбэх сыл устата оскуола тугунан дьарыктаммытын туһунан барыта манна сурулунна. Бүгүҥҥүттэн хаһыаты чиэппэр аайы таһаарар буолуохтара, оскуола үлэтин сырдатыахтара.

Гаврил Мигалкин бэлиэтээбитинэн, билиҥҥи ирдэбил быһыытынан професиональнай үөрэхтээһин киирэн турар. «Парикмахер», «суоппар», «ыарыһахтары көрөр-харайар младшай медицинскэй сиэстэрэ», «иитээччи көмөлөһөөччүтэ», «автослесарь» диэн идэлэргэ үөрэтэллэр.

Кини билиҥҥи үйэҕэ сетевой учуутал диэн баар буолбутун тоһоҕолоон эттэ. Арктическай государственнай агротехнологическай университетыттан биологическай наука хандьыдаата учуутал дистанционно биһиги оскуолабытыгар биология предметигэр оҕолору үөрэтэрин туһунан иһитиннэрдэ.

Көрсүһүү истиҥ эйгэҕэ ааста, кыттааччылар үөрэх систиэмэтин сайыннарыы, каадырдары бэлэмнээһин уонна Арктика оскуолаларын материальнай-техническэй баазатын бөҕөргөтүү туһунан санааларын атастастылар.

***

Ил Түмэн пресс-сулууспата