Курс валют
$
64.32
0.11
72.11
0.59
Курс валют
Курс валют
$
64.32
0.11
72.11
0.59
Меню
Поиск по сайту

Sayun.ru: Саха аһын атыылыыр бастакы интернет-маҕаһыын

22.05.2019 20:31 0
Sayun.ru: Саха аһын атыылыыр бастакы интернет-маҕаһыын

Аныгы дьон солото суох. Сорох-сороҕор маҕаһыын да кэрийэргэ бириэмэ кырыымчык. Онон интернет-маҕаһыын үгүс дьоҥҥо абырал буолла. Интернетинэн тугу барытын сакаастыахха сөп: миэбэлтэн саҕалаан эмкэ-томко тиийэ.  Сорох-сорох “продвинутай” дьон виртуальнай маҕаһыыҥҥа “олорон”  дьиҥнээх маҕаһыын аана ханан баарын умнуох курдуктар.

Аныгы кэм сиэринэн сахалар эмиэ сайдан интернет-маҕаһыын астан эрэллэр. Мал-сал, тэрил атыыламмыта ыраатта, аны билигин олохтоох аһы батарарга Sayun.ru  диэн интернет-маҕаһыын аһылынна. Сайт үлэлээбитэ икки ый буолбут, ол кэмҥэ чочуллан, билигин атыылаһааччыга балайда тоҕоостоох  гынан тупсарыллыбыт.

Республикаҕа табаары батарыы – сүрүн кыһалҕа. Дьон билигин өйдөнөн олохтоох бородууксуйаны атыылаһа сатыыр. “Ыарыы барыта — астан” диэн этии киһи эрэ төбөтүгэр барытыгар хатанна. Онон экологическай ыраас, ол-бу химиката суох (аҕыйах) аһы аһыырга дьулуһабыт. Онтубут аны атыыланар сирэ олус кырыымчык.

Sayun.ru  интернет-маҕаһыын саҥардыы үлэлээн эрэр  буолан, билигин табаарын арааһа аҕыйах эбит. Кэнэҕэс биллэн-көстөн бардахтарына  атын  олохтоох табаары оҥорооччулар кыттыһыахтара дии саныыбыт. Билиҥҥитэ Дьокуускайдааҕы уонна Нерюнгритааҕы көтөр фабрикаларын, “Күн”, “Топпут Миисэ”, “Сахачай”, “Якутский гормолзавод” о.д.а. тэрилтэ оҥорон таһаарбыт аһын атыылыыллар эбит.

Интернет-маҕаһыын тэрийээччилэрэ эдэр дьон, кинилэргэ Тыа хаһаайыстыбатын министиэристибэтэ сүбэ-ама, көмө-тирэх буолар. “Харчынан буолбакка, ас-үөл оҥорор олохтоох тэрилтэлэри кытары тиксиһиннэрэн биэрэбит, презентацияларын тэрийэбит, тэрээһин боппуруоһугар көмөлөһөбүт”, — диэн тыа хаһаайыстыбатын миниистирин солбуйааччыта Василий Афанасьев   кэпсиир. – Интернет-маҕаһыын бэйэтэ төлөбүрү ылар систиэмэлээх, солото суох дьоҥҥо олус табыгастаах. Иккиһинэн, олохтоох бородууксуйа батар ырыынагын кэҥэтэтэр соруктаах. Саха чэйигэр интэриэс үөскээтэ. Урут Москваҕа, атын да киин куораттарга барар дьон  эт, балык кэһиилээх айанныыр эбит буоллахтарына, билигин” саха чэйин үлэһэллэр” диэн чэй  илдьэ барар буоллулар”, — диир.

В.Афанасьев, тыа хаһаайыстыбатын миниистирин солбуйааччы.

Бүгүн Бэчээт дьиэтигэр Sayun.ru интернет-маҕаһыына билсиһиннэриитэ бэрт сэргэхтик ааста. Ас-үөл оҥорооччулар уонна сайт ааптардара суруналыыстары кытары көрсөн табаардарын, өҥөлөрүн туһунан ирэ-хоро кэпсээтилэр, бэл, атыылыыр астарын амсаттылар.  «Топпут Миисэ» пельменнэрэ эмискэ ыалдьыттар кэллэхтэринэ абыраллаах буолсу», —  диэн биир коллегабыт түмүк оҥордо.

Онон, боруобалааҥ, дьиэттэн тахсыбакка олорон Sayun.ru  сайтка киирэн аста-үөллэ атыылаһыҥ. 1,5 тыһыынчаттан элбэх сыаналаах табаары  сакаастаатахха аҕалаллара босхо эбит.

***

Aartyk.Ru

 

Оставить комментарий