САТАБЫЛЛААХ ХАhААЙКА СҮБЭТЭ

• үүт түргэнник оргуйарын уонна хаахтыйбатын туһугар кыра саахар куһуогун угуллар;
• миискэ кыраайын арыынан аҕаатахха, үүт куоппат;
• сүөгэйгэ үүт эптэххэ, хомуоктаммат;
• бырдах ытырбыт сирин 1 чаайынай ньуоска суоданы 1 ыстакаан ууга булкуйан сотуллар;
• тиэстэ охсорго ордук оргуйбатах үүт барсар. Бурдугу үүккэ буолбакка, төттөрү үүтү синньигэс утаҕынан бурдукка булкуйа-булкуйа кутуллар;
• маргариҥҥа оҥоһуллубут бурдук ас уһун кэмҥэ курсуйбат;
• лимону хахтыах иннинэ үрдүгэр сылаас уу куталлар, сыта ордук дыргыйыа;
• хахтаммыт хортуоппуй хараарбатын туһугар, бысталаабакка эрэ тымныы ууга тута түһүҥ. Уһуннук туттахха битэмииннэрэ сүтэллэрин умнумаҥ;
• сибиэһэйдии тоҥмут оҕуруот аһын ириэрбэккэ эрэ оргуйбут ууга угуллар. Оччотугар ас хаачыстыбатын, битэмиинин сүтэриэ суоҕа;
• сибиэһэй дьаабылыканы мас көөбүлүгэр уктахха өр сытыа;
• тоҥ балыгы салапаан мөһөөкчүктээн баран сылаас ууга уктахха түргэнник ириэ;
• быһыллыбыт дьаабылыканы лимоннай кислоталаах тымныы ууга уон мүнүүтэ сытыардахха хараарыа суоҕа;
• моркуобу, луугу ыһаарылыырга саһардаары арыыга саахар таммалаталлар;
• убаҕас тиэстэни тымныы уулаах бытыылканан хатайдаан, дьиппинитэн биэрдэххэ сыстаҥнаабат буолуо;
• куурусса сымыытын 2-3 ый хаһаанар буоллахха үрдүгэр туус таммалатыллар;
• куукунаҕа олохсуйбут бөрүкүтэ суох сыты сүтэрэргэ хаппаҕа суох нэлэгэр иһиккэ кыра уксуус эбиллибит уутун кутан баран билиитэҕэ оргутуллар. Аҕыйах мүнүүтэнэн түннүгү аһан хоһу салгылатыллар;
• долбуурга хаһаана уурбут бородуукталар аттыларыгар мас чоҕун илдьиритэн баран, кыра иһиккэ кутан уурар үчүгэй. Оччотугар тахсыбыт үтүө-мөкү сыты бүтүннүүтүн ол бороһуок оборуо. Чоҕу сотору-сотору уларытар наада;
• ыһаарыламмыт балыгы сиир минньигэһэ сүрдээх. Ол гынан баран хаһаайка эрэ барыта тахсар сыты сөбүлээбэтэ чахчы. Онон ыһаарылыыр арыыга биир хортуоппуйу хахтаан, кырбастаан баран уган көрүҥ. Оччоҕуна наһаа сыттаныа суоҕа;
• барыанньаны бааҥкаларга сойбутун эрэ кэннэ кутуллуохтаах. Итиилии куттахха, отоно уөһэ тахсар, сироба аллараа хаалар уонна барыанньа түргэнник буорту буолар;
• бөрүөк, туорт эбэтэр кекс буһар кэмигэр уот сиэбит буоллаҕына, сойутан баран кыра түөркэнэн сэрэнэн хараарбыт сирин кыһыйыллар;
• тиэстэҕэ биир ньуоска ханньаагы эбэтэр рому кутан доруоһаны солбуйуохха сөп. Тиэстэ ордук минньигэс буолар;
• балыгы ыһаарылыырга хас да сиринэн быһаҕынан быһыыта оҥоруҥ, оччоҕо балык көрүҥүн сүтэрбэт, тириитэ арахсыбат;
• безе буһарарга, ньалбайан түспэтин наадатыгар, аҕыйах хааппыла виннэй уксууһу кутуохха сөп.

***

Aartyk.ru