Дьокуускайга Ньурба улууһун күннэрэ ыытылынна

 Дьоро киэһэни тэрийбит хаһаайыттар ыалдьыттары үтэһэлээх этинэн, арыылаах  алаадьынан, уохтаах кымыһынан күндүлээтилэр.

Төрөөбүт дойду ахтылҕанын таһааран, ахсынньы аам-даам тымныытын аахсыбакка, Дьокуускайга олорор Ньурбаттан төрүттээх биир дойдулаахтарбыт  дьоро киэһэҕэ көхтөөхтүк кытыннылар.

Улуус нэһилиэктэрин, куоратын баһылыктара дьону-сэргэни эҕэрдэлээтэ.

Үөрүүлээх киэһэ ырыатын-тойугун “Күн дьоно” фольклор бөлөҕө арыйда. Хабарҕа ырыатынан, кырыымпа тыаһынан, кылыһахтаах тойугунан, этигэн хомуһунан көрөөччү дууһатын манньыттылар.

Концеры Игорь Егоров, Галина Шахурдина, Юлиан Семенов, Айаал Аммосов, Антон Иванов  о.д.а. киэргэттилэр.  “Мозаика” уонна “Иэйии” үҥкүү бөлөхтөрө кытыннылар.

***

Бу күн иннинэ 2-с №-дээх Правительство дьиэтигэр баһылыктар, общественниктар уонна республика салайааччылара кыттыылаах улахан сүбэ мунньах тэриллибитэ. Онно улуус 2030 сылга диэри сайдар стратегическай былаана дьүүллэһиллибитэ. Ньурба улууһа инвестордары тугунан угуйуон сөбө, проблемата, ону хайдах быһаарыахха сөбүн ырытыспыттара, санааларын үллэстибиттэрэ, этии киллэрбиттэрэ.

Улахан мунньах кэнниттэн биир сүбэнэн – республика уонна олохтоох былаас бэрэстэбиитэллэрэ, общественниктар Ньурба улууһун сайдарын туһугар биир кэлимсэтик үлэлиир былаан барылын ылыннылар. Онно, бастатан туран, сиртэн хостонор баайга олохтоох дьон кыттыһыыта, үлэ миэстэтин таһаарыы, экология боппуруоһа, каадырынан хааччыллыы, ыччаты олохсутуу, дьиэ-уот, ититии уонна суол-иис – логистика боппуруостара киирдилэр.

Нэһилиэк баһылыктара.

Улуус баһылыга Алексей Иннокентьев.

***

Aartyk.Ru

Сорох хаартыска интернеттэн ылылынна http://dnevniki.ykt.ru/kouka/1081226.