Курс валют
$
92.26
0.33
99.71
0.56
Курс валют
Курс валют
$
92.26
0.33
99.71
0.56
Меню
Поиск по сайту

“Чолбон” уот сулуһа

17.03.2020 10:14 4
“Чолбон” уот сулуһа

Кулун тутар 15 күнүгэр “Сэргэлээх уоттара” култуура киинигэр аар-саарга аатырбыт “Чолбон” рок-бөлөх кэнсиэртээн ньиргиттэ. Тыыннаах музыка сүгүрүйээччилэрэ бу дьоро киэһэ Александр Ильин – Чолбон Һааска 60 сааһын бэлиэтээтилэр. Чолбон Һааска хаама сылдьар айдарыылаах музыкант, аҥардас кулгааҕынан иһиттэ кэрэх барытын сүһүйэн ылан инструмеҥҥа оонньоон кэбиһэр дьоҕурдаах. Ону ааһан сүрэҕэ сөбүлүүрүнэн талбыт айан, тупсаран, эбэн-сабан тыаһатар дьикти талааннаах.

“Чолбон” музыканнарыттан үстэрэ биир ыалга, биир ийэттэн-аҕаттан төрөөбүт ини биилэр – Намолий, Александр, Григорий Ильиннэр. Хомойуох иһин, билигин Намолий Орто дойдуга суох.  Биир ыалга маннык дьон тутуспутунан кэлбиттэрэ алыс мээнэҕэ буолбатаҕын туоһута.

Ильиннэри кытары биир тыыҥҥа, долгуҥҥа иитиллибит музыканнар – Юрий Васильев, Александр Иванов бу бөлөҕү ситэрэн-хоторон биэрэллэр. Юрий Васильев куолаһын, ылыыр ньыматын кимниин да бутуйбаккын. Оттон ударнайга оонньуур Александр Иванов тэтими тутара, долгутара, арааһа, тэҥнээҕэ суох.

Уопсайынан, ураты салгыннаах, иччилээх-илбистээх, Айылҕа, өбүгэ иһийэ сытар утаҕын түлэй түгэхтэн дьалкытан, дьааһытан ороон таһаарар дьикти дорҕоону хамсатар күүстээҕинэн “Чолбон” бу кэмҥэ соҕотох. Рок-бөлөх, дьиктитэ диэн, аан бастаан нууччалар түөлбэлээн олорор Мииринэй куоратыттан киэҥ аартыкка тахсыбыта. Сахалар сэнэнэрбит оччо эбитэ дуу, эбэтэр атын омуктар сэҥээрдэхтэринэ эрэ бэйэ дьонун болҕойон көрөрбүт эбитэ дуу, ол гынан баран “Мирный поет о мире”  диэн фестиваль иннинэ бу дьон син ыллыы,тыаһата сырыттахтара. Ол туһунан ахтан-кэпсээн ааспыттара үгүс.

Москва, Питер рок-фестивалларын, кэнсиэртиир түһүлгэлэрин “Чолбон” сулуһа эмискэ, соһуччу чаҕылыс гыммытыгар биллиилээх кириитиктэр, ордук Артемий Троицкай, “рок-музыка саҥа баламат долгуна Сибииргэ барда, онно тиийэн салгыы ханна барара буолла, Хотугу муустаах байҕал уорааныгар тимирэрэ дуу, эрэһэ долгуна төттөру төрөөн тахсара дуу” диэн таайааччы буолбуттара. Рок-долгун Европаҕа да төннубэтэ, саҥа “Чолбон” курдук феномен хаттаан төрөөбөтө даҕаны. Баҕар, кэмэ кэлэ илигэ дуу.

Троицкай “чолбоннор” музыкаларын – “шаманскай”, ойууннуу диэн ааттыыр. Итини кытары сөбүлэһиэхпин баҕарабын. Ордук Григорий Ильин айбыт ырыаларын тэтимигэр, музыкатын дорҕоонугар былыргы “дүҥүр” тыаһа иһиллэргэ дылы. Өскөтүн дьиҥнээхтиик аарымалар тыастарын кыбытар буоллар,  дьэ, кырдьык эт-эт сааһа аһыллан, дырылаан, дьулайгынан киирэн баран сүнньүҥ үүтүнэн сүүрэн, былыргы өбүгэ хаанын тымырдаргынан хачайдаан турукка киллэриэх этэ. Эмиэ да саллымардаах дьыала.

“Чолбон” музыкатыттан турукка киирии баар. Урут, Руслан Кривогорницын диэн “Эхо столицы” хаһыакка фотограбынан үлэлээбит, бэйэтэ суруйар-айар талааннаах, олус сэмэй доҕордоох этибит. “Чолбон” кэнсиэрин көтүппэтэ. Олох фанат диэн кини баара. Кини эдэр эрдэҕиттэн рок-музыканнары батыһа сылдьан хаартыскаҕа түһэрэр дьарыктааҕа.

Кэлин ол коллекциятынан бэрт интэриэһинэй быыстапка тэрийэ сылдьыбыттааҕа. Сэмэй, саҥата суох Русламмыт “Чолбону” иһиттэ эрэ олох уларыйан хаалара. Туттара-хамсанара имигэһэ, сааланы биир гына сылдьан үҥкүүлээн барара – туспа көстүү буолара.

Ааспыттааҕы кэнсиэр кэнниттэн дьон санаата:

– Астынным,  айар-тутар киһи буоларым быһыытынан миэхэ арылларбар итинник дорҕоон, ырыа-тойук көмөлөһөөччү.

– Рок кэнсиэркэ аан бастаан сырыттым. Оо, олох дьикти эбит! Төбөм оройунан киирэн испин-үөспүн барытын буккуйда, оһуобай кэнсиэргэ сырыттыбыт!

– Урут Майаҕа эккирэтэн тахса-тахса көрүүлээх этибит. “Чолбон”, “Айтал”, “Сэргэ”, “- 72”, “Хардыы”, “Дуулаҕа дьуһаал”…
Кэлин “Табыкка” (рок-фестиваль) сылдьан көрө сатаабытым даҕаны барыта уларыйбыт этэ. Астымматаҕым.

– Я люблю разную музыку, но музыку “Чолбон” воспринимаю не только ушами. Космическая, почти шаманская музыка проникает в мои жилы сквозь кожу, будоражит мою генетическую память и я готова пуститься в пляс удаганкой.

***

Aartyk.Ru

Обсуждение • 4

Добавить комментарий
  1. Чолбон фаната

    Чолбон аата Чолбон бо

  2. Потапов Афанасий

    Дьэ кырдьык Чолбон аата Чолбон буо.

  3. Вхв

    Чолбон – улуу!!! Ити тоҕо Чолбон Сааскаҕа народнай артыыс аатын биэрбэттэрэ буолла? Аҥаардастыы опера ырыаһыттара эрэ ылыахтаахтар диэн установка баар дуу. Дьиҥинэн группа дьонугар барыларыгар да иҥэрдэххэ туохтаах үһү. Дьиҥнээхтик норуот таптыыр, сэҥээрэр дьонноро.

  4. Верник4137

    Киһи ис санаатын ытыйар , уйулҕатын уһугуннаран олус күүстээх энергетикалаах, үрдүк таһымнаах концерка сылдьан билигин Да олох атын эйгэ тыыныгар сылдьар курдукпун. Оннук олус үчүгэй концеры бэлэхтээтилэр ,, Чолбон” белех. Этэҥҥэ эрэ буолуҥ, өссө Да концерт күүтэбит.

Оставить комментарий