“Букатын бу сиргэ кэлбиттии туттума-хаптыма”…- “Чолбон” 

“Сэргэлээх уоттара” култуура киинигэр “Чолбон” рок-бөлөх концера буолла. Ол туһунан санаа.

Ааспыт концерт хайдах эрэ «Чолбон» саҥа тыыннаммыт дуу диэх санааҕа тиэртэ.  Урукку ырыаларын саҥаттан аранжировкалаабыттара атыннык, сонуннук иһилиннэ. Били, киһи киинэни дуу, кинигэни дуу саас ыллаҕын ахсын атын-атыннык ылынарын курдук, “Чолбон” айымньыларын саҥаттан ааҕыы курдук буолла.

Саҥа ырыалар бааллара бу бөлөх билигин да “ретро –долбуурга” ууруллар кэмэ кэлэ илигин туоһута. Рок тэтимигэр өссө блюз мелодията иһилиннэ. 

Александр Ильин “Итирик түүл” ырыатын этно-блюз диэххэ сөбө буолуо. “Блюз – это когда хорошему человеку плохо”. 

Концерт бастакы түһүмэҕэр Григорий Ильин ыллаата. Аатырбыт критик, продюсер Александр Липницкэй “Чолбоннор” музыкаларын “шаманскай” диирэ. Ол ордук Киргиэлэй музыкатыгар баар: ойуун көрүүлэнэр, кутурар тэтимэ, дүҥүр тыаһа, дорҕооно иһиллэр, тыына бэриллэр. “Низкие вибрации Земли” – диэхтэрэ буолуо аныгы эзотериктар, ол иһин кини ырыалара киһи этин сааһын быыһынан дырылаан киирэллэр. 

Иккис түһүмэххэ Юрий Васильев ыллаата. кини уруккуттан көрөөччүнү өрүкүтэр, көрөөччугэ күүскэ дьайар энергетикалаах. Кини ону билэр, сэрэйэр. Билигин түспэтийэн ол талаанын дөрүн-дөрүн залга ыытан кычыкылатан көрөр. Уолҕамдьы уол омуннаахтык умса-төннө түһэр эбит буоллаҕына, сиппит эр киһи даҕайан, күүттэрэн имэҥирдэрин кэриэтэ.

Александр Ильин интеллектуальнай, аристократичнай музыкант. У него всегда изысканная подача музыкального материала, всегда есть глубина, какая-то фирменная филигранность. 

Тумус Мэхээлэ элбэх ырыаны “Чолбоҥҥо” суруйбут эбит. Кэриэстээн да буолуо, концерт программатыгар элбэх ырыа киирбит. 

Григорий Ильин, Александр Иванов – Грузин 60-нарын туолбуттар. Мондо Һааска – 65. Онон сыанаҕа олоҕу лаппа билбит, дириҥ далайын түгэҕин балайда түөрбүт, айылҕа-киһи-куйаар ситимин торумун тутан холкутуйбут, сиппит дьон этэр этиитэ иһилиннэ. 

Р.S.: Уонна көрөөччү баҕа санаатын тиэрдэбин:

-“Сэргэлээх уоттара” ыччат  культурнай киинэ да буоларын быһыытынан тоҕо үҥкүүлүүр-битийэр площадката суоҕуй? Рок-концеры хайдах чолоччу олоппоско олорон көрүөххэ сөбүй?! – диэн. 

Китджа концерын кэнниттэн биир киһи эмиэ суруйбут этэ: “Китджа ырыатын олорон эрэ истэр – аньыы!” – диэн. 

Сыана иннигэр аһара да улахан буолбатар танцпол баар буолуохтаах. Концерка дьон эмоцияны ыла, таһаара кэлэр эбээт. Ордук ыччат дьон. Саастаахтар да дьигиһистэхпитинэ ким да баалаабат ини.

***

Источник – Блог Туйаары НУТЧИНОЙ