Курс валют
$
59.63
0.36
70.36
0.34
Курс валют
Курс валют
$
59.63
0.36
70.36
0.34
Меню
Поиск по сайту

Александр Афанасьевич Романов – дьиҥнээх норуот депутаата этэ

26.09.2017 14:26 1
Александр Афанасьевич Романов – дьиҥнээх норуот депутаата этэ

Ыам ыйын 19 күнүгэр үтүө доҕорбут, эрэллээх киһибит Александр Афанасьевич РОМАНОВ күн сириттэн соһумардык суох буолбута. Хайдах эрэ бириэмэ аастаҕын аайы, кини суохтатара улаатан иһэр курдук. Күлэн-үөрэн мичилийэн, кэпсээн-ипсээн бөҕө буолан  көрсөрө бу баарга дылы…

Сырдык, Василий ПИНИГИН, Александр РОМАНОВ.

-Мин Александр Афанасьевичтыын биир нэhилиэктэн төрүттээхпин, биир сиртэн силис тарпыт дьоммут. Онон ийэтин-аҕатын, дьонун-сэргэтин өрдөөҕүттэн билэбин, төрөппүттэрбит да билсэр этилэр.

90-с сыллар саҕаланыыларыгар  Александр үрдүк үөрэҕи бүтэрэн дойдутугар Мэҥэ-Ханалас Төхтүрүгэр кэлэригэр мин проектнай бюролаах этим, аччыгый чааhынай тэрилтэ. Бу бюроҕа  үлэҕэ ыламмын олус көхтөөхтүк, таhаарыылахтык үлэлээбиппит.

Ити кэмҥэ олоҕун аргыhын көрсөн,  бюробутугар бииргэ үлэлиир кыыhын, эмиэ эдэр специалист – Еленалыын ыал буолбуттара. Дьокуускай куоракка көhөн киирэннэр ыал дьон, дьиэ-уот тэриммиттэрэ, ЖКХ ситимигэр киирэр тэрилтэлэргэ үлэлээбиттэрэ, уопуттарын хаҥаппыттара.

Александр — салайар дьоҕурдаах киhи, саҥа олох саҕаламмытыгар чааhынай тутуу тэрилтэтин арыйбыта республикабытыгар тутуу эйгэтигэр биир тарбахха баттанар тэрилтэ буола бөдөҥөөбүтэ.

Мин Дьокуускайга киирэн бэйэм эмиэ дьоҕус предпринимательство тэрилтэтин арынарбар өйөбүл буолбута. Ол курдук, Александр тэрилтэтигэр субподрядка үлэлээбиппит, элбэх социальнай, спортивнай объектары уотун-күөhун тардыбыппыт, вентиляциятын таҥмыппыт, арааhынай анал үлэлэрин оҥорбуппут.

Дьиҥэр, Александр тутууга саха дьонун түмэн үлэлэппит салайааччылартан биир бастакылара буолар. Элбэх саха ыччатын тутуу эйгэтигэр сыhыаран үөрэтэн-такайан үтүө үлэhит онортообут специалистара билигин республикабыт араас муннуктарыгар үлэлии-хамсыы, айа-тута сылдьаллар.

Александр салайааччы быhыытынан чочуллан, буhан-хатан тахсыбытын, дьону түмэр, тылын тиэрдэр дьоҕурдааҕын кини республика тутууга уонна архитектураҕа министрин солбуйааччытынан, төрөөбүт улууhуттан Ил Тумэн депутаатынан үлэлээбитэ кэрэhэлиир.

Ону таhынан, Александр бэйэтэ эмиэ күүстээх айылҕалаах киhи этэ.  Ийэ айылҕатын кытта алтыhарын сөбүлүүрүун, ханна да сырыттар саха сиэрин-туомун ытыктаан тутуhарын бэлиэтээн этиэм этэ.

2007 сылаахха ХИФУ ИТФ корпуhун тута сылдьаммыт «Киhилээх» хайатыгар барыаххайыҥ диэн этиибин тутатына иилэ хабан ылан сөбүлэhэн, Алексей Иванович Божедонов – Сырдык салайааччылаах маҥнайгы туристическай бөлөххө киирэммит саас баран кэлбиппит.

Онтон ыла, бэйэбит да билбэппитинэн, Алексей Божедонов – Сырдык салалталаах биир санаалаахтар бөлөхтөрө буолан хаалбыппыт.

Сыл аайы Аан дойду ытык сирдэригэр, хайаларыгар баран сүгүрүйэн, алгыс түhэрэн кэлэр буолбуппут. Онон, Австралияттан ураты аан дойду материктарыгар барытыгар биhиги – «Сардаҥалаах» бөлөхтөр, тиийэ сылдьыбыппыт. Алгыспыт саха норуота, ыччата, Россия бүттүүнэ этэҥҥэ буолалларын, ийэ айылҕыбыт алдьамматын-кээhэммэтин туhугар, сырдыгынан уонна тапталынан туоллуннар диэн ис хоhоонноох буолаллара. Инньэ гынан, айаммытыгар суолбут-ииспит арыллан, ардах-хаар, тыал-күүс тохтоон биhиги этэр тылбытын-өспүтүн иhийэн туран истэр курдук буолаллара.

Сарданалаахтар үлэлээбиппит быйыл 10-с сыла буолла.

Бу саас Эльбрус хайатыгар тахсан алгыс түhэрэн кэлбиппит. Тиийбит сирбит эмиэ тыалыран-күүhүран турбут бэйэтэ чуумпуран-уоскуйан, күнүн чаҕылыччы көрөн көрсүбүтэ. Онно Эльбруска, Александр патриот буоларын бигэргэтэр курдук Республикабыт күнүгэр Саха сирин  уонна Мэҥэ-Хаҥалас улууhун былаахтарын өрө тутан турбуппут.

Биhиги, Сардаҥалаах бөлөх кыттылаахтара, Александр нөҥүө сахалыы куту-сүрү, сахалыы санааны бииргэ үлэлиир, алтыhар коллегаларыгар тиэртилэр диэн эрэллээхпит.

Кэнники сылларга Александр олус ыксыырын, элбэҕи оҥоро охсор былааннардааҕын туhунан этэр этэ. Ордук, төрөөбүт улууhун туhугар ыалдьыбытын, күүскэ үлэлээбитин билэбин. Онон, Александр норуот дьиҥнээх депутаата этэ дии саныыбын.

Александр дьиэ кэргэнигэр олус харыстабыллаахтык, тапталынан сыhыаннаhар этэ. «Кэнники үлэбэр арыый даҕаны бириэмэлэнним, онон дьиэбэр-уоппар, син, киэhээтин көстөр киhи буоллум, оҕолорбор арыый чугаhаатым» диэн астынан этэр этэ.

Кини оҕолорун  олоххо, үлэҕэ, дьиэ-кэргэҥҥэ сыhыаҥҥа бэйэтин холобурунан ииппитэ. Онон биhиги, Александр доҕотторо, кини оҕолоро үчүгэй дьон буолан тахсыахтара диэн бигэ эрэллээхпит.

Бу соторутааҕыта эн-мин дэһэн сылдьыбыт, өр сылларга доҕордоһон кэлбит Александрбыт барахсан аттыбытыгар суоҕа, кини туhунан ааспыт кэминэн ахтар билигин даҕаны өйбүтүгэр киирбэт, сүрэхпит итэҕэйбэт.

Бу сиргэ ананан кэлбит ыйааҕа оннук буоллаҕа эрэ диирбитигэр тиийэбит.

СР Утүөлээх уонна Бочуоттаах тутааччыта

Василий Пинигин

 ***

-Александр Афанасьевич Романовы кытта аан бастаан 2007 сыллаахха Верхоянскайга Киһилээх хайатыгар бииргэ айаннаан сырыы бөҕөнү сылдьан, айылҕа дьикти көстүүлэрин сөҕөн-махтайан кэлбиппит.

Онтон ыла бу күн сириттэн күрэниэр диэри Аан дойдуну иилии эргийэн, араас үрдүк чыпчааллары дабайан, ыарахаттары туораан, эн -мин дэһэн сырыы бөҕө сылдьыбыппыт.

Сашаны киһи быһыытынан дьонугар, дойдутугар бэриниилээх киһи диэн сыаналыыбын. Сахалыы өйө-санаата, кута-сүрэ  күүстээҕэ, атын көрүүлээҕэ, үрдүк таһымнааҕа атын дьонтон олох ураты этэ.

Кини өрүһүспүт курдук аҕыйах сыл иһигэр бииртэн-биир үрдэлгэ эрэллээхтик, чиҥник үктэнэн, бэйэтин дьиҥ-чахчы күүстээх киһи быһыытынан көрдөрбүтэ.

Мин наһаа сөҕөөччүбүн, ити үлүгэр солото суох үлэлии сылдьан, биһиги бииргэ айанныыр группатын хаһан да, ханна да умнубакка, быыс булан көрсөн, дуоһуйа ирэ-хоро кэпсэтэн, санаатын, билиитин-көрүүтүн үллэстэн, күлэн–үөрэн, ардыгар ырдырҕаһан ылааһыннар баалларын үрдүнэн барыбытын түмэр, сомоҕолуур лидербыт этэ.

Александра Иванова.

***

 — Мин Александры аан бастаан Японияҕа сылдьан билсибитим. Ол 2008с. этэ.

2009с. Тибетка группанан барбыппыт. Хайа климатыгар адаптацияланарга Лхасаҕа биэс хоммуппут. Ол эрэ кэннэ Кайласка айаннаабыппыт.

Оттон Александр ол күн айаннаан  кэлэн группаҕа холбоспута уонна сарсыҥҥытыгар коралыы барбыппыт.

Онно наһаа да сөхпүтүм, хайдахтаах бу киһи ис кыахтааҕын, күүстээҕин.

Ханнык баҕарар киһи хайа климатыгар давлениета хамсыыр, төбөтө ыалдьар, сүрэҕэ эриллэр, мэйиитэ эргийэр… Александр онтун таһыгар биллэрбэтэҕэ…

Биһиги элбэх айаммытыгар группабыт биир тутаах киһитэ кини этэ.

Мэлдьи үлэтиттэн быыс булан биһигини кытта айаннаһара.

Кини кэллэ да биһиги оҕолуу үөрэрбит.

Наһаа борустуой, тэҥнээхтэрин курдук чугастык, истиҥник сыһыаннаһара.

Группанан балаҕаныгар элбэхтик мустубуппут. Хайдахтаах курдук биһигини мэлдьитин үөрэ көрсөрөй. Кэпсэтэн, алтыһан, хомустаан үчүгэйдик да сынньанан тарҕаһарбыт.

Өйдүүбүн, биир көрсүһүүгэ “балаҕан сөрүүн, ичигэстик таҥнан кэлээриҥ» диэбитин. Итинник  биһиги туспутугар ис-иһиттэн кыһаллара, харыстыыра.

Кини олус сырдык санаалаах, инникигэ эрэллээх, олус хоһуун киһи этэ.

Кырдьык дьикти күүстээх Саха Уола, Саха Саарын оҕото кини этэ.

 

Ирина Семенова.

***

-Киһи итэҕэйэриттэн итэҕэйбэтиттэн тутулуга суох баар чараас эйгэни ылынар, өбүгэлэрин өйдүүр, айыылардыын алтыһар, көмөлөһөр күүстэргэ сүгүрүйэр ханнык баҕарар киһи олоҕун суола тэлэллэн, арыллан, сырдаан  биэрэр диэн мин бу сардаҥалаах бөлөх доҕотторбун кытары алтыһан билбитим.

Биһигини, араас анаарылаах, туспа-туора тутуллаах, күүстээх көрүүлээх, сытыы санаалаах, өһүллүбэт өйдөбүллээх дьону Киһилээх Хайата холбообута.

Ытык Хайаҕа сылдьыбыт дьон барыта, бэйэлэрэ да билбэттэринэн чараас эттиктэригэр көстүбэт ситим  иҥэринэллэр. Бу Хайа дьиктитэ диэн, сырдык эбэтэр хараҥа күүс эбинэрин  киһи бэйэтэ талар. Холобура, ыраастанан, астынан, дуоһуйан кэлэн баран күннээҕи олоҕор, бэйэтин майгытын көрүммэккэ кыыһырар, тырыттар,  иһэр-аһыыр буоллаҕына доруобуйата, эйгэтэ эмсэҕэлиир, тулатын табыллыы тумнар, санаабыта сатаммат буолар.

Абааһы баарын туһунан саха эрэ барыта кыратыттан билэ, дьиксинэ улаатар. Оттон, абааһы утарыта Айыылар бааллар диир дьону ылыммат билиҥҥэ дылы элбэх.

Биһиги, сардаҥалаах бөлөх, хас эмит сыллар тухары биллибэккэ-көстүбэккэ сылдьыбыппытын, Василий Иннокентьевич үбүлүөйүгэр эмискэччи тамада биллэрэн, элбэх араас араҥаттан ыалдьыттар иннилэригэр тахсан бэйэбитин билиһиннэрбиттээхпит.

Алгыс, тыл күүһүн, суолтатын билбэт саха ахсааннаах буолуохтаах.

Сардаҥалаахтар ахсаанныын аҕыс буолан алтыһан, араас дойдуга Ийэ Айылҕабытыгар сүгүрүйэн, сүдү Киһилээх Хайаҕа сир тымырдарынан атын ытык сирдэри холбуур АЛГЫС сиэрин-туомун элбэхтэ толорбуппут.

Чугас дьоммут ыарыйдахтарына доруобуйалара көнөрүн туһугар мустан алгыстыырбыт. Биир эмит атаспыт аттыбытыгар суох да буоллаҕына, бириэмэ болдьоһон баран ыраахтан да ситимнэһэрбит. Оннук бэйэ-бэйэбитин ситэрсэн биэрэрбит.

Бу олоххо туох да мээнэҕэ буолбат дэнэр.

Уһун айан, сырыы бөҕөтүн бииргэ, тэбис-тэҥҥэ сылдьыбыт Сашабыт суоҕа сардаҥалаах бөлөххө хомолтолоох да, олох салҕанар.

Марина Платонова.

***

Aartyk.Ru

Обсуждение • 1

Добавить комментарий
  1. 5636

    сыыһа суруйбуккут. Нууччаттан киирбит тыл, хайдах сурулларын суруллуохтаах. Тугу эмиэ икки «АА» лаатыгыт. «Депутата» буолуохтаах,, «депутААта» диэн буолбакка.

Оставить комментарий