Курс валют
$
92.26
0.33
99.71
0.56
Курс валют
Курс валют
$
92.26
0.33
99.71
0.56
Меню
Поиск по сайту

Хаарыан Аммабытын харыстыаҕыҥ!

09.02.2023 16:05 3
Хаарыан Аммабытын харыстыаҕыҥ!

Дьэ, туохха да топпот алаа маҥалайдар диэтэҕиҥ. Анараа дойдуга барытын сүгэн-көтөҕөн бараары муҥнара эбитэ дуу. Орто дойдуга туга да суох кэлбиппит, анараа аттанарга да туга да суох барыахпыт.

Айылҕа барахсаны иһин-үөһүн сүргэйэн, сүлүһүннээх дьаатынан сутуйан, уотунан уолутан, киринэн-хоҕунан хоһоҕолотон, Үс дойдуну түгэҕиттэн түҥнэри түөһэн икки атахтаах, ириҥэ мэйиилээх муҥур өйө-санаата иэдээни иэнигитэн, алдьархайы ааныгытан эрэр. Сир Ийэ барахсан ыалдьар, түллэҥниир, уһуутуур, хараҕын уутунан суунар ону өйдөөбөт сордоохтор буоллахпыт. Хаһааҥҥа диэри халлаан хабарҕабытынан буолуой, хаччааҥна диэри муора тобукпутунан буолуой?! Түксү! Өйдөнүҥ!

Көстөр кэрэ дьүһүнүнэн, дьэҥкир кырылас уутунан, ыраас ыра сэбэрэтинэн дьиэк сыстыбатах Кыыс Куоҕа холоммут Кыыс Амма барахсан кирдээх саҥнаах, иҥсэ-обот оборчолоох, хаччы ыар тыыныгар кутун-сүрүн баттаппыт хаамаайылар хара илиилэригэр киирэн сырдык бэйэтэ баранара, кэрэ бэйэтэ кэхтэрэ  буолбут. Кыыс Амма уутун толорунар, сүүрүгүн сүүрдэр үөһээ хара тыатын кэрдэргэ уураахтаан томороон тойотторбут туран биэрдилэр. Бэлиэр отун-маһын барчалаан сирин киэбин кэбирэтэн, бадараанын таһаардылар. Билэр-көрөр ичээн дьон: Амма – Саха сирин субай хаана, тэбэр сүрэҕэ диэн сибигинэйэ былаастаан этэллэр. Туран биэрдибит да, айылҕабыт буомуран, Сир Ийэбит кэлэйэн бороҥ саха урааҥхайтах букатыннаахтык киэр хайыһыа диэн сэрэтэллэр.

Ама да быстах былаас туһугар кинилэр диэтэх дьон сахаларын туһугар өстүйбүттэрэ сүрүн ньии, ама да нохтолоох сүрэхтэрин сылаас олбоххо мэнэйдэспиттэрин да иһин төрөөбүт дойдуларын, Ийэ сирдэрин кэбилэтэргэ санаалара буолан cөбүлэспиттэрэ тоҕо сүрэй?! Киһи олоҕо кылгас эбээт, түннүгүнэн чыычаах көтөн ааһарын курдук элэс гынар. Сымыыт курдук бүтэй эттээх, тугу да тууралаабат, хоҥорууларыгар хоҥнорбот, аньыыны-хараны итэҕэйбэт, сири эрэ бааһырдар дьон бэйэтин кэнниттэн тугу хаалларыай? Аат диэн баар сахаҕа күндүттэн күндү, үтүө киһи аата үйэттэн үйэҕэ тиһиллэр, номоххо кэпсэнэр, алгыһынан туолар, оттон хобдох киһи аата сиргэ-буорга тэпсиллэр, сииги кытары симэлийэр, эбэтэр аньыыта-харата оҕус тарпатынан оҥоһулуннаҕына – кырыыска кэбилийэр, удьуоругар ыар сүгэһэр, нүһэр түһээн буолан  бараныахтарыгар диэри состоруллар.

Аммабытын харыстыаҕыҥ, алдьаттарымыаҕыҥ, кэнэҕэс ыччаппыт төлкөтүн түҥнэримиэҕиҥ!

***

Бүөтүр Арыылаахап. 

 

Aartyk.Ru: Якутия.Инфо сайтан хаартыска ылылынна, интернет-хаһыат суруйарынан, күһүн быыбар кэнниттэн Амма үөһээ тардыытыгар мас кэрдиитэ күүскэ саҕаланар чинчилээх. 

Обсуждение • 3

Добавить комментарий
  1. Сындыыс

    Хайа, отто эппитэ дии Аммага туох да тыаны кэрдиини таьааттарыам суога диэн. Быыбарга ити боппуруоьунан киирэгит буоллага …

  2. Билэр

    Дьон Сири илдьи тыытан аһыыр иэдээнин тоҕо өйдөөбөт диэн ыйытык баскар биэрдиҥ да эппиэтэ бэйэтэ кэлэр. Ол эрээри ол толкуйдуур дьоҕурун сайыннарбыт киһиэхэ, бу суруйбут киһи курдук тыа дьонугар.

    Толкуйдаабат эр киһи диэн урут сааттаах буоллаҕына, бүгүн атын, букатын норма буолбута ырааппыт. Толкуйа туллубута туох буолуой, устар кыһын тустар буо, төгүрүк сыл бэлэми ытыалаан ойоҕун, оҕотун аһатан мэнигийээнниирин аньыытын анаараахтаабат.

    Аныгы үгүс эр киһиэхэ иччэ кыра кыаллыбат, ордук үөрэхтээх куорат, ол иһигэр салайар, дьонугар. Тоҕо? Киһи эрэйдээх тус баҕатын эрэ батыстар улуу саҕа сананара ханна бараахтыай? Ол эрээри киһиэхэ аһыыр аһа эрэ буобакка, тугу кэтэ, иилинэ сылдьара кытта, оннооҕор бэлэхтээбитэ дьайар.

    Аныгы эр дьон баһын иһин мэйиитин эргиирэ туохха баалынна, харда, уһуну-киэҥи өйдөөбөт өлүү буолла? Бриллиант тааска, атын аата алмаас. Аата да ААЛ МАС диэҥҥэ майгынныыр да, букатын биир дорҕоон ис дьиҥин тиэрэ эргитэр. Биир дорҕоон ТЫЛ ис хоһоонун букатын түктэри өттүгэр иччэ эргитэр буоллаҕына, бүтүн үйэтигэр өлбөөдүйбэт таас чыпчылҕан түгэнэ олохтоох киһи эрэйдээҕи мэйиитин сиир дьоҕура төһө, хачча эбитин кээмэйдиир кыахтаах көстүбэтэ буолаахтыа.

    Ол иһин түктэри өйдүүрүн, “улуу сайдыы” суолугар үктэнэн дирбиэн-дарбаан, уруй-айхал, вперед хаһыылаах бүгүҥҥү олоҕо туохха тиэрдэрин бааллыбыт өйүнэн өссө хаһааҥҥы дылы буолуохтааҕар, төрүт өйдөөбөккө өлүөх курдук.

    Ойохторугар бэлэхтээбит бриллианнаах таастан аккаастанан абыраныа этилэр да, оннук гынар өйдөрүгэр киириэ дуо? Бэйэҕин акаары диэхтэрэ. Эйиэхэ сүүһүнэн, уонунан тыһыынчаҕа кэлбит тааһы ким эмит иччэ харчыга эйигиттэн ылыа дуо? Суох курдук. Туттаран көрүҥ.

    Билигин искусственнай алмаас оҥоһуллар буолан, Алроса илдьи тыыппыт, атомынан дэлби тэптэртээбит сирдэрин АБЫРАХТЫАН оннугар сахалар гиэннэрэ, сири харыстыыр хампаанньа диэн күн аайы дьон өйүн киргил курдук тохтоло суох нвк рекламатыттан тоҥсуйар, онно аҕыйах үбү көрөн эрдэҕэ. Ол аайы биһиги кыра ычалаах дьоммут бэрдимсигэ бэргиир, улуутуйара уһуктар.

    Ойуунускай Чолбон сулуһу кэттэрбит, акаарытыгар “үтүө салайааччы” буолан үйэлэргэ өйгө-санааҕа хаалаары абааһыны кытта аймахтаһарын да кэрэйбэтэх салайааччылаах, күтэринэн аһыыр көөбүл ортотугар олорон хаалбыт, дьон -сэргэ куоппут тойонун туһунан кэпсээнэ бүгүҥҥү олох кырдьыга буолара хомолтолоох эрэ диириҥ хаалар.

    Аҕыйах сүүс сыл анараа өттүгэр Итэҕэллээх, Толкуйдаах дьонун таҥнаран өлөттөрбүт омук бүгүн да ол дьонун ТОЛКУЙДУУР ДЬОҔУРУН үтүктээйи үөрэҕинэн, өйүн эргиирин баҕатынан, ымсыытынан бааммытын өһүлэн, ситэн үөрдүө дуо?

  3. Эбиэххэ.

    Ил Түмэн быыбарга былыргы курдук эр киһи дьахтарын куолаһын сөбүлэһэр буоллаҕына, ылар сокуон таһаарыан наада. Оччотугар эр дьоммут быыбарга элбэх кэлиэ этэ. Бүгүн бюджет дьахталларын дьайыытынан талыллыбыт дьон туох да үчүгэйгэ тиэрдибэтэ.

    Сыырын ыһыктыбыт аҥала тураах курдук буолан бүтэрбитин барыбытыгар баҕарыахха.

Оставить комментарий