Курс валют
$
63.78
2.01
65.79
2.99
Курс валют
Курс валют
$
63.78
2.01
65.79
2.99
Меню
Поиск по сайту

Сэрии ветерана Терентий АЛАННЫРОВ олоҕуттан

08.05.2022 (2 недели назад) 06:55 1
Сэрии ветерана Терентий АЛАННЫРОВ олоҕуттан

Терентий Григорьевич АЛАННЫРОВ 1924 сыллаахха тохсунньу 21 күнүгэр төрөөбүтэ. Кини 1944 Ньурба орто оскуолатыгар 8-с кылааһыгар үөрэнэ сылдьан армияҕа ыҥырыллан Аҕа дойду улуу сэриитигэр барбыта.

Японияны кытта сэриигэ Хинган хайаларыгар тиийэн, кимэн киирии харгыстанаары гыммытыгар, үөһэттэн бирикээһи кэтэспэккэ, дьоппуон этэрээттэрин минометынан ытыалаан кыайыыны ситиһиигэ улахан көмө буолан, командование үрдүк махталын ылбыта.

Сэрииттэн 1947 с. “За боевые заслуги” икки мэтээллээх, элбэх уордьаннаах кэлбитэ. Улахан быраһынньыктарга түөһэ килэччи мэтээл, уордьан буоларын киэн тутта көрөөччүбүт.

1947 с. Дьокуускай куоракка почта отделениетын начальниктарын курстарыгар үөрэнэн 1948-1949 сс. Араҥастаахха почта начальнигынан үлэлии кэлбитэ. Онно олоҕун доҕорун эдэркээн учуутал кыыһы, кэлин РСФСР үөрэҕириитин туйгунун Николаева Мария Николаевнаны көрсөн ыал буолбуттара.

Кинилэр алта оҕоломмуттара, 22 сиэннэммиттэрэ, 13 хос сиэннэммиттэрэ. 1950 с. Аланныровтар Ньурбаҕа көһөннөр Терентий Григорьевич радиоузелга үлэлээбитэ. Ол сыл Горькай куоракка курска үөрэнэн кэлбитэ. Онтон ыла үрдүк кылаастаах монтерунан бэйэтэ “сөп буоллум” диэн пенсияҕа тахсыар диэри үлэлээбитэ.

Кини Ньурба бөһүөлэгин, улууһун телефонун, радиотын линияларын аан маҥнай тардааһыҥҥа, кэнники ол линиялар саахала суох үлэлииллэригэр элбэх сыратын биэрбитэ. Үрдүк сатабыллаах монтер-верхолаз буолан өрүстэри, үрэхтэри туоруур линиялар 40 миэтэрэҕэ тиийэ үрдүктээх мачта остуолбаларын туруорааһыҥҥа, ол остуолбаларга өрүһү туора тардыллар борубулуохалары монтажтааһыҥҥа кини сылдьаччы. Дэлэҕэ да Күндээдэ аннынан туоруур мачталарын дьон билиҥҥэ диэри “Аланныров остуолбалара” диэн ааттыахтара дуо? Итинник мачталарга тахсан үлэлииргэ улахан эппиэтинэстээх, бэйэтин чахчы кыанар, эр сүрэхтээх, сатабыллаах эрэ дьоннор сылдьаллара.

Хороҕо Бүлүүнү туоруур мачтатыгар Үөһээ Бүлүү монтера 10-ча миэтэрэни тахсан баран, кыайан түһэр да кыаҕа суох турдаҕына, Терентий Григорьевич мачтаны нөҥүө өттүттэн тахсан биирдии-биирдии сыҕарыйан киһитин кууһан сиргэ түһэрэн турардаах.

Оччотооҕута сибээс үлэтэ байыаннай аҥаардаах этэ, транспорт диэн суоҕа, барыта илии, хары күүһүнэн оҥоһуллар буолара. Монтердар кыһынын тымныы, сайынын итии диэбэккэ үлэлиир тэриллэрин сүкпүтүнэн, түүн-күнүс диэн бириэмэни аахсыбакка сатыы сылдьаллара. Терентий Григорьевич элбэх эдэр оҕолору бэйэтин идэтигэр уһуйан, үөрэтэн, такайан таһаарбыта, олор билигин бэйэлэрэ саастаах дьон. Кини сырдык мөссүөнэ биһиги өйбүтүгэр-санаабытыгар өр сылларга хаалыаҕа.

***
Ньурбатааҕы “Сахателеком” үлэһиттэрин, ветераннарын ахтыыларыттан
Бэс ыйын 29 күнэ, 2004 с.

Обсуждение • 1

Добавить комментарий
  1. Ньурба олохтоо5о

    Терентий Аланныровы Нюрбалар ойдуубут. Наhаа бэhиэлэй элэккэй майгылаах этэ.

Оставить комментарий