Ньурба улууһун баһылыга Алексей ИННОКЕНТЬЕВ олохтоох аэропорду тутуу туһунан

Бу күннэргэ ньурбалар бассаап-бөлөхтөрүгэр “пуорду тутар бэдэрээччит үлэтин кыайбакка куоппут үһү” диэн сураҕы соһуйа тарҕатыстылар. Ааспыт үйэттэн диэбиккэ дылы, Амакинскай экспедицияҕа анааан тутуллубут аэропорт балаһата, хаар-самыыр түстэҕин аайы алдьанан-кээһэнэн сөмөлүөт түспэккэ эрэйдиир, дьон бөҕө хаайтарар. Дьэ быйыл пуорт балаһатын оҥорон саҕалаабыттара, онтон ити сурах тарҕаммытын дьон сүрдээҕин айманан иһиттэ.

Онуоха улуус баһылыга Алексей Иннокентьев маннык быһаарыы биэрдэ:

-Бу күннэргэ социальнай ситимнэринэн кэтэһиилээх Ньурбатааҕы аэропорпут көтөр-түһэр балаһатын саҥардан оҥоруу саҕаламмытын кэннэ, генеральнай бэдэрээччит харчыны ылан баран сүтэн хаалбыт диэн ис хоһоонноох суруктар тарҕаннылар. Ити бэрэбиэркэлэммэтэх сурукка итэҕэйбэккитигэр ыҥырабын.

“Аэропорты Севера” ФКП генеральнай дириэктэрэ Вадим Валерьевич Волковтыын кэпсэтэ сырыттыбыт. Кини: “Сымыйа, букатын олоҕо суох фейковайиһитиннэрии тахса турар, үлэ график быһыытынан бара турар”, – диэтэ.

Аэропорт балаһатын тутарга хос бэдэрээччит быһыытынан тиэйэр-таһар үлэҕэ Ньурба  улууһуттан биһиги  урбаанньыттарбыт үлэлии сылдьаллар. Кинилэр 60-ча тыһ. туонна буору көтөр-түһэр балаһа оннун үрдэтэн куппуттара. Билигин Ньурбаҕа тутуу надзорун үлэһитэ кэлэ сылдьар. Кини барытын көрөн бигэргэттэҕинэ эрэ федеральнай бүддьүөттэн харчы кэлэн урбаанньыттарбытыгар төлөнүөхтээх. Бу эбийиэк федеральнай үп суотугар тутуллар, онон  улахан хонтуруолга сылдьар.

Билигин бары билэбит – федеральнай харчы булгуччу надзорнай уорганнар илии баттаабыттарын эрэ кэнниттэн төлөнөр. Онон ити “генеральнай бэдэрээччит харчы ылан баран куоппут, сүппүт” дииллэрэ олоҕо суох. Вадим Волков эмиэ ону бигэргэтэр. Ньурба пуордун көтөр-түһэр балаһата саҥардан оҥоһуллан 2023 с. үлэҕэ киирэрэ былааннанар.

***

Aartyk.Ru