Дьааҥыга “Таастан кутуллар дорҕооннор” ырыа түһүлгэтигэр көмүс күөмэйдээхтэр муһуннулар

Дьааҥы улууһун Суордаах нэһилиэгэр 2007 сыллаахха олохтоох Сынньалаҥ киинин үлэһиттэрэ Дмитрий Егорович Васильев уонна Семён Афанасьевич Слепцов көҕүлээн “Таастан кутуллар дорҕооннор” диэн ааттаах улуустааҕы ырыа түһүлгэтэ тэриллибитэ.

Быйыл, 2022 сыл Россия норуоттарын исскуствотын уонна культуратын сылынан биллэриллибитигэр анаан Суордаахха “Таастан кутуллар дорҕооннор” ырыа түһүлгэтэ улуустар икки ардыларынааҕы зональнай конкурс быһыытынан тэриллиннэ.

Бастакы зональнай ырыа күрэҕэр Дьааҥы нэһилиэктэриттэн уонна Эбээн Бытантай национальнай оройуонтан 21 ырыаһыт муһунна. Муус устар 8-9 күннэригэр икки түһүмэҕинэн тэриллибит ырыа күрэҕин Гран-при кыайыылааҕын үрдүк аатын Эбээн Бытантай ырыаһыта Иван Горохов ылла. Бастакы истиэпэннээх лауреат аата эмиэ Эбээн Бытантайтан кэлбит ыалдьыкка – Илья Колесовка тигистэ. Иккис истиэпэннээх лауреат аата Дьааҥы улууһун Дулҕалаах нэһилиэгин ырыаһытыгар Тамара Андросовага туттарылынна. Үһүс истиэпэннээх лауреат аатын өссө биир Эбээн Бытантай улууһун ырыаһыта Василий Стручков ылла. Бастакы истиэпэннээх Дипломант – Айталина Неустроева (Дьааҥы, Боруулаах), иккис Дипломанынан – Николай Слепцов (Дулҕалаах, Дьааҥы),  үһүс Дипломанынан – Анита Юмшанова (Табалаах. Дьааҥы) буоллулар.

Анал номинацияларга “Көрөөччү биһирэбилэ” бириис Тамара Андросоваҕа тигистэ (Дьааҥы, Дулаҕалаах). “Саҥа аат” номинация Николай Слепцовка (Табалаах), “Ымыылаах ырыаһыт” – Светлана Слепцоваҕа (Табалаах), “Кэскиллээх ырыаһыт” – Наталья Гороховаҕа (Үөттээх нэһилиэгэ), ” Иэйиилээх ырыаһыт” – Марфа Колесоваҕа (Суордаах), “Дорҕоонноох ырыаһыт” – Александра Чукроваҕа дохсун ытыс тыаһа доҕуһуоллаах туттарылынна.

Ырыа түһүлгэтин таһынан, иккис күҥҥэ Суордаахтааҕы “Арчы” дьиэтигэр Айар куттаахтар көрсүһүүлэрэ буолла. Уран тарбахтаахтар оҥоһуктарын уонна коллекционердар быыстапкалара тардылынна. Улуустааҕы “Эчий” литературнай түмсүү кыттыылаахтара айымньыларын билиһиннэрдилэр, айар – суруйар санааларын үллэһиннилэр.

“Таастан кутуллар дорҕооннор” ырыа түһүлгэтин бочуоттаах, кэрэхсэллээх анал ыалдьытынан Дьааҥы улууһун соҕотох “Хотугу төрүт норуоттар түөлбэлээн олорор сирдэрэ” диэн государственнай статустаах Табалаах нэһилиэгин Этно – культурнай киинин коллектива буолла.  Василий уонна Саргылана Потаповалар өр сылларга салайар Табалаахтааҕы культура коллективтара Дьааҥыга культура биир төһүү киининэн буолалларын өссө төгүл кэнсиэртэринэн бигэргэттилэр.

Уһук, кытыы нэһилиэккэ икки күннээх ырыа, культура дьоротун тэрийбит Дьааҥы улууһун культуратын управлениетын салайааччыта Надежда Васильевна Саввинова уонна Суордаахтаагы Культура дьиэтин директора Семён Афанасьевич Слепцов кэлбит, кыттыбыт бары ыалдьыттарга, истиҥ көрөөччүлэргэ, бу тэрээһини өйөөбүт Дьааҥы улууһун дьаһалтатыгар, баһылык Гаврил Ильич Чириковка махталларын тиэртилэр уонна “Таастан кутуллар дорҕооннор”, аныгыс көрсүөххэ диэри!” диэн бар дьон аатыттан эттилэр.

***
Владислав КРИВОШАПКИН,

Дьааҥы улууһун Мунньаҕын депутата.

Ааптар хаартыскаҕа түһэрдэ.