Курс валют
$
92.26
0.33
99.71
0.56
Курс валют
Курс валют
$
92.26
0.33
99.71
0.56
Меню
Поиск по сайту

Суукка төрөөбүт тылынан көмүскэнии бобуллар?

16.04.2021 16:51 0
Суукка төрөөбүт тылынан көмүскэнии бобуллар?

Социальнай ситим нөҥүө “аны суукка саха тылынан көмүскэнии бобуллар үһү” диэн сурах тарҕанна. Ол төрүөтүнэн ИДьМ солбуйар миниистирэ Климов суругун тарҕаттылар.

Докумуону аахтахха, ханна да саха тыла бобуллар диэн ыйыы-кэрдии суох курдук. Ол эрээри сорох дьон “иһэ истээх сурук” диэн этэллэр.

Aartyk.Ru экспертэрэ манна туох санаалаахтар эбит?

Ольга ТИМОФЕЕВА. адвокат:

-Сахалыы саҥалаах көмүскээчилэри долгутар, таарыйар боппуруос. Биллэн турар, сууттанар эбэтэр эмсэҕэлээбит киhи төрөөбүт тылынан санаатын-оноотун толору этинэрэ табыгастаах. Ону сокуоммут хааччахтаабат. УПК 18 ыстайатыгар ыйылла сылдьарын курдук, сатаан судопроизводство тылын олох өйдөөбөт эбэтэр толору өйдөөбөт буоллахтарына, тылбаасчыт баар буолар, онон суукка тиийэн төһө баҕарар сахалыы этиэххэ-тыыныахха сөп.

Ону таhынан дьыалаттан илиигэ бэриллэр докумуоннар бары тылбаастаналлар. Онтон судопроизводство тылын ылан көрдөххө, сокуоҥҥа ыйылла сылдьар балаhыанньа олоххо туттуллара уустуктардаах диэххэ сөп. Тоҕо диэтэххэ, биир өттүнэн маннык диэн баар: “Уголовное судопроизводство ведётся на русском языке, а также на государственных языках входящих в Российскую Федерацию республик”. Онтон салгыы аахтахха маннык этиллэр: “В Верховном суде Российской Федерации, кассационных судах общей юрисдикции, апелляционных судах общей юрисдикции, военных судах производство ведётся на русском языке”.

Онон Үрдүкү сууттар бары нууччалыы тылынан бараллар. Ол аата, силиэстийэ, бастакы суукка  дьыала сахалыы барбыт буоллаҕына, Үрдүкү сууттарга дьыала барыта тылбаастанан тиийиэхтээх. Ол иhин буолуо, толору сахалыы тылынан барбыт дьыалалар лаппа аҕыйаатылар. Дьиҥинэн ыллахха, киhиэхэ саамай тыҥааhаннааҕа бэйэтин санаатын төрөөбүт тылынан толору тиэрдии. Ол сокуоҥҥа баар, билигин сууттар ону толору хааччыйаллар. Ол гынан баран биһиги сахалыы тылынан суруллубут УК, УПК -5а олус наадыйабыт, баара буоллар диэн кэтэhэбит.

Оттон ити Климов суругар сокуону кэhии баарын көрбөтүм, дьыаланы сахалыы ыытар буоллаххытына, булгуччу  тылбааhа баар буолуохтаах диэн ирдэнэрэ сөп ээ, – диэн Ольга Михайловна түмүктүүр.

Сорохтор, суукка-сокуоҥҥа анал үөрэхтээх тылбаасчыттар тиийбэттэрин бэлиэтииллэр.

Марк ЕРОЕВ, юрист:

– Холуобунай процессуальнай кодекс ыйарынан, тылбаасчыт диэн  туһунан процессуальнай сирэй. Биир дьыаланы сүүс киһи тылбаастыа суохтаах. Аны ол билигин хамнаһа суох үлэ. “Федеральнай полномочие” диир буоллахтарына, федеральнай бюджеттан тылбааска харчы көрүллүөхтээх. Аны биир киһи улуус суута көрөр дьыалатын барытын тылбаастыыра уустук. Онон хамнастаах сыалай хас да үлэлиир киһи баар буолуон наада.

Онтон дьыаланы икки тылынан тэҥҥэ ыытыы диэн ханна да суох. Следователь дьыала саҕаланыытыгар “язык судопроизводства” диэн нуормаҕа олоҕуран, ханнык тылынан ыытарын быһаарар. Биир тылы. Россияҕа бэрэбиэркэҕэ барар дьыалалары тылбаастаан ыытааччылар.

Мин саныахпар, ити следовательскай, прокурорскай надзор, судейскай састааптан сахалары суох оҥорууга холонуу курдук. Конституционнай суут сабыллыан иннинэ итиннэ саха тылын көмүскэлигэр туочука туруоттарыахха баара да… Мин билэрбинэн, билигин Саха сирин Конституционнай суута саҥа дьыалалары ылбат буолбут диэн өйдөөтүм. Номнуо сабылларга бардаҕа.

Салгыы бу тиэмэҕэ өссө икки эксперт санаатын бэчээттиэхпит.

***

Aartyk.Ru

 

Оставить комментарий