ХОДУҺАЛАРГА, БААҺЫНАЛАРГА ҮЛЭ ТОХТООБОТ

Быйылгы сайын биир өттүнэн көрдөххө мэччирэҥ күөҕүнэн чэлгийэн үүт балайда ыанна, от да үүнүүтэ куһаҕана суох. Онон өрөспүүбүлүкэ үрдүнэн ылан көрдөххө, уһун кыстыкка наада буолар аһылык баар диэн этиэххэ сөп. Ол эрээри сайын ортото Өлүөнэ эбэбит олус улахан ууну аҕалан оттуур сирдэр бэрт өр уу анныгар сытаннар өрүс сүнньүнэн ходуһалардаах улуустарга, хаһаайыстыбаларга мэһэйдэри үөскэтэ сырытта. Ол да буоллар отчуттар үлэлэрэ намыраабат. Бу күннэргэ хомуур үлэтэ тэтимнээхтик бара турар. Онон бу хайысхаҕа да сотору кэминэн түмүктэр баар буолуохтара.

«Туймаада» Агрохолдинг АУо хаһаайыстыбалара төһө да уустуктар баалларын үрдүнэн быйыл от үлэтигэр биир да күнү сүтэрбэккэ күүскэ үлэлии сылдьаллар. Ону тэҥэ хомуур үлэтэ өссө да салҕанан бара турар. Билиҥҥи туругунан «Өлүөхүмэ кыладабыайа» ХЭУо  292 тн оттоох, 409 тн сенажтаах уонна 2107 тн сиилэстээх. Онтон «Туймаада» Экоферма отчуттара бу күннэрдээҕи чахчыларынан 1380 тн оту бэлэмнээбиттэр. Ол иһигэр Нөмүгү отделениета 850 тн, Дьокуускайдааҕы отделение  530 тн оттоохтор. Итини таһынан тэрилтэ 916 тн сенажтаах уонна 1960 тн сиилэстээх. «Бөртө сылгы собуота» хаһаайыстыба отчуттара 2245 тн оту оттоон борогунуостаммыт соруктарын толорбуттар. Итини таһынан 792 тн зеленканы, 1190 тн сиилэһи бэлэмнээбиттэр. “Совхоз Новый” АУо быйыл сайын 380 тн оту, 88 тн зеленканы уонна 1472 тн сиилэһи уган олороллор. Победалар быйыл окко ситиһиилээхтик үлэлээтилэр. Ол курдук бу хаһаайыстыба отчуттара 415 тн оту бэлэмнээн былааннарын сиппиттэр. Күһүҥҥү хомуур үлэтэ билигин да салҕанан бара турар. Онон үчүгэйдик аттаран туруордахха кыстыкка дороххой да, сүмэһиннээх да аһылыгынан хааччыллыы кыаллар туруктаах.

***
Прокопий ХАБАРОВ