Бу туһунан норуот синоптига Тускул «Тэтим» араадьыйаҕа күнү-дьылы билгэлиир оптуорунньуктааҕы биэриитигэр бэлиэтээтэ. Бэҕэһээ, бэс ыйын 17 күнүгэр, киһи тулуйбат куйааһа түһэн баран, киэһэ 9 чаас саҕана күүстээх тыал, кураанах чаҕылҕанынан киин куораты тулалаан кэбистэ. Онон Тускул бүгүн, чэппиэртэн, биллэрдик сөрүүкээн барарын билгэлээбитэ сөп түбэһэн эрэр. Дьэ, онон оптуорунньуктааҕы биэриитигэр Тускул туох диэн сэрэттэ?
— Бэс ыйын 21, 24, 29, 30 күннэригэр ардах кэлээри турар. Бу от-мас үүнэригэр туһалаах сөҥүү. Ыам ыйын 22 күнүттэн бэс ыйын 22 күнүгэр диэри – биир ый устата самаан сайын сатыылаан турар кэмэ. Бу нэдиэлэ бүтэһигэр диэри киин улуустарга улаханнык сөрүүкээн ылыаҕа. Ол курдук, Дьокуускайга, Намҥа, Покровскайга түүн +6, күнүс +13 кыраадыс кэриҥэ буолуоҕа. Илин эҥэр улуустарыгар түүн +5, күнүс +13 кыраадыс буолуоҕа. Аммаҕа нэдиэлэ алтыс күнүгэр — субуотаҕа түүн кыраадыс +3 буолуоҕа. Бу хаһыҥҥа тэҥнээх. Онон оҕуруоккутун эрдэттэн бүрүйэргэ бэлэмнэниҥ. Уус Маайа, Ытык Күөл, Томпо улуустарын эҥэр бээтинсэҕэ уонна субуотаҕа оҕуруотчуттарга эмиэ олус сэрэхтээх күннэр. Манна түүн +3-4 эрэ кыраадыс сабаҕаланар. Горнайдар эмиэ оҕуруоттарын көрө-истэ, бүрүйэ сылдьаллара наада – манна + 4 кыраадыс буолуох курдук. Онон бу нэдиэлэни түмүктүүр хаалбыт үс-түөрт күҥҥэ оҕуруокккутун кэтии-маныы, бүрүйэ сылдьыҥ. Тымныы үүнүүгүтүн бытаардыан эбэтэр олох да тохтотуон сөп.
Бүлүү эҥэрдэргэ — түүн +5, күнүс +6 кыраадыс. Сунтаарга түүн +3-5 кыраадыс сөрүүкүөҕэ. Бу эмиэ хаһыҥҥа тэҥнээх. Өлүөхүмэ эҥэр түүн +5, Алдаҥҥа түүн +1-2, Кэбээйигэ – түүн +5, күнүс +14 кыраадыс буолара сабаҕаланар. Онон бу улуустары кытта ыаллыы сытар оройуоннар эмиэ олох сэрэхтээх буолуохтарын наада.
Өймөкөөҥҥө уонна Муомаҕа түүн +9, күнүс +22 кыраадыс сылыйыаҕа. Бу Халыма улуустарыгар сылыйарын кытта сибээстээх. Бу эҥэр түүн + 12, күнүс + 22 кыраадыс буолуоҕа.
Кэлэр 15 күннээҕини анаардахха, Илин эҥэргэ, киин улуустарга этиҥнээх ардах түһэн ааһыаҕа. 20,21, 22 күннэргэ сөрүүн: күнүс +15 кыраадыс. Бэс ыйын 23, 24, 27, 28 күннэригэр — ардахтаах. Бүлүү эҥэр түүн +5, күнүс +15. Бэс ыйын 22 күнүгэр 15, 25 кыраадыс сылыйыаҕа. 17 чыыһылыттан манна ардах суох. Өлүөхүмэҕэ 22 чыыһылаҕа диэри ардах, сөрүүн буоллаҕына, 24 чыыһылаттан сылыйан барыаҕа. Кэбээйигэ бу ый бүтүөр диэри сылаас – 22 чыыһылаттан түүн +15, күнүс +25. Дьааҥыга бэс ыйын 23-25 күннэригэр – ардах. Халыма—Индигиир улуустарыгар быстах ардах эмиэ үгүс. Өлөөҥҥө тымныйыаҕа – 0, +8 кыраадыска тиийэ сөрүүкүөҕэ. Тиксиигэ 0 кыраадыс бэлиэтэниитэ бэс ыйыгар 21-23 күннэригэр ардыырын, бэс ыйын 25-26 хаардаах ардах түһэрин кытта ыкса сибээстээх. Хаар быйыл сайын Тиксиигэ тохтуо суох. Ол тымныыта Саха сирин улуустарыгар эмиэ биллэн ааһар буолан, бу күннэргэ тымныйан ылыаҕа. Онон бу күннэргэ кэлэр кыстыкка бэлэмнэнэн, оҕуруот үүнээйитин олордубут дьон тымныы өрөбүл күннэргэ сэрэниҥ, оҕуруоккутуттан тэйимэҥ, бүрүйэ сылдьыҥ.
Оставить комментарий