Паромнар сырыылара хаһан тохтууруй?

Саха сиригэр уу суолунан айан түмүктэнэн эрэр. Бу уустук кэмҥэ паромнар хайдах үлэлииллэрин, сыаналара төһө буоларын туһунан СӨ Тырааныспарга министиэристибэтэ иһитиннэрдэ.

Росморречфлот дьаһалынан, навигация официальнайдык сабыллыбытын кэннэ уонна өрүскэ муус туруор диэри, таһаҕаһы мууска сылдьарга аналлаах паромнар уонна баржалар таһыахтара.

Паромнар хаһан тохтууллар?

• Дьокуускай — Аллараа Бэстээх: паромнар барыллаан алтынньы бүтүөр диэри үлэлиэхтэрэ, онтон анал эрэсиимҥэ көһүөхтэрэ.
• Бүлүү өрүһүгэр: барыллаан алтынньы 7–10 күннэригэр сабыллыа.
• Алдан өрүһүгэр (Мэҥэ-Алдан — Кэскил): алтынньы 14–16 күннэригэр сабыллар.

Болҕойуҥ: Бу болдьох халлаан туругуттан көрөн уларыйыан сөп.

Сыана хайдах буоларый?

Алтынньы ортотугар диэри сайыҥҥы тарыыптар үлэлииллэр. Онтон «күһүҥҥү суол» саҕаланнаҕына, таһыы сыаната биллэ үрдүөҕэ. Саҥа сыаналары «Паромы Якутии» ХЭУо биллэриэҕэ. Сэтинньиттэн Жатай — Төхтүр хайысханан таһаҕаһы «ЛОРП» ПАО ледоколлаах хараабыллар арыаллааһыннарынан таһыаҕа (сыаната хампаанньа саайтыгар тахсыаҕа).

Навигация официальнайдык сабыллыбытын кэннэ, судаарыстыба таһыы сыанатын хонтуруоллаабат — таһааччылар сыананы бэйэлэрэ быһаллар!

Дьону хайдах таһыахтарай?

Муус туруутун кэмигэр дьону салгын сыттыктаах суудуналарынан уонна аэроботтарынан («хивустарынан») таһыахтара. Сүрүн маршруттарынан уопсайа 30–35 суудуна үлэлиэҕэ, олортон 25-һэ — «Дьокуускай — Аллараа Бэстээх» суолугар.

Тырааныспар министиэристибэтэ айаны уонна таһаҕаһы тиэрдиини эрдэттэн былаанныырга сүбэлиир. Паромнар сырыыларын билэргэ «Паромы Якутии» мобильнай сыһыарыыны (RuStore, AppStore) эбэтэр paromonline.sakha.gov.ru саайты туһаныҥ.

***

Ааптар: Василий Прокопьев

Хаартыска: sakha.gov.ru ылылынна