Октябрьскай (Ойуун ууһа) нэһилиэгин дьоно учаастактарынан бытанан олоруохтарын инниттэн бу күнү бэлиэтээччилэр.
Алаадьы астаан, кус буһаран, кымыс оҥорон. Мин кыра эрдэхпинэ, Бадарааннаах учаастагар Уойка эмээхсин оҕолору батыһыннаран, бу күн, айылҕаҕа таһаара сылдьыбытын өйдүүбүн. Ол күн мин олохпор, биир саамай сырдык күн курдук хаалан хаалбыт.
Оҕо эрдэхпинэ, эмээхситтэр көр-күлүү курдук кэпсииллэрин өйдөөтөххө, бу ыйга ыраастаныы диэн баар эбит.
Балаҕаны, тиэргэни сууйан, хомуйан бүтэн баран өссө кыһыны быһа, бөххө сөрөнөн, мустубут абааһылары үүрүөххэ наада .
Ааҥҥын аһан, манна баара буолуо диэбит сиргин, үөт түрэҕинэн сипсийэллэр. Холобур: орон аннын, оһох кэннин, чуолҕаны- чуулааны быттыгы хонноҕу- барытын. Көстүбэт абааһыны талаҕынан быста сынньан, аан диэки үүрэн дьиэттэн таһаараҕын. Сипсийбит сиргэр бөх баар буоллаҕына таһааран, түптэҕэ уматаллар. Ол кэнниттэн суунан-тараанан баран талаҕынан охсунан хара-дьайы бэйэҕиттэн үүрэҕин. Маннык ыраастаныы, дьиҥинэн, Ньукуолун буолуо 3 күн иннинэ бүтүөхтээх эбит.
Инники ахтыбыт, Уойка эмээхсин биһигитини батыһыннарарыгар үчүгэйдик таҥныбыт этэ. Кини хара сирдээх, сибэкки ойуулаах ырбаахылаах уонна ып- ыраас эмиэ сибэкки ойуулаах маҥан былааттаах этэ. Кини оҕолору батыһыннаран алааһыгар ситии ыйыы уонна дойду иччитин арыылаах алаадьынан, кымыһынан күндүлүү, айылҕатыгар махтана, үчугэйи көрдөһө тахсыбыт, бу санаатахха.
Ситиини тыыннаах сылгы сиэлинэн эриэн -дьураа гына хаталлар эбит былыргылар. Онно таҥас сыыһын ыйаан саламалыыгыт. Уонна күндүлүүр арыылаах алаадьыгыт мас кытыйаҕа угулла сылдьыахтаах, төһө кыалларынан. Кымыһы чороонтон эбэтэр туос ыаҕыйаттан улахан мас хамыйаҕынан уоккут тула уонна салама ыйаммыт мастарын төрдүлэригэр, халбыйан ылан алгыы-алгыы ыһаллар эбит. Бу аата дойду иччитин аһаттыгыт. Кыра эрдэхпиттэр көрбүппэр-истибиппэр, онтон-мантан аахпыппар олоҕуран суруйдум.
Сайын кэлбитинэн! Эйгэҕит ыраас, тулаҕыт ыраас буоллун.
***
Тамара Егорова
Оставить комментарий