Кадыров тустууга түһүлгэтиттэн икки мэтээл

Чечня Республикатын киин куоратыгар – Грознайга, Ахмат-Хаджи Кадыров кэриэһигэр көҥүл тустууга үгэскэ кубулуйбут норуоттар икки ардыларынааҕы турнир түмүктэннэ.

Бу күрэхтэһиигэ саха тустууга кыһатын биэс иитиллээччитэ кытынна. Хапсыһыылар түмүктэринэн икки бөҕөспүт боруонса мэтээли ылары ситистэ.

Ол курдук, Манчаары Ильинов 61 киилэҕэ куһаҕана суох тустууну көрдөрдө. Кини бастаан дойду бу ыйааһыҥҥа биир күүстээх бөҕөһө Рустам Жильясовы (Оренбург) 4:3 ахсаанынан кыайан баран, Россия быйылгы чемпионатын үрүҥ көмүс призера Рамиз Гамзатовка (Ставрополь) хотторон кэбиспитэ. Онтон киһитэ финалга тахсыбытын иһин, Манчаары – “санааны уоскутар” бөлөххө кыттар буолбута.

Онно кини дагестанец Халид Магомедовы 3:2 ахсаанынан хотон, түһүлгэ боруонса мэтээлин иһин тустар кыахтаммыта. Ол эрээри, үһүс миэстэ иһин киирсиигэ кинини утары иранец Солтани тахсыбакка, кыайыы биһиги бөҕөспүтүгэр быһа бэрилиннэ.

Эдьигээн ыччата Манчаары Ильинов – республика таһыгар тиийэн, норуоттар икки ардыларынааҕы таһымнаах күрэхтэһиигэ бу бастакы мэтээлэ. Кини салгыы даҕаны маннык, бэйэтин кимтэн да толлубат характерын сайыннаран, кимиилээх тустуутун намтаппакка киирсэригэр, үүнэн-сайдан иһэригэр баҕарабыт.

Биир эрдэттэн эрэммит бөҕөспүт Константин Капрынов бу сырыыга бэйэтин күүһүн 74 киилэҕэ холонно. Кини бастакы эргииргэ дагестанец Гаджимурад Гаджиевка 2:3 ахсаанынан сабырыйтарда.

Салгыы күрэхтэһиигэ Гаджиев финалга тиийбитин быһыытынан, Капрынов уоскутар бөлөххө киирдэ. Онно бастаан дагестанец Магомедовы 8:5, онтон казах Сеилбековы 7:1 ахсаанынан хотон баран, боруонса мэтээл иһин иранец Фазлины кытта тустуохтааҕа да, киһитэ көбүөргэ тахсыбата. Ону быраабыла быһыытынан кэтэһэн түһэн баран, Константин илиитин өрө көтөхтүлэр.

Манна даҕатан эттэххэ, бу иранеһы Капрынов былырыын Монголияҕа буолбут түһүлгэҕэ 6:1 ахсаанынан эрэллээхтик хотон бастаабыта.

Кэнники кэмҥэ кимнээҕэр да эриэ-дэхси көрдөрүүлээх тустуукпут Константин Капрынов саҥа ыйааһыҥҥа тахсан миэстэлэспитэ үчүгэй. Кини кыттыбыт күрэхтэһиититтэн сырыы ахсын мэтээл аҕалан иһэрэ киһини үөрдэр.

Онон Кадыров тустуутуттан икки мэтээллэннибит. Санатан эттэххэ, Манчаары Ильинов уонна Константин Капрынов иккиэн – тренер Егор Терентьевич Пономарев салалтатынан эрчиллэллэр. Итинэн, тренери бэлиэтиир эмиэ оруннаах.

Атын уолаттарбытыттан, Александр Авелов (61 кг) — беларус Громыкоҕа 2:8, Никита Софронов (97 кг) – Сергей Козыревка 2:8, Никита Хабаров (125 кг) – иранец Жанмохаммадзадеҕа 0:3 ахсааннарынан хотторон эрдэ туораабыттара.

Күрэхтэһии түмүк көрдөрүүтэ:

57 кг: 1. Муса Мехтиханов (Россия), 2. Мунх-Эрдене Батхуяг (Монголия), 3. Юнус Явбатиров, Кежик Седен (иккиэн Россия).

61 кг: 1. Имам Умаров, 2. Рамиз Гамзатов, 3. Муслим Мехтиханов, Манчаары Ильинов (бары Россия).

65 кг: 1. Адам Аркхиев (Россия), 2. Ислам Гусейнов (Беларусь), 3. Шаттык Алайдар (Казахстан), Зелимхан Абакаров (Албания).

70 кг: 1. Азнаур Таваев, 2. Магомед-Эми Эльтемиров (иккиэн Россия), 3. Шахзодбек Ярашев (Узбекистан), Маис Алиев (Казахстан).

74 кг: 1. Анзор Закуев, 2. Гаджимурад Гаджиев, 3. Константин Капрынов, Хабиб Завурбеков (бары Россия). 79 кг: 1. Саид Сайдулов, 2. Гаджимурад Алихмаев, 3. Джамал Ахмадудинов, Касум Касумов (бары Россия).

86 кг: 1. Абдулла Цацаев, 2. Магомеднаби Магомедов (иккиэн Россия), 3. Турпал-Али Эльдаров (Албания), Альперен Атар (Турция).

92 кг: 1. Алан Багаев (Россия). 2. Шамиль Зубаиров, 3. Абубакар Абакаров (иккиэн Азербайджан), Юсуп-Хаджи Айдаев (Россия).

97 кг: 1. Махди Хажилоуеян Марафан (Иран), 2. Шамиль Тамбиев, 3. Асхаб Болтукаев (иккиэн Россия), Альперен Токгоз (Турция).

125 кг: 1. Зелимхан Хизриев (Россия), 2. Магомедхан Магомедов (Азербайджан), 3. Тамерлан Кумышев (Россия), Мортаза Жанмохаммадзаде (Иран).

***

Петр ПАВЛОВ