Күлүү киһи олоҕун уһатар

Өктөмнөөҕү норуот тыйаатырын көҕүлээһининэн Өктөм нэһилиэгэр Ксения уонна Егор Черкашиннар ааттарынан 4-c төгүлүн ыытыллар «Дьээбэ-хообо» диэн ааттаах аһаҕас көр-күлүү күрэһэ үрдүк тэрээһиннээхтик буолан ааста. Бу күрэскэ Уус Алдантан, Амматтан, Абыйтан, Сунтаартан, Чурапчыттан, Намтан, Мэҥэ Хаҥаластан, Кэбээйиттэн, Хаҥаластан 100-тэн тахса көрү-нары көҕүлүттэн туппут талааннаах дьон кытынна.

Дьүүллүүр сүбэҕэ Черкашиннар дьиэ кэргэн улахан уоллара, Саха Өрөспүүбүлүкэтин култууратын туйгуна, култуура уонна тыйаатыр бэтэрээнэ, көр-күлүү өрөспүүбүлүкэтээҕи күрэстэрин кыайыылааҕа Уус Алдан Тумулуттан Петр Черкашин, Өктөмнөөҕү норуот тыйаатырын артыыстара Алексей Харлампьев уонна Миралюба Саморцева үлэлээтилэр.

Кыттыбыт дьоммут бары даҕаны көр-күлүү көрүҥэр үчүгэйдик бэлэмнэнэн кэлбиттэрэ киһини үөрдэр. Дьүүллүүр сүбэ  бачча элбэх бөлөхтөртөн чулуулары таларга ыарахаттары көрүстэ. Ол гынан баран, күрэс аата күрэс, кыайыылаахтары улахан мөккүөр кэнниттэн маннык быһаардылар:

Кылаан-Чыпчаал үрдүк аатын Чурапчы улууһун Хатылы нэһилиэгиттэн «Хатыламмат хатылылар» бөлөҕө (салайааччы Слепцова Ирина) ылан кыайыы өрөгөйүн биллэ уонна Черкашиннар дьиэ кэргэн туруорбут 25 тыһ. солк. харчынан наҕараадаланна.

Бастакы үрдэли Уус Алдан Тумул сэлиэнньэтиттэн «Бэтэкэй бэтиэхэлэрэ» бөлөх (салайааччы Сухонина Анастасия), иккис үрдэли Уус Алдан Уһун Күөлүттэн «Сээркээн» көр-күлүү студията (салайааччы Борисов Иннокентий), үһүс үрдэл Нам улууһун Нам сэлиэнньэтиттэн «Laughter and joy» бөлөх (салайааччы Неустроева Ирина) ыланнар үөрүүлэрэ үрдээтэ. Кыайыылаахтар дипломунан, кубогынан, анал ааттарынан бэлиэтэннилэр.

Маннык көр-күлүү киэһэлэрэ буолаллара дьону-сэргэни сэргэхситэр. Кэлбит дьон үөрэн-көтөн, санаалара көтөҕүллэн, уйулҕалара көнөн, олоххо тардыһыылара үрдээн бараллар. Ол аата бу көр-күлүү киһини эмтиир күүстээҕин көрдөрөр. Өктөмнөр бу тэрээһини олус күүтэллэр, бу да сырыыга саала иһэ толору буолан, күүстээх ытыс тыаһынан ньиргийэ олордо.

Слепцова Ирина: «Бэттээхэй биир дьоһун тэрээһини бэлэхтээбиккитигэр махтал бастыҥын аныыбыт. Бэлиэтии көрбүппүнэн, элбэх ыччат, элбэх эр дьон кыттар буолбут. Илин эҥэргэ маннык көр-күлүү көрүҥэр күрэс суоҕун кэриэтэ. Онон маннык күрэстэр сайда, кэҥии, бу көрүҥү байыта турдуннар».

Сылын аайы ыытыллар көр-күлүү күрэһэр элбэх кыттааччы кэлэриттэн үөрэбит. Бары кыттааччыларбытыгар барҕа махталбытын тиэрдэбит. Эһиги дьону үөрдэн, өссө да айа-тута сылдьаргытыгар баҕарабыт!

***

Федора Фомина