Чурапчыга «Тыл-омук тыына» республикатааҕы форум

Бүгүн олунньу ый 18 күнүгэр лингвист, тыл үөрэхтээҕэ, бастакы алпаабыты айбыт С.А. Новгородов төрөөбүт дойдутугар, Чурапчы улууһугар,  «Тыл-омук тыына» бастакы республиканскатааҕы   форум ыалдьыттарын көрүстэ.  

Бу форумҥа  республикаҕа үлэлии олорор  Тыл политикатын республикатааҕы хамыһыйата кэлэн, улууска икки  күннээх улахан форуму тэрийэн ыытыахтара.   Ол курдук, Жиркова Римма Романовна Саха Өрөспүүбүлүкэтин Ил Дархан уонна Саха Өрөспүүбүлүкэтин Бырабыытылыстыбатын дьаһалтатын Тыл сайдыытын боппуруостарын сүрүннүүр управлениятын салайааччыта, билим хандьытаата, Саха Өрөспүүбүлүкэтин култууратын үтүөлээх үлэһитэ кэлэн кыттыыны ылыаҕа.

Бүгүҥҥү күҥҥэ  тыл үөрэхтээхтэрэ Турция, Анкара куораттыттан Хажеттепе үнүстүүт, аныгы түүр тылын кафедрата, билим хандьытаата Хасан Хайырсевер  кэлэн  ыалдьыттыы сылдьар. ​Кинини кытта Герцен аатынан Санкт Петербурдааҕы гуманитарнай университет илиҥҥи тыллары үөрэтэр кафедра доцена, билим хандьытаата Дубровина Маргарита Эмильевна,  Санкт-Петербург куораттан СПбГУ илиҥҥи тыллары үөрэтэр кафедра сэбиэдиссэйэ, билим хандьытаата Пылев Алексей Игоревич улууспутугар кэлэн үлэни-хамнаһы билсэ сылдьаллар.

​Кэлбит ыалдьыттары улуус баһылыга А.Т. Ноговицын  Арчы дьиэтигэр көрсөн, манна   арчылааһын сиэрин-туомун көрдөрдүбүт.  Улуус уопсай  сайдыытын, үлэтин -хамнаһын билсиһиннэрэр киэҥ кэпсэтии буолла.  Ыалдьыттарбыт саамай баҕа санаалара,  Чурапчы уллуһугар С.А.  Новгородов төрөөбүт дойдутугар сылдьыы эбит. Онон  бүгүн Болтоҥо ытык сиригэр  Чуораайытта алааска, Н.Д.Субурусскай аатынан Болтоҥо орто оскуолатыгар  активы кытта  көрүстүлэр.

​Бүгүҥҥү күн  икки аҥарыгар  «Современные проблемы в изучении генеалогии в Чурапчинском улусе» диэн темалаах научнай -практическай конференция ыытыллынна.

Россиятааҕы наука академиятын Сибирдээҕи салаатын гуманитарнай чинчийии уонна аҕыйах ахсааннаах хотугу норуоттар научнай сотруднига д.и.н. Борисов Андриан Афанасьевич кыттыыны ыллылар. Маны тэҥэ,  нэһилиэк баьылыктара, библиотека үлэһиттэрэ, суруналыыстар, ийэ тыл сүмэтин сайыннарарга соруктанар биир санаалаахтар мустан, бэрт истиҥ көрсүһүү ыытылла турар.

***

Надежда Борисова