БЭҔЭҺЭЭ Төҥүлү нэһилиэгэр эргэ оскуола дьиэтэ уокка былдьанна

Ол түмүгэр, аттыгар турбут музыкальнай оскуола объегын эмиэ баһаар уота илдьэ барда. Баһаары умуруорууга аналлаах биригээдэлэр, баһаарынайдар, нэһилиэк олохтоохторо, улуус дьаһалтата кэмигэр сөптөөх миэрэлэри ылан, эргэ оскуола аттыгар турар сорох объектары быыһаатылар.

Төҥүлү нэһилиэгин баһылыга Гаврил Данилов бүгүҥҥү мунньахха кэпсээбитинэн, баһаары умуруорууга дьон түүннэри утуйбакка, сарсыарда 7 чааска диэри үлэлээтилэр. Уот тахсыбыт биричиинэтин силиэстийэлиир кэмитиэт быһаарарга үлэлэһэр.

Быһылаан тахсыбытынан, улуус дьаһалтатын баһылыгын бастакы солбуйааччыта Семен Потапов баһаартан сэрэхтээх буолууга эппиэтинэстээх дьону түмэн, сөптөөх дьаһаллары ылынан, баһаартан эмсэҕэлээбит музыкальнай оскуола оборудованиетын ороскуотун ааҕалларыгар сорудахтаата. Маныаха маһынан тутуллубут объектар кэмиттэн кэмигэр страховкаланан иһэллэригэр болҕомтону күүскэ ууралларыгар эттэ.

Хаарбах туруктаах быраҕыллыбыт дьиэлэр-уоттар докумуоннарын бэрээдэктээн, эрдэ этиллибит дьаһаллары – эргэ дьиэлэри көтүрэн саҕалыылларыгар сорудахтаата Семен Потапов.

Улуус дьаһалтатын баһылыгын олох-дьаһах хааччыйыытын уонна территориялар сэрэхтээх буолуутун боппуруостарыгар солбуйааччы Георгий Куркутов маннык этэр: – Хаһаайына суох, быраҕыллыбыт дьиэлэри-уоттары ордук кырдьаҕас дьон туруорсан, эргэ дьиэлэри, объектары туһаҕа таһаарыахха диэн, көтүрэри утараллара баар суол. Ону нэһилиэк баһылыктара, улуус дьаһалтата аҕам саастаах дьон этэрин, туруорсарын истэр. Ол түмүгэр, хомойуох иһин баһаар уотун быһылааннара тахсаллар. Холобура, Төҥүлүгэ умайбыт эргэ оскуола электрическкай уоттан-күөстэн арахсан турар тутуу, онон уот, тахсыбыт биричиинэтэ билиҥҥи туругунан биллибэт. Онтон бу ыксаллаах быһыы-майгы тахсыбытыгар биһиги, баһаарга эппиэттээх дьон, баһаарынай сулууспа уолаттара хап-сабар үлэлээн, чугастааҕы объектары уоттан көмүскээһиҥҥэ дьуһуурустуба олохтоон, сөптөөх үлэни ыыттыбыт.

***
Улуус дьаhалтатын  пресс-сулууспата