Байыннай-патриотическай итиигэ бииргэ үлэлиэхтэрэ

Биир оннук дьаһал Чурапчы физическэй культураҕа уонна спорка государственнай институтугар ыытылынна. “БООТУР” (ВОИН) байыаннай-спортивнай бэлэмнэнии уонна патриотическай иитии Саха сиринээҕи Киинэ уонна институт бииргэ үлэлээһин СӨБҮЛЭҺИИТИГЭР илии баттастылар.

Институт ректората, преподавателлэр, байыаннайдыы таҥныбыт студеннар куораттан айаннаан кэлбит ВОИН” Киин Василий Иванович Егоров салайааччылаах бойобуой наҕараадалардаах инструктордар-методистар бөлөхтөрүн  үөрүүлээх быһыыга-майгыга көрүстүлэр.

Институт актовай саалатыгар тэриллибит көрсүһүүгэ институт ректора Иннокентий Готовцев эҕэрдэ тылыгар ыччаты патриотическай тыыҥҥа иитии,  байыаннай дьыалаҕа  бэлэмнээһиҥҥэ, “ВОИН” Киин институту кытта бииргэ практическай уонна теоретическай үлэлээһин Сөбүлэһиитигэр илии баттааһын государственнай суолтатыгар, институт ыытар үлэлэригэр, олор истэригэр, Анал Байыаннай Дьайыы (СВО) кыттыылаахтарыгар уонна кинилэр дьиэ-кэргэттэригэр материальнай, гуманитарнай көмөлөр оҥоһуллалларын, ыччаты патриотическай иитиигэ болҕомто уурулларын, “Боотур” диэн кулууп тэриллибитин, Бүтүн Россиятааҕы “Зарница” региональнай күрэхтэһиигэ, акцияларга ситиһиилээхтик кыттан миэстэлэспиттэрин, Россия таһымыгар ыытыллар дьаһалларга, научнай конференцияларга, күрэхтэһиилэр, форумнарга института кэллэктиибэ көхтөөхтүк кыттарын иһитиннэрдэ.

“ВОИН” Киин салайааччыта, “Эр санаа” уордьан кавалера Василий Иванович Егоров байыаннай-спортивнай, патриотическай Киин үлэтин, сыалын-соругун билиһиннэрдэ. “ВОИН” Кииҥҥэ Анал Байыаннай Дьайыыларга кыттыыны ылбыт государственнай наҕараадалардаах байыастар, Тюменнээҕи “Аванпост” байыаннай бэлэмнэнии киинигэр анал үөрэҕи ааспыт инструктор-методистар үлэлииллэрин билиһиннэрдэ. Бу иннинэ өрөспүүбүлүкэ үгүс уопсай үөрэхтээһин оскуолаларын, орто уонна үрдүк үөрэх кыһаларын кытта, ол иһигэр, М.К. Аммосов аатынан ХИФУ кытта бииргэ үлэлээһин Дуогабардарын түһэрсибиттэрин билиһиннэрдэ. Сөбүлэһии сүнньүнэн, ыччаттары, студеннары байыаннай-патриотическай иитиигэ, дойдуну көмүскээһиҥҥэ практическай уопут мунньуллан, үгүс өрүттээх үлэлэр ыытыллыахтара. “ВОИН” Киин базатыгар тиийэн сыалы ытыыга, бастакы суһал медицинскэй көмөнү оҥорууга, куттал суох буолуутугар, эти-сиини сайыннарыыга практическай занятиелар ыытыллыахтара, күрэхтэһиилэр буолуохтара, 114 чаастаах программанан хабыллыахтара. Үөрэнэ сылдьар ыччаттар армияҕа баралларыгар бэлэмнэнии түһүмэҕин ааһыахтара.

Дуогабар сүрүн сыалын-соругун билиһиннэрии кэнниттэн, Чурапчы физическэй культураҕа уонна спорка институтун ректора Иннокентий Готовцев уонна “ВОИН” байыаннай-спортивнай бэлэмнэнии уонна патриотическай иитии Саха сиринээҕи Киинин салайааччыта Василий Егоров бииргэ үлэлээһин Сөбүлэһиитигэр илии баттастылар. Дойдуну көмүскээһиҥҥэ практическай үөрүйэҕи иҥэриигэ, күннээҕи гражданскай олоххо, ыччаттары иитиигэ, сатабыллаах буолууга  эргиччи, улахан туһалаах докумуон ылылынна.