Курс валют
$
72.56
0.13
85.46
0.1
Курс валют
Курс валют
$
72.56
0.13
85.46
0.1
Меню
Поиск по сайту

Баҕалаах маска ыттар

02.12.2017 12:36 0
Баҕалаах маска ыттар

Бу күһүн Ньурба улууһун баһылыгын быыбарын кэмигэр биир хандьытаат Өлөксөөндур Уйбаныап, сүрэх-бэлэс бэрдэ, Эверест хайа ама чыпчаалыгар хатаастан олорон, Ньурба олохтоохторо кини туһугар куоластарын бириэхтээхтэрин туһунан тыастаах-уустаах тыл этэн куһуйбуттааҕа. Истибит дьон куолайдарыгар хомуок туран көмүскэлэрэ сиигирдэҕэ…

Уол, уопсайынан, тылын сиэбигэр уктубат, босхо тэлибирэтэр быһыылаах. Суоҕу да баар оҥорор, баары да суох оҥорор.

Бу сырыыга аны уолбут өрөспүүбүлүкэ араас тойотторун кытары ыбылы куустуспут хаартыскаларын Инстаграмҥа кэчигирэтэн баран, «хандьытаат быһыытынан оробуочай көрсүһүүлэргэ» сылдьыбытын, араас министиэристибэлэр, биэдэмистибэлэр тойотторо үөрэ-көтө көрсүбүттэрин, Ньурба куорат кэнэҕэс сайдыытын туһунан ирэ-хоро былааннаахтык кэпсэппиттэрин туһунан ууну-хаары эрдэн тарбаҕа күөрэҥнээн олорор.

А.Иванов Инстаграмҥа сирэйиттэн.

Түптээн үлэлиир миэстэтэ суох уол оҕо одьунааһа барытын ааһан иһэн аҥаар кырыытыттан «быһааран» кэбиспит.  Итинник ааһан иһэн проблеманы барытын быһаарар буоллаҕына, тоҕо да мээр буола сатаата быһа Ил Дарханныы барыах этэ. «Мээр» диэн миэлкэй хаһаайыстыбаннай, түбүктээх үлэ буоллаҕа. Өссө тура-тура араас дьон саҥатын истиэххэ, тулуйуохха диэтэххэ айаката бэрт дии. Ол кэриэтин онно-манна түһэ-тахса таарыйа биирдэ эмэ тойон атастарын санныга таптайа-таптайа, дьаһайа- соруйа сылдьыбыта ордук.

…Ону баара хаартыскаҕа кэчигирэспит тойотторбут уолбут тылыттан улаханнык соһуйдулар. Хайдах эрэ түөкүннэппит курдук санаммыттар. «Албыннаан хаартыскаҕа түһэн баран аҕытаассыйатыгар туттар дуо?!».

Алексей Петров, «Сахам сирэ ХХI үйэҕэ»  өрөспүүбүлүкэтээҕи үтүө дьыала хамсааһын тэрээһиннэрин олоххо киллэрэр отдел начальнига :

-Иэдээн киһи эбит! Ити киһи ахсынньы 15-20 күнүгэр аһыллыахтаах Убайааҥҥа саҥа тутулла турар детсадка оҕо миэбэлин спонсордыыбын диэн түөкүннээн хаартыскаҕа түспүтэ. Төрүт да умнан кэбиспиппин быыбар эрэ сах. Үлэбэр үлүһүйэ сылдьан ону эрэ санаабатахпын. Өссө мин үөрэн кэпсээн-ипсээн бөҕө буолтум, — Алексей Дмитриевич кэлэйэр.

-Төһө суумманы спонсордуох буолбутай?

-1 мөлүйүөнү.

-Тыый, ол дьоҕус нэһилиэк баһылыгынан үлэлээбит киһи, билигин үлэтэ суох киһи хантан оччо харчыланарый?

-Дьэ, ону бэйэтэ билэр. Мин үтүө санаалаах предприниматель кэллэ дии санаабытым…

-Уонна сокуон быһыытынан, быыбар кэмигэр хандьытаат харчынан, бэлэҕинэн тамнаныа суохтаах — куоластааччылары атыылаһааһын диэн ааттанар.  

Афанасий Владимиров, СӨ ыччат уонна дьиэ кэргэн политикатыгар миниистирэ агитационнай матырыйаалга хаартыскатын көрөн улаханнык соһуйда, абарбыт сирэйдээх киһи ойуутун ыытан баран:

-Быыбар кэмигэр Ивановы өйүүр туһунан кэпсэтии биһи икки ардыбытыгар букатын суох этэ. Телефонун нүөмэрэ баар буоллаҕына миэхэ ыытыҥ!

Миниистир бука хандьытааппытын муннукка-ханныкка ыкпыт буолуохтаах диэн сэрэйэбит. Туох диэн хоруйдаабыта буолла… 

Владимир Тихонов, СӨ култуураҕа уонна духуобунай сайдыыга миниистирэ:

-Көрөн соһуйдум. Быыбар туһунан кэпсэтии суох этэ. Итинник гынара сыыһа буоллаҕа.

Павел Аргунов, СӨ архитектураҕа уонна тутуу комплексыгар миниистири солбуйааччы:

-Хаартыскабын быыбар аҕытаассыйатыгар туттарыгар сөбүлэҥ биэрбэтэҕим. Мин быыбарга кими да өйөөбөппүн. Нэһилиэк баһылыга буолан олордоҕуна, син атын баһылыктары курдук билсэр этим. Туохха наадатын эппэккэ эрэ хаартыскаҕа түһүөх диэн көрдөспүтүн ылыммытым.

***

Дьэ диэтэҕиҥ… элик бэрдэ Эристиин Һааска эбит.

Оччотугар Эверест хайабыт эмиэ уруһуй буолан тахсар дуо? Дьиҥнээхтии бара сылдьыбыта эбитэ дуу, Элэ хайа тэллэҕэр олорон ыҥыран битиргэппитэ дуу…

***

Aartyk.Ru