Курс валют
$
71.88
0.96
78.44
0.65
Курс валют
Курс валют
$
71.88
0.96
78.44
0.65
Меню
Поиск по сайту

Амма таксиһа Прокопий Чемезов карантины туһалаахтык атаарарга ыҥырар

25.04.2020 07:35 0
Амма таксиһа Прокопий Чемезов карантины туһалаахтык атаарарга ыҥырар

Карантин кытаатан үгүс тэрилтэлэр дьиэҕэ олорон, дистанционнай да үлэҕэ көһөн, атыы-эргиэн кииннэрэ үлэлэрин тохтотон олох бытаарбыкка дылы. Биллэн туран, билигин ордук дьоҕус урбаан эйгэтигэр судургута суох күннэр үүннүлэр. Ол эрээри хас биирдии ирдэбил сөптөөҕүн өйдүүр киһи бу уустук кэми бэйэҕэ туһалаахтык атаарарга кыһаллар. Холобура, Прокопий Чемезов. Прокопий Егорович Амма улууһун биир уопуттаах таксиһа, уруулга олорбута ыраатта. Кини куруутун ып-ыраас, сымнаҕас массыынатынан удамыр сыанаҕа дьону Амма-Дьокуускай-Амма хайысханан тиэйэн элбэх махтал тыллары истэр.


Билигин төһө даҕаны эрэллээх түөрт көлүөһэлээх доҕоро олбуоруттан тахсыбакка турдар, Прокопий Чемезов санаатын түһэрбэт. «Ханнык баҕарар балаһыанньаны хайысхатын уларытан үчүгэй, туһалаах өттүгэр туһаайыахха сөп», – диир. Оннук, тыа ыалын сүпсүлгэнэ, үлэтэ биир олбуор даҕаны иһигэр элбэх бөҕө буоллаҕа. Кыһын, саас хатаҕалыы түспүт хаар ууллан, тэлгэһэ кууран хомуйарга, сиппийэргэ саамай кэмэ.

Саха эр киһитин быьыытынан Прокопий биир сөбүлүүр дьарыга – булт. Булт көҥүллэннэҕинэ кустуу бараары тыаҕа сылдьар УАЗ уонна таксилыыр Хайс массыыналарын өрөмүөннээн күнүн билбэккэ атаарар.


«Таксист киһи күн ахсын төһө киһини тиэйбиккиттэн хамнастанар буоллаҕыҥ дии. Айан, кэлии-барыы бобуллубута дохуоккар охсуулаах буолла буолуо?» – диэн ыйытабын. Киһим олох холку: «Үптээҕэр, харчытааҕар бэйэм, чугас дьонум доруобуйалара сыаналаах буоллаҕа. Карантины даҕаны киһи туһалаахтык атаарыан сөп: дьиэ кэргэҥҥэр болҕомто ууруохха, дьиэни-уоту өрөмүөннээн өрө тардыахха. Муус устар бүтүүтэ айан көҥүллэниэ дииллэр эрээри, биир бэйэм тохтоон эрэр санаалаахпын. Төһөнөн өр изоляцияланан олоробут даҕаны, соччонон бу ыарыыттан көмүскэллээх буолуохпут, салгыы тарҕаныытын, улууспутугар кэлиитин бопсуохпут» диэн санаалаах.


Прокопий Чемезов курдук дьонтон холобур ылан дьиэҕэ олорортон даҕаны туһалааҕы эрэ ылыахха, доруобай буолуохха.

***

Ааптар: Елена Александрова

Оставить комментарий    

!