Аҕыс ыал Украинаттан көһөн кэлбиттэр этэ…

Сэрии кэмин оҕолоро

Мин «Сэрии кэмин оҕотобун» гынан баран, ону соччо өйдөөбөппүн, ол саҕана кыра буолааҕым: 3-4 саастаах этим. Боккуой эдьийбэр (Максимова Прасковья Алексеевна) 2 ыйдаахпыттан иитиллибитим. Ийэбит сыл аайы оҕолонор этэ уонна доруобуйатынан да мөлтөх буолуо. Боккуой эдьиийим мэлдьи колхозка үлэлиирэ. Сайынын килиэп үтэр, кыһынын сиэмэ бурдуктан тарыыһа диэн сыыс от сиэмэтин ыраастыыллара (бэйэтэ биир куул курдугу). Ол сыыс от сиэмэтин ыраастыырга балтыбынаан сүрэҕэлдьии-сүрэҕэлдьии көмөлөһө сатыыр этибит. Колхозка дьааһыла диэн баара, онно хабархай баҕайы амтаннаах хааһыны сиэтэллэр этэ, ону сирэн сиэбэт этим, оннук сылдьан эдьиийбэр күрээн сиэрпэнэн бурдук быһа сылдьарыгар тиийбиппин өйдүүбүн.

Сэрии саҕаламмытын кэннэ, бадаҕа 42-43 сылларга биһиги колхозка 8 ыалы Украинаттан көһөрөн аҕалбыттара. Олортон икки ыал Гордиенко уонна Новгородцев диэн ыаллар 1949 сыллаахха диэри биһиги нэһилиэккэ олорбуттара. Эр дьонноро сэриигэ баран кэлбиттэрэ. Новгородцев танкист этэ. Кини колхозка бэрэссэдээтэлинэн үлэлээбитэ. Сорох украинецтар Покровскайга кирзаводка көспүттэрэ. Украинецтар оҕолоро Тумулга биһигини кытта сахалыы үөрэнэллэр этэ: Гордиенко Витя быраатынаан, Новгородцева Зоя, Нина диэннэр. Аллараа биэрэк үрдүгэр дьиэҕэ Каротько диэн украинец олорбута, онно таһырдьа нуучча оһоҕун туппуттар этэ, ол оһоххо эдьиийим килиэп үтэрэ. Кэнники Каротько көһөн бартын кэннэ, мин эдьиийбинээн, дьукаах ыалбытынаан Свинобоевтары кытта ол дьиэҕэ көспүппүт. Бурдук быһар косилкаҕа икки атынан аҕам Христофоров Дмитрий үлэлиир этэ. Эчи ыксалын, түргэнин, мин баҕас сороҕор түспүт бурдугу нэһиилэ туруортаан биэрэрим.

***

Копырина (Христофорова) Елизавета Родионовна

(«Сэрии кэмин оҕолоро» кинигэттэн)