Коффердам — түгэҕэ суох ыстаал киэли. Өрүскэ түһэрэн, уутун хачайдаан, иһигэр үлэлииргэ кураанах усулуобуйаны оҥорорго туһаналлар. Маннык ньыманы Саха сирин тыйыс тымныытынан талбыттар.
Үлэ хаамыытын Ил Дархан тус бэйэтэ кэтээн көрөр. «Якутия 24» телеханаал эпииригэр коффердамы туруоруу — үлэ сүрүн түһүмэҕэ буоларын бэлиэтээбитэ.
Итиэннэ Саха сирин баһылыга коффердам ньымата муостаны тутууга Россияҕа бастакытын туһанылларын чопчулаабыта.
Коффердамы туруорууну 120 исписэлиис салайда. Үс буксир уопсайа 4800 ат көлө кыамталаах, ыстаал киэли үрдүгэ 17 миэтэрэттэн үөһэ. Бу сиргэ өрүс дириҥэ 10-тан 13 миэтэрэҕэ тиийэрэ бэлиэтэнэр.
Билиҥҥи туругунан үстэн биир коффердамы таҥыы түмүктэммит. Үһүс, ортоку киэли диаметра 48 миэтэрэҕэ тэҥ, ыйааһына 2400 туоннаҕа тиийиэҕэ.
Оставить комментарий