Үйэтитииттэн сайдыыга

Агропрофилированнай оскуолалар төрүттэммиттэрэ 30 сылын көрсө Тыа хаһаайыстыбаннай судаарыстыбаннай академиятыгар фотограф-полиграфист Татьяна Новгородова хаартыскаларын быыстапката аһылынна.

Улуу суруйааччы Расул Гамзатов «Куораттарга норуот, тыа сиригэр омук олорор!» – диэн бэргэнник этэн турар. Дойдуну уларыта тутуу кэмигэр тэриллибит агрооскуолалар олохтоох омук төрүт дьарыгыттан илиитин араарбакка, тылын, үөрүйэҕин, үгэһин симэлиппэкэ сайдарыгар анаан улахан үлэни ыыттылар.

Уруһуй учуутала идэтин талан үлэлээбит Татьяна Новгородова: “Бу оскуолаларга үөрэнэр оҕолор эйгэлэрэ олох ураты. Айылҕа ситимин чугастык алтыһар оҕолор үлэ түмүгэ туохтан тутулуктааҕын чуолкайдык өйдүүллэр. Сахалыы лоп бааччы, ураты айымньылаахтык толкуйдуур оҕолор манна бааллар,”-диэн бэлиэтиир. Кини түһэрбит хаартыскаларыгар бу барыта ырылыччы көстөр. Быыстапканы көрө агрооскуола үлэһиттэрэ, манна үөрэммит, билигин академия студеннара буолбут студеннар муһуннулар. Академия профессора, академик Афанасий Васильевич Чугунов 30 сыллаах үлэни үйэтитиигэ санаатын ууран ылсыбыт энтузиаст киһиэхэ махталын уонна алгыһын тиэртэ.

Бу көһө сылдьар быыстапка бүгүн Саха Республикатын тыатын хаһаайыстыбатын министерствотыгар салҕанар. Сарсын Былатыан Ойуунускай аатынан Саха драматическай театрыгар агрооскуола тэриллибитэ 30 сылын бэлиэтир тэрээһиҥҥэ быыстапка дьон болҕомтотун түмүөҕэ.

***

СГТХА общественноһы кытта үлэҕэ салаата